"ქართულ ოცნებას" აქვს შანსი გადადგას სახელმწიფოებრივი ნაბიჯი და "თელასის" წილები რუსული ენერგო გიგანტისგან გამოისყიდოს - ამის შესახებ ეკონომისტები "პირველებთან" საუბრობენ. 

მათი თქმით, სულ უფრო ცხადი ხდება, რამდენად საფრთხის მატარებელია კრიტიკული ინფრასტრუქტურის და აქტივების ოკუპანტი ქვეყნის ხელში ყოფნა. 

ექსპერტების ვარაუდით, სანქციები იმდენად მძიმე შეიძლება, აღმოჩნდეს, რომ შესაძლოა, ერთ დღეს თბილისი ელექტროენერგიის გარეშე დარჩეს. 

ბუნდოვანია ისიც, როგორ უნდა გააგრძელოს "თელასმა" სხვადასხვა ინფრასტრუქტურის განახლება, თუ ის სანქციების გამო დოლარში ვერ შეძლებს ტრანზაქციების განხორციელებას: 

ძალიან მიჭირს დავიჯერო, რომ "თელასი" და "თელმიკო"  დოლარში გადარიცხვების გარეშე შეძლებენ იმ სერვისის მოწოდებას, რომლის მოწოდების ვალდებულება აქვთ აღებული და ამიტომაც აქ მე ვისურვებდი, გამიხარდებოდა უფრო კრიტიკული ყოფილიყო მარეგულირებელი - ნამდვილად შეაფასოს კრიტიკულად რამდენად არის ეს შესაძლებელი. 

მთავარი საკითხია შემდეგი - რამდენად გამოიჩენს საქართველოს დე ფაქტო მთავრობა სიმკაცრეს და გამჭრიახობას და ეცდება, ამ აქტივის ხელში ჩაგდებას. ეს არის მილიონში ერთი შანსი, რომელიც გაუჩნდა საქართველოს სახელმწიფოს, რუსეთის ხელიდან გადმოიბიროს ეს კრიტიკული აქტივი. მარეგულირებელს აქვს ყველა რესურსი შეაფასოს, რამდენად შეუძლია "თელასს" და "თელმიკოს" ოპერირება და თუ არ შეუძლია ამ პირობებში ოპერირება, მოსთხოვოს მას ამ აქტივის დათმობა. სახელმწიფომ შეიძლება ეს აქტივი შეიძინოს, შემდეგ შეუძლია ისევ გაასხვისოს, მაგრამ უფრო სანდო ინვესტორზე. 

ნებისმიერი პატრიოტი მთავრობა ამ შესაძლებლობას ხელიდან არ გაუშვებდა და ეცდებოდა ამ აქტივის რუსული ხელიდან გადმობირებას. 

სხვა თანაბარ პირობებში, ამ სერვისის არ მიღების შესაძლებლობა არის გაზრდილი. შეიძლება, უბრალოდ, რაღაც მომენტში "თელასმა" და "თემიკომ" ვეღარ უზრუნველყონ დენის მოწოდება თბილისში. 

რა თქმა უნდა, მივიღებთ რაღაც მავნე პრაქტიკებს, რომელიც იქნება შემდეგნაირი: გაჩნდება რაღაც მესამე კომპანიები, ეს მესამე კომპანიები შეიძენენ აპარატურას და მერე სავარაუდოდ, ადგილზე მიყიდიან "თელას" და "თელმიკოს". ესეც საფრთხესთან არის დაკავშირებული, რადგან ეს კომპანიები ირიბად უწყობენ ხელს სანქციების გვერდით ავლას"- აცხადებს პაატა ბაირახტარი.

"თელასზე" „ინტერ რაოს“ სანქციები ვრცელდება- ევროკავშირის პრესსამსახურმა BMG-ისთვის გაგზავნილ ოფიციალურ წერილში დაადასტურა, რომ თუ მთავარი კომპანია შავ სიაში ხვდება, შეზღუდვები ავტომატურად ეხება მის შვილობილ კომპანიებსაც.

რუსული ენერგოგიგანტი კი „თელასის“ 75 პროცენტს ფლობს, რაც ნიშნავს იმას, რომ ევროკავშირის სანქციების წესი თბილისის ელექტრო მიმწოდებლებზეც ვრცელდება. 

ამასთან, სებ-მა რუსული კომპანიის შავ სიაში მოხვედრისთანავე განმარტა, რომ ადგილობრივ ბანკებს უფლება აქვთ მოემსახურონ „თელასს“, ოღონდ მხოლოდ ეროვნულ ვალუტაში - ლარში.