"მშვიდობა თუ გვინდა, უნდა მოვემზადოთ ომისთვის" - ევროპული საბჭოს პრეზიდენტის, შარლ მიშელის თქმით, ევროპა "ომის ეკონომიკის" რეჟიმზე უნდა გადავიდეს.

მიშელმა გამოაქვეყნა სვეტი ევროპულ გაზეთებში და Euractiv ვებსაიტზე სათაურით
"თუ ჩვენ გვინდა მშვიდობა, უნდა მოვემზადოთ ომისთვის", სადაც მან აღწერა ის ნაბიჯები, რომლებიც, მისი აზრით, ევროკავშირმა უნდა გადადგას ამ ამოცანების მისაღწევად.

მიშელი წერს, რომ ომის დაწყებიდან ორი წლის შემდეგ - "ცხადი გახდა, რომ რუსეთი არ გაჩერდება უკრაინაში, ისევე, როგორც ის არ გაჩერებულა ყირიმში 10 წლის წინ". მისი თქმით, კრემლი აგრძელებს სიტუაციის დესტაბილიზაციას მოლდოვაში, საქართველოში, სამხრეთ კავკასიაში, დასავლეთ ბალკანეთში და აფრიკის ქვეყნებშიც კი.

„თუ ჩვენ არ მივიღებთ ევროკავშირის სწორ პასუხს და არ გამოვავლენთ უკრაინისადმი საკმარის მხარდაჭერას რუსეთის შესაჩერებლად, ჩვენ შემდეგი ვიქნებით. ამიტომ უნდა ვიყოთ მზად თავდაცვისთვის და გადავიდეთ „ომის ეკონომიკის“ რეჟიმზე. თუ ჩვენ გვინდა მშვიდობა, უნდა მოვემზადოთ ომისთვის“, – განაცხადა მიშელმა.