​"დრო ძალიან სწრაფად მიდის, დრო იკარგება და ეს შესაძლებლობებიც იკარგება" - ამის შესახებ საქართველოს მეხუთე პრეზიდენტმა Facebook live-ში განაცხადა, სადაც მოქალაქის კითხვას უპასუხა: "საქართველო ზედიზედ მეორედ ჩამოაშორეს NATO-ს სამიტის დღის წესრიგს, აჩენს ეს კითხვას, კარგავს თუ არა ქვეყანა უსაფრთხოების გარანტიებს დასავლეთისგან?"

სალომე ზურაბიშვილის თქმით, საქართველოს NATO-სთან და ევროკავშირთან დაახლოება ქვეყნის უსაფრთხოებასთანაც იყო დაკავშირებული. 

ჯერ ერთი როგორც ასეთი უსაფრთხოების გარანტიები არასწორი სიტყვაა იმიტომ, რომ NATO-ს უსაფრთხოების გარანტიები ვრცელდება მხოლოდ NATO-ს წევრ ქვეყნებზე, ასე რომ ამ კუთხით ჩვენ არასდროს გვქონია უსაფრთხოების გარანტიები და ეს იყო მიმართულება და მისწრაფება საქართველოსი, რომ ჩვენ რაც შეიძლება ახლოს მივსულიყავით იმ კართან, რაც იქნებოდა რეალურად შესაძლებლობა ჩვენთვის, რომ მიგვეღო ეს უსაფრთხოების გარანტიები. ასევე, ევროკავშირთან დაახლოება ამავე მიზნითაც იყო გამართლებული, მაგრამ ეს არ ნიშნავს იმას, რომ რაღაც ფორმით ეს დაახლოება თუნდაც NATO-სთან და ევროკავშირთან, მაინც დაკავშირებული იყო ჩვენ უსაფრთხოებასთან და ეს ჩვენ ძალიან კარგად ვიცით და ვგრძნობთ, მაგრამ ეს ყველაფერი დღეს იკარგება, სანამ ჩვენ ამას არ აღვადგენთ და დრო ძალიან სწრაფად მიდის, დრო იკარგება და ეს შესაძლებლობებიც იკარგება. ჩვენზე არის დამოკიდებული და არა გარეთ სხვაზე, რომ ჩვენ დავიბრუნოთ ეს მომავალი და კიდევ ერთხელ, დრო მალე იწურება. მოვა ისეთი დროც, როგორიც არის ამის აღდგენა, ბევრად უფრო რთული იქნება, თუ ჩვენ დროზე არ მოვედით გონს," - განაცხადა სალომე ზურაბიშვილმა.