რუსეთის ფედერაციის ეროვნული გვარდია ამტკიცებს, რომ საკონცერტო დარბაზ Crocus City Hall-ში მომხდარი ტერაქტის მონაწილეებზე ძებნა ამ დრომდე მიმდინარეობს.

"ტერაქტის ადგილზე რუსეთის გვარდიის სპეცდანიშნულების რაზმები მუშაობენ".

"კრიმინალების ძებნა და შენობიდან მოქალაქეების ევაკუაცია მიმდინარეობს.

ჩვენ გულწრფელ სამძიმარს ვუცხადებთ დაღუპულთა ოჯახებს და მეგობრებს" - ნათქვამია განცხადებაში.

განცხადების თანახმად, თავდამსხმელები ამ ეტაპზე იდენტიფიცირებულები არ არიან. ჯერჯერობით დაუდგენელია, მათი ზუსტი რაოდენობაც.

ცნობისთვის, Crocus City Hall-ში მომხდარი სროლისა და აფეთქების შედეგად გაჩენილი ხანძარი 13 000 კვადრატულ მეტრ ტერიტორიაზეა გავრცელებული. რუსეთის საგანგებო სიტუაციათა სამინისტროს ცნობით, ხანძრის საწინააღმდეგო სამუშაოებში 320 მეხანძრე და 130 სახანძრო-სამაშველო ტექნიკა მონაწილეობს. სამუშაოებში ჩართულია 3 ვერტმფრენი.

საკონცერტო დარბაზში, სულ მცირე, სამმა შეიარაღებულმა პირმა ცეცხლი გახსნა. 

ოფიციალური ცნობით, თავდასხმას 40 ადამიანი ემსხვერპლა, 100-ზე მეტი კი დაშავდა.

რუსეთის საგარეო საქმეთა სამინისტრომ Crocus City Hall-ში მომხდარი თავდასხმა ტერაქტად შეაფასა.