საქართველოს პრემიერმა იცრუა - რა წერია მსოფლიო ბანკის კვლევაში

27.09.21 16:43
საქართველოს პრემიერმა იცრუა - რა წერია მსოფლიო ბანკის კვლევაში

საქართველოს პრემიერის გამოსვლა არასწორი ინტერპრეტაციით განხორციელდა-ახალი კვლევის შედეგებით, საქართველოს პოზიცია არაერთ კრიტერიუმში გაუარესდა. ამის შესახებ კვლევას bm.ge აქვეყნებს. სააგენტოს ინფორმაციით, კანონის უზენაესობის მხრივ, თუკი 2019 წელს ქვეყნის ქულა იყო 62.02, ის 2020 წელს 61.06-მდე შემცირდა. ასევე გაუარესებულია ქვეყნის შედეგი მთავრობის ეფექტიანობის მიმართულებით. 2019 წელს ამ კრიტერიუმში საქართველოს ქულა იყო 76.92, ახალი კვლევით ის 75.48-მდე შემცირდა.

bm.ge-ს კვლევებით, ასევე გაუარესებულია საქართველო ქულა კრიტერიუმში, რომელიც სიტყვის და სამოქალაქო თავისუფლებებს აფასებს. 2019 წელს საქართველოს ქულა 52.66 იყო, 2020 წელს კი ის 49.76-მდე შემცირდა. გაუარესებულია კორუფციის კონტროლის კრიტერიუმის შედეგი, სადაც საქართველოს ქულა 2019 წელს 75 იყო, ხოლო 2020 წელს კი ის 71.63-მდე გაუარესდა, შესაბამისად ყველაზე დიდი ვარდნა ქვეყანას სწორედ კორუფციის კონტროლის მიმართულებით ჰქონდა.

ამის მიუხედავად, დღეს საქართველოს პრემიერ-მინისტრმა გამართულ ბრიფინგზე საუბარი სწორედ ამ კვლევით დაიწყო და განაცხადა, რომ კორუფციისგან თავისუფლების მხრივ საქართველო მოწინავე ქვეყნების რიგებშია. თუმცა “გამორჩა” ეთქვა, რომ წინა წელთან შედარებით ინდექსი ამ კრიტერიუმში მკვეთრ გაუარესებაზე მეტყველებს. ასევე “გამორჩა” ეთქვა, რომ გაუარესებულია საქართველოს შედეგები კანონის უზენაესობის, მთავრობის ეფექტიანობის, სიტყვის და სამოქალაქო თავისუფლებისა და ანგარიშვალდებულების მიმართულებით.

ეს არის მსოფლიო ბანკის კვლევა, რომელიც შეეხება მსოფლიო მმართველობის შეფასებას და ინდიკატორებს, რომელიც ათეულობით კვლევითი ცენტრის და საერთაშორისო ორგანიზაციების ანალიზს აჯამებს და მე მინდა ამის თაობაზე ჩვენს საზოგადოებას ვუთხრა, რომ საქართველოს ამ მიმართულებით მართლაც ძალიან მნიშვნელოვანი პროგრესი და წინსვლა აქვს. ამ ანგარიშის მიხედვით, საქართველოს „კორუფციის კონტროლის“ და ეფექტური მმართველობის მიხედვით, ევროპაში და მთელს მსოფლიოში წამყვანი და სანიმუშოდ კარგი პოზიციები აქვს.

უფრო კონკრეტულად რომ გითხრათ, „კორუფციის კონტროლის“ მიხედვით საქართველო 189 ქვეყანას შორის ტოპ 50 ქვეყანაში 45 -ე პოზიციაზე გავიდა. ხოლო მთელი ევროპის საუკეთესო ოცეულში კი მე-19-ე ადგილზეა - განაცხადა ირაკლი ღარიბაშვილმა.

მსოფლიო ბანკი ყოველწლიურად აქვეყნებს მსოფლიოს მმართველობითი ინდიკატორების (WGI) შესახებ ანგარიშს, რომელიც სხვადასხვა მიმართულებით აფასებს ქვეყნებს. მათ შორისაა კანონის უზენაესობა, კორუფციის კონტროლი, მთავრობის ეფექტიანობა, ძალადობისგან თავისუფლება და სიტყვის თავისუფლება და ანგარიშვალდებულება. ქვეყნები ამ კრიტერიუმებში 0-დან 100-მდე ქულით ფასდებიან.

მსგავსი სიახლეები