მუქარა სახლის აფეთქებით - უკიდურესად  დაძაბული ვითარება იყო თბილისში,  მაღალაშვილის ქუჩაზე. 52 წლის კაცი, რომელიც  დღეს აღსრულებას ბინიდან უნდა გაესახლებინა, ამტკიცებდა, რომ სახლი დანაღმული ჰქონდა და თვითმკვლელობით იმუქრებოდა. 

გიორგი ფიფია უკვე რამდენიმე საითაა, მეშვიდე სართულზე, საკუთარ სახლშია ჩაკეტილი. ქალაქის ცენტრში, მრავალსართულიან კორპუსთან კინოლოგები, სასწრაფო და სახანძროო დახმარების ჯგუფებია მობილიზებული.

ადგილზე მივიდა 52 წლის კაცის ადვოკატიც. ცირა ჯავახიშვილმა "პირველებს" უთხრა, რომ გიორგი ფიფია სხვისი სიცოცხლის ხელყოფას არ აპირებს. 

დღეს ითხოვს გიორგი ფიფია სამართლიან სასამართლოს და ითხოვს იმას, რომ მისი მტკიცებულებები ისევე თანაბარწილად იქნეს გამოკვლეული სასამართლოზე, როგორც კრედიტორის მტკიცებულებები. აცხადებს იმას, რომ მე დღეს ცოცხალი თავით არ დავტოვებ ბინასო, ეს არ ნიშნავს, რომ სხვებს ემუქრება, ეს ნიშნავს იმას, რომ ის თვითმკვლელობით იმუქრება", - ამბობს ფიფიას ადვოკატი, ცირა ჯავახიშვილი.