რუსეთი ისევ დრონებით იერიშებს უჩივის. ოკუპანტი ქვეყნის თავდაცვა ამტკიცებს, რომ უპილოტო საფრენი აპარატების განადგურება შეძლეს.

უწყების ცნობით, როსტოვის ოლქის თავზე საჰაერო თავდაცვამ 47 დრონი გაანადგურა, აზოვისა და შავი ზღვების წყლებზე - 17, კრასნოდარის მხარეში - 8 და თითო დრონი რუსეთის ფედერაციის კიდევ სამ რეგიონში - სმოლენსკში, ვორონეჟსა და ბელგოროდში გაანეიტრალეს. 

კრასნოდარის მხარეში მდებარე ქალაქ ტუაფსეს მცხოვრებლები აცხადებენ, რომ ღამით აფეთქებების ხმები გაიგონეს.  

SHOT-ის ცნობით, დრონების სამიზნე ტუაფსეში მდებარე ნავთობგადამამუშავებელი ადგილობრივი ქარხანა აღმოჩნდა.

ადგილობრივი ნავთობის საწყობის მიმართულებით აფეთქებების ხმა გაისმა დაახლოებით 3:30 წუთზე, მანამდე კი თვითმხილველებმა უპილოტო საფრენი აპარატის ფრენის დამახასიათებელი ხმები გაიგონეს, - აცხადებს რუსეთის თავდაცვა. 

დილით ქალაქში აფეთქებების მეორე სერია გაისმა. მოგვიანებით, კრასნოდარის ტერიტორიის ოპერატიული შტაბმა გაავრცელა ინფორმაცია, რომ ტუაფსეში, „უპილოტო საფრენი აპარატის ნამსხვრევების ჩამოვარდნის“ შედეგად, დაზიანდა ნავთობგადამამუშავებელი ქარხნის ინფრასტრუქტურა.

VChK-OGPU არხის ცნობით, როსტოვის ოლქის ქალაქ მოროზოვსკში უპილოტო საფრენი აპარატი თავს დაესხა სამხედრო აეროდრომს და ხანძარი გაჩნდა.