დაკავებულია მესაფლავე, რომელიც საფლავებს ჩუმად ყიდდა - სუს-ის ინფორმაციით, ხელბორკილები თბილისის მერიის თანამშრომელს, შპს „ჰერმესის“ ზედამხედველს დაადეს.

ირკვევა, რომ შპს ჰერმესის ზედამხედველი მოქალაქეს დაჰპირდა, რომ კანონის გვერდის ავლით, ფულის სანაცვლოდ დაუმზადებდა სამადგილიანი საფლავის მოწმობასს და დოკუმენტში ჩაწერდა, თითქოს იმ ტერიტორიაზეე  მოქალაქის გარდაცვლილი ბაბუა იყო დაკრძალული.

უფრო მეტიც, დაკავებულმა საფლავების შეძენით დაინტერესბულ მოქალაქეს დაჰპირდა, რომ ცარიელ საფლავს მისი ბაბუის სახელს და გვარსაც დააწერდა. ეს ყველაფერი 4600 ლარის სანაცვლოდ მოხდა. ჰერმესის ზედამხედველს 6 წლიანი პატიმრობა ემუქრება.

ჩატარებული გამოძიებით დადგენილია, რომ ქ. თბილისის მერიის მიერ დაფუძნებული შპს „ჰერმესის“ მუხათგვერდის სასაფლაოს ზედამხედველი საქართველოს მოქალაქეს, მიუხედავად იმისა, რომ მუხათგვერდის სასაფლაო ქ. თბილისის მერიის დაქვემდებარებაშია და კანონით გარდაცვალების ცნობის გარეშე საფლავის გასხვისება არ შეიძლება, დაჰპირდა, რომ გარდაცვალების ცნობის გარეშე, საკუთრებაში გადასცემდა მუხათგვერდის სასაფლაოზე მდებარე სამადგილიან საფლავს და დაუმზადებდა საფლავის მოწმობას, რომელშიც ჩაიწერებოდა ხსენებული მოქალაქის გარდაცვლილი ბაბუის მონაცემები, რომ თითქოს საფლავის ტერიტორიაზე უკვე დასაფლავებული იყო აღნიშნული პირი და გაკეთდებოდა შესაბამისი წარწერა, რის სანაცვლოდაც მოითხოვა 4600 ლარის გადახდა.

2025 წლის 3 და 5 ნოემბერს მოქალაქემ ბრალდებულს გადასცა მოთხოვნილი თანხის ნაწილი 2100 ლარის ოდენობით.
2025 წლის 14 ნოემბერს სასაფლაოს ზედამხედველმა პირმა ხსენებულ მოქალაქეს გადასცა საფლავის მოწმობა და გამოართვა თანხის დარჩენილი ნაწილი - 2500 ლარი.
გამოძიების ფარგლებში, სასამართლოს განჩინების საფუძველზე, განხორციელდა ფარული საგამოძიებო მოქმედებები, რის შედეგადაც მოპოვებულია აღნიშნული დანაშაულებრივი ქმედების ჩადენის ამსახველი აუდიო/ვიდეომტკიცებულებები.
აღნიშნულ დანაშაულებრივ ქმედებასთან (კომერციული მოსყიდვა) დაკავშირებით გამოძიება მიმდინარეობს საქართველოს სისხლის სამართლის კოდექსის 221-ე მუხლის მე-4 ნაწილის „ა“ ქვეპუნქტით, რაც სასჯელის სახით 4-დან 6 წლამდე ვადით თავისუფლების აღკვეთას ითვალისწინებს.