უკრაინა 9 მაისს მოსკოვში გამართულ ღონისძიებაში სომხეთის, ყაზახეთის, ყირგიზეთის, ტაჯიკეთის, თურქმენეთისა და უზბეკეთის ლიდერების ღონისძიებაში მონაწილეობას არამეგობრულ ნაბიჯად მიიჩნევს.

ამის შესახებ უკრაინის საგარეო საქმეთა სამინისტროს განცხადებაშია ნათქვამი.
სამინისტრო ამბობს, რომ  საჯარო ღონისძიებაში სამხედრო დამნაშავესთან ერთად მონაწილეობა უკრაინის მიმართ ამორალური და არამეგობრული ნაბიჯი და უკრაინელი ხალხის მიმართ ზიზღის გამოვლინებაა.

უკრაინის საგარეო საქმეთა სამინისტრო აღნიშნავს, რომ ღონისძიების მსვლელობისას რუსეთის პრეზიდენტმა, ვლადიმერ პუტინმა გაამართლა უკრაინის ქალაქებისა და სოფლების ნგრევა.

„ჩვენ მიგვაჩნია, რომ ამ სახელმწიფოთა ლიდერების მონაწილეობა საჯარო ღონისძიებაში სამხედრო დამნაშავის გვერდით, რომელმაც აღლუმის წინა ღამეს 25 ფრთოსანი რაკეტა ისროლა უკრაინის მიმართულებით, ამორალური და არამეგობრული ნაბიჯია უკრაინის მიმართ, ზიზღის გამოვლინებაა უკრაინელი ხალხის მიმართ, რომელიც იბრძვის გადარჩენისა და თავისუფლებისთვის“, – აღნიშნულია უკრაინის საგარეო საქმეთა სამინისტროს განცხადებაში.