აშშ-მა მსოფლიო ჩემპიონატის მონაწილე 50 ქვეყნის გულშემატკივრებისთვის 15000 დოლარამდე ოდენობის სავიზო დეპოზიტის მოთხოვნა გააუქმა, - ინფორმაციას სახელმწიფო დეპარტამენტი ავრცელებს.

საქართველო ამ ქვეყნებში არ არის, - ამის შესახებ რადიო თავისუფლებას თბილისში აშშ-ის საელჩოში 15 მაისს წერილობით განუცხადეს.

მანამდე, 15 მაისს გავრცელებულ ინფორმაციაში, აშშ-ის სახელმწიფო დეპარტამენტის რუსულენოვანი გვერდი წერდა, რომ ამ ქვეყნებს შორის შედიოდა საქართველოც. რადიო თავისუფლებას აშშ-ის საელჩოში განუცხადეს, რომ აღნიშნულ გვერდზე „ინფორმაცია განახლდა“.

50 ქვეყანაში არ შედის საქართველოს არცერთი მეზობელი ქვეყანა - არც სომხეთი, არც აზერბაიჯანი, არც რუსეთი და არც თურქეთი. არ შედის არც უკრაინა.

ფეხბურთში მსოფლიო ჩემპიონატი 2026 წლის 11 ივნისიდან 19 ივლისამდე აშშ-ში, კანადასა და მექსიკაში ტარდება.

2026 წლის 2 აპრილიდან საქართველო არის ერთ-ერთი იმ ქვეყანათაგან, რომელთა მოქალაქეებსაც, თუკი შეერთებული შტატების B1/B2 კატეგორიის ვიზის აღება და აშშ-ში მოგზაურობა ენდომებათ, 5, 10 ან 15 ათასი აშშ დოლარის მოცულობის ფულადი სავალდებულო გარანტიის (bond) გადახდა მოუწევთ. ეს თანხა მათ სავიზო წესების დაურღვევლობის შემთხვევაში, სახლში დაბრუნების შემდეგ დაუბრუნდებათ.