34 წლის შემდეგ პოლიცია სავარაუდო დანაშაულის ადგილზე დაბრუნდა - სოფელი ყარსგურიში ბოლო დღეებია, საგამოძიებო მოქმედებების ეპიცენტრია. 

შინაგან საქმეთა სამინისტრო ცდილობს დაადგინოს, ვინ არიან ის პირები, ვინც წლების განმავლობაში, სავარაუდოდ აუპატიურებდნენ ცხრა წლის გოგონას, რომელმაც უმძიმესს დანაშაულს ფარდა ემიგრაციიდან ახადა.

"შაბათის ეთერის" ინფორმაციით, უკვე გამოიკითხა 30 ადამიანი. გამომძიებლები შევიდნენ იმ სახლებიც კი, სადაც სავარაუდო დანაშაული ხდებოდა. გამოკითხული არის პედოფილიაში მხილებული კაცი, ბაშიაჩუკ ჩხვიმიანი, მისი ოჯახის წევრები და მეზობლები. 

ბაშიაჩუკ ჩხვიმიანი ახლა 59 წლისაა - თუ ნატა ვიბლიანს დავეყრდნობით, დანაშაული  ჩხვიმიანმა 25 წლის ასაკში ჩაიდინა. ქალი "შაბათის ეთერთან" ამბობს, რომ მას სამართალდამცავები უკვე დაუკავშირდნენ და კონკრეტულმა გამომძიებელმა უთხრა, რომ მის საქმეს ის წარუძღვებოდა. 

წყარო "შაბათის ეთერს" უყვება, რომ პედოფილიაში  მხილებული კაცი დანაშაულს არ აღიარებს.

ნატა ვიბლიანი აცხადებს, რომ ჩხვიმიანი მას "იარაღს პირში" უდებდა და ცეცხლსასროლი იარაღს მის ძმას უმიზნებდა. 

ვერავისთან ვამბობდი, ბაჩუკი [ჩხვიმიანი] ჩემზე ძალადობდა - ხან პირში მქონდა იარაღი და ხან მას ჩემს ძმებს უმიზნებდა, რომ მე ხმა არ ამომეღო... 

9 წლიდან ბაჩუკი ჩხვიმიანის მხრდან სისტემატიური ძალადობის მსხვერპლი ვიყავი.  ბაჩუკი არ იყო უცხო ჩვენი სახლისთვის. როცა უნდოდა მოდიოდა და მიდიოდა. ბაჩუკის ძმა, ავთო ჩხვიმიანი ჩემი ნათლიაა, წინა მეზობლები ვიყავით.

პირველი ძალადობა მოხდა ბოსელში... ჩემს ჩემს სახლში აკეთებდა მაგას, ეს [სექსუალური ძალადობა] ხდებოდა მინდორში, თვითონ ბაჩუკის სახლში. მაგის ოთახი საწოლი პირდაპირ ჩვენს სახლს უყურებდა. სახლიდან რომ გამოვდიოდი, მყარაულობდა. თოფს ბავშვს უმიზნებდა - "მოდი, თორემ ნახე რას ვიზამ".

იმ სახლში ჩემი ნათლიის ცოლი ცხოვრობდა, მალხაზის ცოლი ცხოვრობდა. ნუთუ ვერავინ მიხვდა?! მე ახლა მივხვდები. გათხოვილი ქალები ვერ ხვდებოდნენ? - პატრა გოგოს რა უნდა მის ოთახში რატომ დაიარება?"- ყვება ნატა ვიბლიანი. 

ემიგრანტი ქალი ჰყვება, რომ მინიმუმ 6 წელი ცხოვრობდა სექსუალური ძალადობის და  მუქარის ქვეშ.

მისივე თქმით, კაცი მას სიციცხლის მოსპობით ემუქრებოდა, თუ მომხდარის შესახებ ვინმეს მოუყვებოდა.  ქალის მონაყოლის მიხედვით, ბაშიაჩუკ ჩხვიმიანმა ის ცხენზე გამოაბა და რამდენიმე მეტრი ათრია. 

ნატა ვიბლიანი ამბობს, რომ სისტემატიური სექსუალური ძალადობის შემდეგ, 14 წლის ასაკში დაორსულდა - საავადმყოფო, სადაც ბავშვმა იმშობიარა, ზუგდიდში აღარ არსებობს,  ამიტომ ახლა რთულია არქივებში იმის დადგენა, რა ბედი ეწია ჩვილს: გააშვილეს თუ დაიღუპა.  

"ბაჩუკიმ ჩემი ორსულობის პერიოდში სანახაობა მოაწყო. დაიწყო ზრუნა იმაზე რომ ერთი საწყალი ბავშვი ბიჭი გამოიჭირეს მაგთი ნათესავი. იმ ბიჭს ააღებინეს თავზე, რომ ეს ბავში შენიაო. იარაღით დამემუქრა ბაჩუკი თუ ხმამაღლა იტყვი, დაგიხოცავ ყველასო. იმ ბიჭს არ ვიცი რა აიძულეს"- აცხადებს ნატა ვიბლიანი.

მშობიარობის შემდეგ ვიბლიანების ოჯახი, როგორც ნატა ყვება, სრულ იზოლაციაში აღმოჩნდა. მათთან კონტაქტს ყველა ერიდებოდა.  2002 წელს ისინი სამუდამოდ გადასახლდნენ სვანეთიდან ზუგდიდში, თუმცა როგორც ნატა ყვება, სავარაუდო მოძალადისთვის, მანძილი დაბრკოლება არ ყოფილა. "შაბათის ეთერის" რესპოდენტის თქმით, მან ქალის დევნა და მასზე ფსიქოლოგიური ზეწოლა ზუგდიდში გადასვლის შემდეგაც გააგრძელა.

ნატა ვიბლიანმა შემზარავი ინტერვიუ "შაბათის ეთერს" ემიგრაციიდან მისცა. ის ახლა პოლონეთში ერთ-ერთ ოჯახში მზარეულად მუშაობს.

ამასთან, მსხვერპლი ამტკიცებს, რომ მასზე მხოლოდ ერთი სრულწლოვანი კაცი არ ძალადობდა.  ქალი ასახელებს კიდევ სამი კაცის გვარს:  მალხაზი ჩხვიმიანი, როდერი ჩხვიამიანი და ჯიმშერ ვიბლიანი. 

ნატა ვიბლიანის მიერ დასახელებულ ყველა პირთან "შაბათის ეთერი" დაკავშირებას შეეცადა. არცერთი სატელეფონო ზარებს არ პასუხობს. ერთადერთი ვინც კითხვებს უპასუხა ჯიმშერ ვიბლიანის შვილია. ის ადასტურებს, რომ მამა  პოლიციამ უკვე დაკითხა, მაგრამ კატეგორიულად უარყოფს მამის კავშირს ძალადობასთან. 

ნატა ვიბლიანს ქართველი სამართალდამცავები სამშაბათს გამოკითხავენ. 

ნატა ქაჯაია დეტალებით