დამნაშავეებმა მიმალვა სცადეს და უკრაინისკენ დაიძრნენ - ვლადიმერ პუტინი ტერაქტიდან 20 საათის შემდეგ რუს ხალხს მიმართავს.პუტინი მომხდარში უკრაინას ღიად ადანაშაულებს.

რუსეთის პრეზიდენტი ამბობს, რომ ყველა დამნაშავეს იპოვიან და მათ მკაცრად დასჯიან.

„ოთხივე დამნაშავე იპოვეს და დააკავეს. მიმალვა სცადეს და უკრაინისკენ დაიძრნენ, სადაც მანამდე საზღვრის გადასაკვეთად ფანჯარა მოამზადეს. ჩვენ საქმე გვაქვს არა მხოლოდ ცინიკურად დაგეგმილ ტერაქტთან, არამედ დაუცველი ადამიანების მასობრივ მკვლელობასთან. დამნაშავეები იქ მოსაკლავად იყვნენ. როგორც ადრე ნაცისტებმა გააკეთეს, ისინიც გეგმავდნენ საჩვენებელ სიკვდილით დასჯას. ჩვენ ვიპოვით და დავსჯით ყველა დამნაშავეს“, - თქვა პუტინმა.

რუსეთის პრეზიდენტმა რუსეთში ხვალინდელი დღე გლოვის დღედ გამოაცხადა.

მოსკოვში, საკონცერტო დარბაზში მომხდარი თავდასხმის შედეგად დაღუპულთა რიცხვი 140-მდე გაიზარდა.

რუსული მედია "Ria Novosti" მარგარიტა სიმონიანზე დაყრდნობით წერს, რომ დაღუპულთა შორის სამი არასრულწლოვანია. 

შეგახსენებთ, 22 მარტს, მოსკოვის საკონცერტო დარბაზში რამდენიმე შეიარაღებული პირი შეიჭრა. ნიღბიანები ცეცხლსასროლი იარაღიდან მშვიდობიანი მოქალაქეების მიმართულებით ისროდნენ.