აქონდროპლაზიის დიაგნოზის მქონე ბავშვების დედები პრემიერს სიცრუეში ადანაშაულებენ. ისინი დღეს ირაკლი ღარიბაშვილის მიერ, იმ პრეპარატის წინააღმდეგ დაწყებულ კამპანიას გამოეხმაურნენ, რომელიც მათი შვილების გადარჩენისთვის უმნიშვნელოვანესია.

მშობლების თქმით ესპანეთი, ჩეხეთი და იტალია, ის ქვეყნებია, სადაც პრეპარატს ბავშვებს მინიმუმ 85%-ით სწორედ სახელმწიფო უფინანსებს. უკუჩვენებებს კი მათი განცხადებით პრეპარატის სასარგებლო თვისებები 65%-ით აღემატება. მშობლები უკან დახევას არ აპირებენ და უწყვეტ პროტესტს აანონსებენ.

"შემოვიდა ერთ-ერთი იშვიათი დაავადების სამკურნალო მედიკამენტი - ეს გახლავთ, სპინალურ-კუნთოვანი-ამიოტროფია, რომელშიც სახელმწიფომ ისე გადაიხადა 5 მილიონი სახელმწიფო ბიუჯეტიდან, რომ ეს მედიკამენტი არ ყოფილა რეკომენდირებული ჯანმოს მიერ, აქედან გამომდინარე, რატომ არის საჭირო მაინც და მაინც ჩვენი მედიკამენტის რეკომენდაცია გაუწიოს ჯანმომ და ისე შემოვიდეს, როცა ასეთ დღეში არიან ბავშვები, როდესაც ასეთ ტკივილებს უძლებენ. ნუ დატოვებთ თვალცრემლიან დედებს და ბავშვებს, შემოიტანეთ უსწრაფესი წესით საქართველოში ეს წამალი" - აქციის მონაწილე მშობელი.