დიდი ოდენობით თანხის თაღლითურად დაუფლების ფაქტზე, პროკურატურამ ერთ პირს ბრალდება წარუდგინა - საქმის მასალების მიხედვით, მტკიცებულებების საფუძველზე დგინდება, რომ სოციალურ ქსელში შექმნილი გვერდის გამოყენებით, ბრალდებული მოქალაქეებს თანხის სანაცვლოდ ჩინეთიდან სხვადასხვა ნივთის გამოწერას ჰპირდებოდა.

ჩატარებული საგამოძიებო ღონისძიებებით გაირკვა, რომ სავარაუდო დამნაშავემ 14 მოქალაქე მოატყუა და უკანონოდ ჯამურად 149 259 ლარს დაეუფლა.

საქართველოს პროკურატურამ მოქალაქეთა დიდი ოდენობით თანხის თაღლითურად დაუფლების ფაქტზე ერთ პირს ბრალდება წარუდგინა.

შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებული სოციალურ ქსელ ,,ფეისბუქზე“ შექმნილი გვერდის გამოყენებით  მოქალაქეებს გარკვეული თანხის სანაცვლოდ, ჩინეთიდან სხვადასხვა საყოფაცხოვრებო  ავეჯის და  ტექნიკის დაბალ ფასში გამოწერას დაპირდა.  თუმცა  ნივთების გამოწერა არ უზრუნველყო და 14 მოქალაქის კუთვნილ 149 259 ლარს მოტყუებით დაეუფლა.

სამართალდამცველებმა ბრალდებული 20 მარტს დააკავეს, მას ბრალდება საქართველოს სისხლის სამართლის კოდექსის 180-ე მუხლის მე-2 ნაწილის „ბ“  და მე-3 ნაწილის „ბ“ ქვეპუნქტებით (თაღლითობა, რამაც მნიშვნელოვანი ზიანი გამოიწვია, ჩადენილი დიდი ოდენობით) წარედგინა,  რაც სასჯელის სახედ და ზომად 6-დან 9 წლამდე თავისუფლების აღკვეთას ითვალისწინებს.

პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.

შინაგან საქმეთა სამინისტრო აგრძელებს გამოძიებას სხვა დანაშაულებრივი ეპიზოდების დადგენის მიზნით, რის შემდგომაც შესაძლოა დაზარალებულთა რიცხვი გაიზარდოს.

საქართველოს პროკურატურა მოუწოდებს მოქალაქეებს მათ მიმართ განხორციელებული ანალოგიური ქმედების არსებობის შემთხვევაში, დაუყოვნებლივ მიმართოს სამართალდამცავ ორგანოებს", - ვკითხულობთ განცხადებაში.