პატიმრების წამებით ხელისუფლებაში მოსული ძალა „არაქართული ოცნების“ სახით დღეს თავად არის პატიმრების მხრიდან წამებაში, არაადამიანურ მოპყრობასა და ღირსების შელახვაში ბრალდებული, - ასე გამოეხმაურა  „ლელო-ძლიერი საქართველოს“ გენერალური მდივანი ირაკლი კუპრაძე მსჯავრდებული გიორგი დავითაძის განცხადებას, რომელშიც მან მე-6 პენიტენციური დაწესებულების თანამშრომლები სექსუალურ ძალადობაში დაადანაშაულა.

მისივე თქმით, აუცილებელია სასწრაფოდ დაიწყოს ობიექტური გამოძიება, რომლის დასრულებამდეც ყველა მონაწილე პირს უფლებამოსილება შეუჩერდეს.

ასევე აუცილებელია, რომ ამ პროცესებში ჩაერთონ საერთაშორისო ადამიანების უფლებადაცვითი ორგანიზაციები.

„ძალიან მარტივია მოცემულობა გავიაზროთ - 14 წლის წინ „არაქართული ოცნება“ ციხის კადრებითა და სკანდალით მოვიდა ხელისუფლებაში. შემდეგ ამ 14 წლის განმავლობაში, განსაკუთრებულად ბოლო წლებში, ვხედავთ და ვისმენთ არაერთ მძიმე ისტორიას, მძიმე ბრალდებას ციხეებზე. პატიმრების მხრიდან არაერთი მძიმე ბრალდება და ისტორიაა გაჟღერებული პენიტენციურ დაწესებულებებზე. გიორგი დავითაძის მხრიდან გაჟღერებული ინფორმაცია, რომ ის პენიტენციურ დაწესებულებაში ხელით გააუპატიურეს, რაც ჩემთვისაც მძიმე სათქმელია, მაგრამ ის ვიდეო, რაც გამოქვეყნდა პენიტენციური დაწესებულების მხრიდან, არა თუ აქარწყლებს რაიმე ტიპის ეჭვებს, არამედ პირიქით, ბევრად უფრო მეტს აჩენს. ხელთათმანიანი კაცი, რომელიც ჩანს კადრებში, კიდევ ერთხელ იმ ეჭვის საფუძველია, რომ მართლაც დანაშაული მოხდა. ეს აუცილებლად უნდა გამოიძიოს დამოუკიდებელმა საგამოძიებო ორგანომ. ეს ჩვენი ერთ-ერთი მთავარი შეფასება და მოთხოვნაა. შეფასების ნაწილში უნდა ითქვას, რომ „არაქართულმა ოცნებამ“ გადაიმეორა და შეისისხლხორცა ყველა ის დანაშაულებრივი პრაქტიკა, რაც სხვადასხვა ხელისუფლების პირობებში ამ ქვეყანაში არსებობდა, რაც მსჯავრდებულების მიმართ არაადამიანური ქცევები იყო გამოვლენილი. ცალსახაა, რომ დღეს საქართველოში საქართველოს მოქალაქე პატიმრები, რომლებიც ათი ათასობით არიან, მხარდაჭერასა და სოლიდარობას საჭიროებენ.

მოგმართავთ პატიმრებს -დანაშაულები, რომელიც შესაძლოა ყოველდღიურად თქვენ წინააღმდეგ მიმდინარეობს და რომელზეც ყოფილი პატიმრები აქტიურად საუბრობენ, არ დარჩება დაუსჯელი. ჩვენ ვიშრომებთ და ვიბრძოლებთ იმისთვის, რომ თქვენი უფლებები იყოს დაცული, არ იყოს ციხეები გადავსებული, იყოს ჰიგიენა დაცული და იყოს ის ადამიანური ღირსება დაცული, რომელიც აუცილებელია იმისათვის, რომ ჩვენ ქვეყანას სახელმწიფო ერქვას. პირველი, ჩვენი მოთხოვნაა დაუყოვნებლივ სრულიად დამოუკიდებელი და ობიექტური მონიტორინგი ჩატარდეს საქართველოს ყველა პენიტენციურ დაწესებულებაში. მეორე, საერთაშორისო უფლებადაცვითი ორგანიზაციები დაუყოვნებლივ ჩაერთონ პროცესში და ადამიანის უფლებები შესწავლილი იქნეს მყისიერად და ახლავე, მათ შორის შესწავლილი იქნას გადავსებული საკნების პრობლემა. მესამე, პასუხისგებაში მიეცეს ყველა პირი, თუ ეს დანაშაული დადასტურდება - ბადრაგებიდან დაწყებული უწყების მაღალჩინოსნებით დამთავრებული და სანამ საგამოძიებო ობიექტური პროცესი დასრულდება მანამდე ყველა მონაწილე პირს უფლებამოსილება შეუჩერდეს. პატიმრების წამებით ხელისუფლებაში მოსული ძალა „არაქართული ოცნების“ სახით დღეს თავად არის პატიმრების მხრიდან წამებაში, არაადამიანურ მოპყრობასა და ღირსების შელახვაში ბრალდებული. ჩვენ ვდგავართ საქართველოს თითოეული მოქალაქის მხარდამხარ, მათ შორის, იმ მსჯავრდებულების მხარდამხარ, რომლებსაც ახლა სჭირდებათ სოლიდარობა“, - განაცხადა ირაკლი კუპრაძემ.

რა მოხდა რუსთავის ციხეში -  პატიმარ გიორგი დავითაძის ბრალდების შემდეგ, რომლის მიხედვითაც ის ბადრაგმა გააუპატიურა, პენიტენციური სამსახურმა 2025 წლის 21 დეკემბერს  დეესკალაციის ოთახში გადაღებული 4 წუთიანი ვიდეომასალა გაავრცელა.

კადრებში ჩანს ფიზიკური დაპირისპირება ბადრაგსა და პატიმარ დავითაძეს შორის. პაატა სალიას უწყება ირწმუნება, რომ პატიმარი ტყუის, როცა სექსუალურ ძალადობაზე საუბრობს. 

შეგახსნებეთ, რომ პატიმარი ბადრაგს გაუპატიურებაში ადანაშაულებს -  შოკისმომგვრელი ჩვენება 36 წლის კაცმა სააპელაციო სასამართლოს დარბაზში მისცა. მეექვსე პენიტენცირი დაწესებულების ბინადარი, გიორგი დავითაძე მოსამართლეს უმტკიცებდა, რომ ციხის სამარტოო საკანში, შურისძიების, დამცირების და ღირსების შელახვის მოტივით, მასზე სექსუალურად იძალადეს.

პატიმრის თანახმად, უმძიმეს დანაშაულს 10-მდე თანამონაწილე ჰყავს -  ისინიც ციხის ბადრაგები არიან. კაცის თქმით, არცერთი ბადრაგი ამ დრომდე პასუხისგებააში არ არის მიცემული.