თბილისის საქალაქო სასამართლოში სასახლის ღობის საქმეზე პოლიციელი, ლაშა ჯუღელი იკითხება. მისი მტკიცებით, აქციის მონაწილეები მათ "რუსეთის მონებს" ეძახდნენ. 

მოწმე პოლიციელი ირწმუნება, რომ პრეზიდენტის სასახლესთან, საპროტესტო აქციის მიმდინარეობისას მასზე ფიზიკურად 15-მდე პირი ძალადობდა, მათ შორის ამოიცნო ბრალდებული გური ჟვანია. 

როცა დაიძრნენ პრეზიდენტის სასახლისკენ, რაციიდან გავიგეთ, რომ ღობეს ანგრევდნენ, ინტერნეტიდანაც ვუყურებდით. დავუძარით ჭონქაძის ქუჩიდან, ჩავედით სასახლესთან. მე და ჩემი დანაყოფი.

[სასახლესთან] დაგვიწყეს სროლები, შეურაცხყოფას გვაყენებდნენ, დაგვიწყეს რტყმა, დაშავდნენ თანამშრომლები. თავში, ტანზე, წაქცეულზე, 15 კაცამდე მირტყამდა მეც. 

[ამოვიცანი] ერთ-ერთი, 50 წელს ზევითაა, ჩემზე ოდნავ მაღალი, შემელოტებული, გური ჟვანია. მახსოვდა სახეზე და ამოვიცანი ვიდეოთი. ვიდეოს ყურების შემდეგ, ამოვიცანი. 

ფეხს მირტყამდა წაქცეულზე. სხვა პირებიც ამოვიცანი, მაგ ამ დარბაზში... [არ არიან]. 

ყვიროდნენ, ყველას ფორმები გახადეთო. ზედაც შემომახიეს, გამოძიებამ ამოიღო. გვეძახდნენ რუსეთის მონებს და ა.შ. 

დაზიანებები მქონდა მეც - ძირითადად თავზე. ნიღაბი მომხსნეს, ფორმაც და შემდეგ გამლახეს," - განაცხადა მოწმე პოლიციელმა პროცესზე. [შიფრი: "პუბლიკა"]

ადვოკატ შოთა თუთბერიძის შეკითხვაზე: რატომ გეძახდნენ რუსეთის მონებს, რაიმე ვერსია ხომ არ გაქვთ? - ლაშა ჯუღელმა უპასუხა - "არა, არ მაქვს". 

სასახლის ღობის საქმე - თბილისის საქალაქო სასამართლოში, დღეს, პაატა ბურჭულაძის, ირაკლი ნადირაძის, მურთაზ ზოდელავას, პაატა ბურჭულაძის, ლაშა ბერიძის და კიდევ სხვა დაკავებულების პროცესი მიმდინარეობს. 

• ცნობისთვის, მურთაზ ზოდელავას, პაატა ბურჭულაძეს და ირაკლი ნადირაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ასევე ბრალი წარდგენილი აქვთ სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს. მათ ბრალი წარდგენილი აქვთ სსსკ-ის 317-ე მუხლითაც, რაც გულისხმობს მოწოდებას საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ, რაც სასჯელის სახედ და ზომად 9- წლამდე თავისუფლების აღკვეთას ითვალისწინებს.
• ირაკლი შაიშმელაშვილს ბრალდება საქართველოს სისხლის სამართლის კოდექსის 317-ე მუხლით წარედგინა, რაც გულისხმობს საქვეყნოდ მოწოდებას საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ, რაც სასჯელის სახედ და ზომად 3- წლამდე თავისუფლების აღკვეთას ითვალისწინებს.
• ლაშა ბერიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინა, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ბრალდება ასევე წარდგენილი აქვს სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს.
• ირაკლი ჩხვირკიას, ნიკა გვენცაძეს, თორნიკე მჭედლიშვილს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინა, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მას ასევე ბრალი წარდგენილი აქვს სსსკ-ის 225-ე მუხლის პირველი ნაწილით, რაც ჯგუფური ძალადობის ორგანიზებასა და ხელმძღვანელობას გულისხმობს. აღნიშნული ქმედება სასჯელის ზომად 6-დან 9- წლამდე თავისუფლების აღკვეთას ითვალისწინებს.
• გური ჟვანიას ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.
• პაატა მანჯგალაძეს ბრალდება სსსკ-ის 225-ე მუხლის პირველი ნაწილით წარედგინა, რაც ჯგუფური ძალადობის ორგანიზებას გულისხმობს. აღნიშნული ქმედება სასჯელის სახედ და ზომად 6-დან 9- წლამდე თავისუფლების აღკვეთას ითვალისწინებს.