„ერთიანი ნაციონალური მოძრაობა“ ითხოვს,  მაღალჩინოსნების ხელფასების ზრდისთვის გათვალისწინებული 395 მილიონი ლარი პენსიონერებს მოხმარდეს. ამის შესახებ ლაშა ფარულავამ საგანგებო ბრიფინგზე ისაუბრა. 

პარტიის განცხადებით, ამ თანხით პენსიის 120 ლარით გაზრდა იქნება შესაძლებელი. ენმ-ში აცხადებენ, რომ 2027 წლიდან „ქართული ოცნების“ მაღალჩინოსნების ანაზღაურება 1 350 ლარით იზრდება, მაშინ როცა პენსია მხოლოდ 415 ლარი იქნება.

პარტია საჯარო დაწესებულებებში შრომის ანაზღაურების შესახებ კანონის გაუქმებას მოითხოვს.

ჩვენი საერთო ძალისხმევით, ანტიქართული „ოცნება“ იძულებული გახდა, პენსიებთან დაკავშირებით ჩვენი მოთხოვნა ნაწილობრივ შეესრულებინა. თუმცა, მაშინ, როცა პენსიონერები გაძვირებულ ცხოვრებას ვეღარ უმკლავდებიან, "ოცნება" საკუთარ კეთილდღეობას ხალხის ხარჯზე კიდევ უფრო ზრდის.

2027 წლიდან კობახიძის, ყაველაშვილისა და პაპუაშვილის ყოველთვიური ანაზღაურება 17 350 ლარი გახდება, თითოეულის ხელფასი 1 350 ლარით გაიზრდება, მაშინ როცა პენსია მხოლოდ 415 ლარი იქნება. 

ანუ, 41 ჯერ აღემატება "ოცნების" მაღალჩინოსნების ანაზღაურება პენსიას, ეს არის სოციალური უფსკრული, უთანასწორობა და უსამართლობა, რომელზეც პასუხისმგებელი ბიძინა ივანიშვილია! 

ინფლაციისა და გაძვირებული სურსათის, მედიკამენტებისა და პირველადი მოხმარების საქონლის პირობებში, ჩვენი პენსიონერები ხშირად აუცილებელ საჭიროებებს შორის არჩევანის გაკეთებასაც კი ვერ ახერხებენ.

ამიტომ ვითხოვთ, გაუქმდეს კანონი „საჯარო დაწესებულებაში შრომის ანაზღაურების შესახებ“ და მაღალჩინოსნების ხელფასების ზრდისთვის გათვალისწინებული 395 მილიონი ლარი ხალხს მოხმარდეს.

ამ თანხით პენსიის 120 ლარით გაზრდა იქნება შესაძლებელი!

რუსი ოლიგარქის ხელისუფლებას საკმარისზე მეტი აქვს მოპარული, მის მაღალჩინოსნებს კი ისედაც მაღალი ანაზღაურება აქვთ! 

ჩვენი მოთხოვნაა მკაფიოა:

მეტი მხარდაჭერა ხალხს და არა მეტი ფული „ოცნების“ კორუმპირებულ ჩინოვნიკებს!, - განაცხადა ფარულავამ.