ისლანდიაში, რეიკიანესის ნახევარკუნძულზე ვულკანის ამოფრქვევა დაიწყო, იუწყება RÚV. ვულკანი ისლანდიის დედაქალაქ რეიკიავიკიდან 40 კილომეტრში მდებარეობს. ეს არის მეოთხე ამოფრქვევა 2023 წლის დეკემბრის შემდეგ და მეშვიდე 2021 წლის შემდეგ, როდესაც ვულკანმა 800-წლიანი ძილის შემდეგ გაიღვიძა.

ნაპრალის სიგრძე დაახლოებით სამი კილომეტრია. ამოფრქვევის გამო მოქმედებს ავარიული დონე. საათნახევარში ლავა სამხრეთით, დაახლოებით, 1,2 კმ-ით, ქალაქ გრინდავიკისკენ დაიძრა. ადგილზე მცხოვრებლების ევაკუაცია განხორციელდა.

გრინდავიკში 4 ათასი ადამიანი ცხოვრობდა, თუმცა წინა ამოფრქვევისას სამი სახლი დაინგრა, დაზიანდა გზები, ელექტროგადამცემი ხაზები და წყლის მილები. მხოლოდ ასამდე ადამიანი დაბრუნდა გრინდავიკში.