რუსები დიდხანს ემზადებოდნენ კახოვკას ჰესის დასანგრევად - უკრაინის თავდაცვა
უკრაინის თავდაცვის სამინისტროს წარმომადგენლის, ანდრეი იუსოვის განცხადებით, რუსები დიდხანს ემზადებოდნენ კახოვკას ჰესის დასანგრევად.
იუსოვი ამბობს, რომ რუსული პროპაგანდა ქაოტურად რეაგირებდა კახოვკას ჰიდროელექტროსადგურის აფეთქებაზე. მისი თქმით, რუსების გარდა, არავის ჰქონდა ფიზიკური შესაძლებლობა და საშუალება მსგავსი მასშტაბური აფეთქების განსახორციელებლად.
"თუ გადავხედავთ პროპაგანდისტების, რაშისტული რეჟიმის "ჩინოვნიკების" რეაქციების ქრონოლოგიას ამ მოვლენებთან დაკავშირებით, დავინახავთ: ჯერ არაფერი ხდება, მერე ხდება, ოღონდ ნაწილობრივ, შემდეგ კი უკრაინაა დამნაშავე, მაგრამ ისინი ძალიან ბედნიერები არიან, რომ კუნძულები, რომლებზეც თითქოს ჩვენი დამცველები იყვნენ დაფუძნებული, დაიტბორა", - თქვა უკრაინის თავდაცვის სამინისტროს წარმომადგენელმა.
