"მთავრობის მიერ გაკეთებული განცხადებები ლახავს სასამართლოსა და ინდივიდუალურ მოსამართლეთა გამოხატვის თავისუფლებას", - ასე ეხმაურება კოალიცია დამოუკიდებელი და გამჭვირვალე მართლმსაჯულებისთვის "ოცნების" წევრების განცხადებებს.

კოალიცია დარწმუნებულია, რომ ხელისუფლების წარმომადგენლები ცდილობენ, კეთილსინდისიერი მოსამართლეების დისკრედიტაციას, რაც სასამართლოს დამოუკიდებლობას ხელს უშლის და ქვეყნის ევროპულ მომავალს აზიანებს.

ევროკომისიის რეკომენდაციების შესაბამისად, იუსტიციის უმაღლესი საბჭოს წევრების, უზენაესი სასამართლოს მოსამართლეებისა და სასამართლოების თავმჯდომარეთა (ასევე იმ კანდიდატები, რომლებსაც სურთ ამ თანამდებობების დაკავება), კეთილსინდისიერების შემოწმება ევროკავშირში გაწევრიანების მოლაპარაკებების გახსნისთვის ერთ-ერთი აუცილებელი ნაბიჯია. ამ საკითხზე ბოლო დღეებში აქტიური დისკუსია მიმდინარეობს საზოგადოებრივ და პროფესიულ წრეებში. აზრთა სხვადასხვაობაა თავად სასამართლო სისტემის შიგნითაც.

მოსამართლეთა ერთმა ნაწილმა კეთილსინდისიერების შემოწმების შემოთავაზებული მექანიზმი მკვეთრად უარყოფითად შეაფასა, საქართველოს უზენაესი სასამართლოს პლენუმის განცხადებით კი ასეთი პროცესი პრინციპულად ლახავს სასამართლოს და ინდივიდუალურ მოსამართლეთა დამოუკიდებლობას. უზენაესი სასამართლოს პლენუმის აღნიშნული განცხადება არ გაიზიარა 10-მდე მოსამართლემ, მათ შორის არიან უზენაესი სასამართლოს მოსამართლეები - ნინო ბაქაქური და ეკატერინე გასიტაშვილი. ამ მოსამართლეთა მოსაზრებებს და ევროკომისიის რეკომენდაციის შესრულებაზე მათ მიერ გამოხატულ მზაობას მმართველი გუნდის მხრიდან მათზე თავდასხმა მოჰყვა. უზენაესი სასამართლოს აღნიშნულ მოსამართლეების კეთილსინდისიერება ეჭვქვეშ დააყენეს პრემიერ მინისტრმა და მმართველი პარტიის სხვა წევრებმა.

აშკარაა, რომ მმართველი პარტია არათუ არ აღიარებს მოსამართლეთა კეთილსინდისიერების შემოწმების მოთხოვნას, როგორც ევროკავშირის ერთ-ერთ რეკომენდაციას, არამედ ცდილობს ამ იდეის სრულ დისკრედიტაციას და მის გარშემო მიმდინარე დისკუსიის ჩახშობას. განსაკუთრებით შემაშფოთებელია მმართველი გუნდის წევრების ღია თავდასხმა განსხვავებული აზრის მქონე მოსამართლეებზე. ამგვარი პოლიტიკური რიტორიკა არის ზეწოლა კონკრეტულ მოსამართლეებზე. გარდა ამისა, ამ განცხადებებს აქვს მსუსხავი ეფექტი სხვა მოსამართლეებზეც, რომლებსაც შეიძლება განსხვავებული მოსაზრებები ჰქონდეთ საკითხზე. შესაბამისად, ბოლო დღეებში გაკეთებული განცხადებებით ხელისუფლება თრგუნავს სასამართლოს შიგნით არსებულ ისედაც მწირ აზრთა სხვადასხვაობას და ლახავს მთლიანად სასამართლოს და ინდივიდუალურ მოსამართლეთა დამოუკიდებლობასა და გამოხატვის თავისუფლებას.

კოალიციის მოსაზრებით, ნებისმიერი პოზიცია, რომელიც მიმართულია სასამართლოს მიმართ ნდობის გაზრდისკენ და ქვეყნის ევროინტეგრაციის პროცესის ხელშეწყობისკენ, იმსახურებს მხარდაჭერას. ასევე, ზოგადად, სასამართლო სისტემაში აზრთა სხვადასხვაობა სიჯანსაღის მაჩვენებელია და განსხვავებული აზრი არათუ უნდა იდევნებოდეს სისტემის შიგნით თუ მის გარეთ, არამედ უნდა იყოს წახალისებული.

ზემოაღნიშნულის გათვალისწინებით, კოალიცია დამოუკიდებელი და გამჭვირვალე მართლმსაჯულებისთვის მოუწოდებს: მმართველ გუნდს - შეწყვიტოს თავდასხმები მოსამართლეებზე კეთილსინდისიერების შემოწმების მექანიზმზე მათ მიერ გამოთქმული განსხვავებული პოზიციების გამო. ასევე, შეწყვიტოს ევროკომისიის რეკომენდაციების დისკრედიტაციისკენ მიმართული კამპანია. მოვუწოდებთ პარლამენტს, განსაკუთრებით კი მმართველ პარტიას დაიწყოს მართლმსაჯულების ფუნდამენტური რეფორმირების პროცესი," - ნათქვამია განცხადებაში.

"ქართული ოცნება" მოსამართლეებს განსხვავებული აზრის გამო ემუქრება - დეპუტატებმა იერიში მიიტანეს ნინო ბაქაქურსა და ეკატერინე გასიტაშვილზე, რომლებიც არ დაეთანხმნენ ე.წ. ვეტინგთან დაკავშირებით უზენაესი სასამართლოს მიერ გავრცელებულ განცხადებას, სადაც დაგმობილი იყო მოსამართლეთა კეთილსინდისიერების შემოწმების მოთხოვნა და ეწერა, რომ "დაინტერესებული პირების მანიპულაციური, მოჩვენებითი ზრუნვაა მართლმსაჯულების სისტემაზე."