დღევანდელი ნაბიჯი რეჟიმის სისუსტისა და შიშის კიდევ ერთი ნათელი გამოხატულებაა - ასე ეხმაურება "ერთიანი ნაციონალური მოძრაობა" ვახო სანაიას მიმართ გამოტანილ 14 დღიანი პატიმრობის განაჩენს.

რაც უფრო მეტად ცდილობს ივანიშვილი საზოგადოების გაჩუმებას, მით უფრო აშკარა ხდება, რომ მას საკუთარი მოქალაქეების თავისუფალი აზრის ეშინია - წერს ენმ გავრცელებულ განცხადებაში.

ივანიშვილის მსახური ე.წ. მოსამართლის მიერ ჟურნალისტ ვახო სანაიასთვის ფეისბუქპოსტის გამო დაკისრებული საპატიმრო სასჯელი კიდევ ერთხელ მიუთითებს, რომ რუსი ოლიგარქი საქართველოში არა მხოლოდ ავტორიტარიზმის, არამედ სრულფასოვანი დიქტატურის დამყარების გზაზეა.
ივანიშვილს ყველაზე მეტად თავისუფალი სიტყვის, კრიტიკული აზრისა და გამბედავი ადამიანების ეშინია. სწორედ ამიტომ ცდილობს სასამართლოს გამოყენებით დააშინოს ყველა, ვინც სიმართლეს ამბობს და რეჟიმს აკრიტიკებს. ვახო სანაია ამ მხრივ განსაკუთრებით გამორჩეული ჟურნალისტია - ის არასდროს ერიდებოდა და ერიდება სიმართლის დაცვას და უმაღლესი პროფესიონალიზმით რეჟიმთან დაპირისპირებას, რაც არსებულ ვითარებაში განსაკუთრებულ გამბედაობას მოითხოვს.
მსგავს გადაწყვეტილებებს ძლიერი ხელისუფლებები არ იღებენ - დღევანდელი ნაბიჯი რეჟიმის სისუსტისა და შიშის კიდევ ერთი ნათელი გამოხატულებაა. რაც უფრო მეტად ცდილობს ივანიშვილი საზოგადოების გაჩუმებას, მით უფრო აშკარა ხდება, რომ მას საკუთარი მოქალაქეების თავისუფალი აზრის ეშინია.
სრულ მხარდაჭერასა და სოლიდარობას ვუცხადებთ რეჟიმის წინააღმდეგ მებრძოლ ყველა პატრიოტს!"- ნათქვამია გავრცელებულ განცხადებაში. 

შეგახსენებთ, თბილისის საქალაქო სასამართლომ პარლამენტის თავმჯდომარის, შალვა პაპუაშვილისა და დეპუტატ ვლადიმერ ბოჟაძის შესახებ სოციალურ ქსელში დაწერილი პოსტის გამო ჟურნალისტ ვახო სანაიას 14-დღიანი ადმინისტრაციული პატიმრობა შეუფარდა.