რატომ ვერ დააკავეს სამართალდამცველებმა წლების განმავლობაში ძებნილი პირი, რომელმაც, სავარაუდოდ, კიდევ ერთი სისხლიანი თავდასხმა განახორციელა? - ამ კითხვას სოფელ ალერტკარში მომხდარი თავდასხმის შედეგად დაშავებული ზამირ როგავა სვამს. დაზარალებულმა რუხის რესპუბლიკური საავადმყოფო რამდენიმე საათის წინ დატოვა და თავდასხმის დეტალებზე ისაუბრა. მისი თქმით, ვალტერ როგავასგან მომდინარე საფრთხის შესახებ პოლიციას არაერთხელ შეატყობინა, თუმცა მისი დაკავება ვერ მოხერხდა.

ზამირ როგავა მომხდარს ოჯახებს შორის ხანგრძლივ დაპირისპირებას უკავშირებს და ბრალდებულის დაუყოვნებლივ დაკავებას ითხოვს.

მისაღები ოთახიდან გამოსული არც ვიყავი, რომ გასროლის ხმა გავიგე, რომ გამოვედი, მამაჩემი უკვე დასისხლიანებული იყო. თოფი ხელში ეჭირა და მეორეს უმიზნებდა დ ამეორეს როცა უმიზნებდა, მე ვეცი და მე მესროლა. თოფის წართმევის შემდეგ, დანა ამოიღო ჯიბიდან, პატარა დანა იყო და იმ დანას მირტყამდა, თან მომმართავდა მეგრულად, რომ მოგლლავ და რაღაცა... მამაჩემი დამჭრა, ჩემი სიძე დაჭრა... მამაჩემი რომ დაჭრა, მაგაზე სასჯელი მოიხადა, მაგრამ ცოტა ხანში გაათავისუფლეს, პირობითი სასჯელი ჰქონდა. წელიწადნახევარია ადამიანი ძებნაშია, 18 წელი აქვს მისჯილი. ერთი ძმა დაიჭირეს. ამდენი ხნის განმავლობაში რატომ ვერ მოხერხდა მისი დაჭერა? ცხელ ხაზზეც კი დავრეკე, თან არაერთხელ და ავუხსენი, რამდენად საშიში იყო ეს პიროვნება და ისიც ვუთხარი, რომ მამაჩემი სახლში იმყოფებოდა. ძალიან ცოტა თანხა მომითხოვია, ჩემთვის ძალიან შეურაცხმყოფელია ასე ცოტა თუ მოვითოხვე. მე თუ თანხას მოვითხოვდი, ალბათ მინიმუმ 100 ათასი მაინც იქნებოდა, 30 ათასი მე რომ მოვითხოვე, ძალიან შეურაცხმყოფელია ჩემთვის. მიუჯდეს თავის ძმას იქ, სადაც მისი ძმაა. ის არ გაჩერდება, მე ვიცნობ, ჩვენ კლასელები ვართ, ის არა მარტო ჩვენი ოჯახის მიმართ იყო ასეთი, არამედ ზოგადად ასეთები არიან, - ამბობს ზამირ როგავა. 

14 ოქტომბერს, ზუგდიდის მუნიციპალიტეტის სოფელ ალერტკარში, ძებნილმა ვალტერ როგავამ, მეტსახელად შერიმ, სავარაუდოდ, ორ პირს შეიარაღებული თავდასხმის შედეგად დაზიანებები მიაყენა. შემთხვევას წინ ორ ოჯახს შორის ხანგრძლივი დაპირისპირება უძღოდა. როგავა უკვე ნახევარი წელია იძებნება. პროკურატურამ მას ორი პირის მიმართ განზრახ მკვლელობის მცდელობის ბრალდება დაუსწრებლად წარუდგინა, რაც 20 წლამდე პატიმრობას ითვალისწინებს.