რუსეთი სომხეთს 1-ლი ნოემბრიდან გაზის სრულად შეწყვეტით ემუქრება - ამის შესახებ გაზეთმა „ჰრაპარაკმა“ რუსულ წყაროებზე დაყრდნობით, ხუთშაბათს, 24 სექტემბერს, გაავრცელა ინფორმაცია.

წყაროების ცნობით, შესაძლოა მოხდეს მნიშვნელოვანი „ავარია“, რის შემდეგაც მიწოდება აღარ აღდგება.

არსებული ინფორმაციებით ირკვევა, რომ ერევანს ოთხი პოლიტიკური მოთხოვნა წაუყენა და იმუქრება, რომ თუ ეს მოთხოვნა არ შესრულდება, გაზის მიწოდებას სრულად შეწყვეტს. ამჟამად გაზის მიწოდება დაგეგმილი ტექნიკური მომსახურების გამო შეჩერებულია, ხოლო სომეხი მომხმარებლები საცავიდან მარაგდებიან.

გამოცემის წყაროების ცნობით, მოსკოვმა სომხეთის პრემიერ-მინისტრს, ნიკოლ ფაშინიანს, განუცხადა, რომ მას შეუძლია თავიდან აიცილოს ეს სცენარი, თუ ის უარს იტყვის გიუმრიში რუსული სამხედრო ბაზის ბედზე და რუსული კომპანიების, მათ შორის სამხრეთ კავკასიის რკინიგზის წინააღმდეგ ზომებზე დისკუსიებზე. კრემლი ასევე მოითხოვს, რომ ერევანმა გააკეთოს არჩევანი ევრაზიულ ეკონომიკურ კავშირსა (EAEU) და ევროკავშირს შორის: კერძოდ, ან გააუქმოს კანონი ევროინტეგრაციის პროცესის დაწყების შესახებ, ან დანიშნოს რეფერენდუმის თარიღი ამ საკითხზე. კიდევ ერთი პირობაა პრორუსი პოლიტიკოსების სისხლისსამართლებრივი დევნის დასრულება და მოსკოვისთვის მისაღები ვიცე-პრემიერის დანიშვნა.

ცნობილია, რომ სომხეთი ამჟამად თითქმის მთლიანად რუსულ გაზზეა დამოკიდებული: 2025 წელს „გაზპრომმა“ მას დაახლოებით 2.7 მილიარდი კუბური მეტრი გაზი მიაწოდა. ვლადიმერ პუტინის თქმით, ერევნისთვის ამჟამინდელი შეღავათიანი ფასი ათას კუბურ მეტრზე 177 დოლარია. კრემლმა გააფრთხილა, რომ თუ სომხეთი ევრაზიის ეკონომიკურ კავშირს დატოვებს, ფასი საბაზრო ფასებს დაუბრუნდება.

შეგახსენებთ, რომ რუსეთსა და სომხეთს შორის დაძაბულობა ბოლო ექვსი თვის განმავლობაში გამწვავდა. მაისიდან მოყოლებული, მოსკოვი მუდმივად კრძალავს სხვადასხვა სომხური პროდუქტის იმპორტს, მათ შორის ალკოჰოლის, ბოსტნეულის, ხილის, თევზის, რძისა და ყვავილების.