უკრაინის პრეზიდენტის განცხადებით, რუსეთის მიერ დონეცკის ოლქში განხორციელებული საჰაერო თავდასხმის შედეგად დაღუპულთა რაოდენობა 24-მდე გაიზარდა, ხოლო 20-მდე ადამიანი დაშავდა.

მისი თქმით, ეს არის მორიგი მაგალითი რუსეთის ყოველდღიური აგრესიისა უკრაინული ხალხისა და სახელმწიფოს წინააღმდეგ, რასაც საერთაშორისო საზოგადოების არასაკმარისი რეაქცია აძლიერებს. ზელენსკი მკაცრი სანქციების დაუყოვნებლივ შემოღებასა და რუსეთის სამხედრო მანქანის დასუსტებისკენ მოუწოდებს, რათა მსგავსი ტრაგედიები არ განმეორდეს.

დონეცკის ოლქის სოფელ იაროვაზე რუსული დარტყმა საშინელი იყო - დარტყმა მართვადი საჰაერო ბომბით. რუსებმა ზუსტად იცოდნენ, სად ურტყამდნენ, ზუსტად ხედავდნენ, რომ მშვიდობიან მოსახლეობას ურტყამდნენ. ესენი იყვნენ ჩვეულებრივი ადამიანები, რომლებიც პენსიებს იღებდნენ. ამ დროისთვის ცნობილია, რომ დაღუპულია 24 ადამიანი. სამძიმარს ვუცხადებ მათ ოჯახებს. 19 დაიჭრა. ყველას უწევთ საჭირო დახმარებას.

ეს მხოლოდ ერთი დარტყმაა იმ მრავალი დარტყმიდან, რომლითაც რუსები ყოველდღიურად ურტყამენ უკრაინელებს - ჩვენს ხალხს, ჩვენს სახელმწიფოს. რუსები აგრძელებენ მკვლელობას და საშინელებაა, რომ გლობალური აქტორების მხრიდან საკმარისად ძლიერი რეაქცია არ არსებობს. სწორედ ამას აღიქვამს პუტინი, როგორც ბრძოლის გაგრძელების ნებართვას - თუ არ იქნება ძლიერი ზეწოლა, თუ არ იქნება საკმარისად ძლიერი პასუხი. რუსეთის ეკონომიკა, რუსეთის სახელმწიფო უნდა გრძნობდეს ტკივილს ყოველ ჯერზე, როცა კლავს, ყოველ ჯერზე, როცა ასეთ დარტყმებს აყენებს.

ახალი სანქციების გარეშე დიპლომატიაში და ომის დასრულების ყველა მცდელობაში პროგრესი არ იქნება. და დრო უმნიშვნელოვანესია. დიდი ხანია, რუსეთზე არ ყოფილა გაზრდილი ზეწოლა, რომელიც ხელშესახებ დარტყმას მიაყენებდა რუსულ სამხედრო მანქანას - სწორედ იმ ინდუსტრიებსა და სფეროებს, რომლებიც გავლენას ახდენენ აგრესიაზე. ეკონომიკაზე დაგვიანებული ეფექტები არ მოქმედებს - რუსები ამას მუდმივად ამტკიცებენ ახალი დარტყმებით,“ — განაცხადა ვოლოდიმირ ზელენსკიმ ვიდეომიმართვაში.