შეერთებულმა შტატებმა რუსული ნავთობკომპანიები: "როსნეფტი" და "ლუკოილი" დაასანქცირა. ამის შესახებ ინფორმაციას აშშ-ის სახაზინო დეპარტამენტი ავრცელებს. 

განცხადების მიხედვით, ახალი სანქციები "რუსეთის მხრიდან უკრაინაში ომის დასასრულებლად სერიოზული ერთგულების ნაკლებობის შედეგია".

ამასთან, განცხადებაში აღნიშნულია, რომ შეერთებული შტატები გააგრძელებს ომის მშვიდობიანი გზით მოგვარების მხარდაჭერას. მათი თქმით, მუდმივი მშვიდობა "მთლიანად დამოკიდებულია რუსეთის მზადყოფნაზე, აწარმოოს კეთილსინდისიერად მოლაპარაკებები".

აშშ რუსეთს მოუწოდებს, დაუყოვნებლივ შეწყვიტოს ცეცხლი.

ახლა მკვლელობების შეწყვეტისა და დაუყოვნებლივი ცეცხლის შეწყვეტის დროა. იმის გათვალისწინებით, რომ პრეზიდენტ პუტინი უარს ამბობს ამ უაზრო ომის დასრულებაზე, ფინანსთა სამინისტრო სანქციებს უწესებს რუსეთის ორ უდიდეს ნავთობკომპანიას, რომლებიც აფინანსებენ კრემლის საომარ მანქანას. ფინანსთა სამინისტრო მზადაა, საჭიროების შემთხვევაში, მიიღოს დამატებითი ზომები, რათა მხარი დაუჭიროს პრეზიდენტ ტრამპის მცდელობას, დაასრულოს კიდევ ერთი ომი. ჩვენ მოვუწოდებთ ჩვენს მოკავშირეებს, შემოგვიერთდნენ და დაიცვან ეს სანქციები," - წერია განცხადებაში. 

ასევე, სახაზინო დეპარტამენტის განცხადებით შეზღუდვები უწესდება ყველა სუბიექტს, რომლის 50 პროცენტი ან მეტი, პირდაპირ თუ ირიბად, "როსნეფტისა" და "ლუკოილის" საკუთრებაა, აღნიშნულ სიაში ორი უდიდესი ნავთობკომპანიის 34 შვილობილი კომპანია შედის. 

ცნობისთვის, რამდენიმე დღის წინ "როსნეფტი" და "ლუკოილი" ბრიტანეთმაც დაასანქცირა.