ოპოზიცია ყოფილი მაღალჩინოსნის, გეკა გელაძის თანამდებობებიდან წასვლას მამუკა მდინარაძის გავლენების შესუსტებას უკავშირებს.

ოპოზიციის წარმომადგენლების შეფასებით, გელაძის სწრაფი დაწინაურება და შემდგომი ჩამოქვეითება კიდევ ერთხელ აჩენს კითხვებს „ქართულ ოცნებაში“ საკადრო გადაწყვეტილებების მიღების წესსა და ძალაუფლების გადანაწილებასთან დაკავშირებით.

 "ძლიერი საქართველოს" წევრი თაზო დათუნაშვილი გელაძის საკადრო გადაადგილებებს ბიძინა ივანიშვილის პირად კეთილგანწყობაზე დამოკიდებულ პოლიტიკურ სისტემას უკავშირებს. მისი შეფასებით, მაღალჩინოსნები თანამდებობებს გავლენიანი ჯგუფების მხარდაჭერის დაკარგვასთან ერთად ტოვებენ.

ქვის კარიერის გენერლის, ადიუტანტის კარიერაც ისევე თავგადასავლებით აღსავსე და რეაქტიული აღმოჩნდა, როგორც მდინარაძის შემთხვევაში იყო. რაღაც ან დაწინაურება რა იყო, ან დაქვეითება, ან საერთოდ მოშორება სისტემიდან? ეს კიდევ ერთხელ ნათლად წარმოაჩენს იმ ავტოკრატიულ და არაჯანსაღ ხასიათს, რომელსაც ატარებს საქართველოში ძალაუფლების ლოგიკა, რომელიც დაყრდნობილია იმაზე, ბატონი ივანიშვილი ვისდამი იქნება კეთილგანწყობილი და თუ დაკარგავს კეთილგანწყობას რომელიმე პოლიტიკური "ხელმძღვანელი" "ქართულ ოცნებას", მასთან ერთად კარგავს ნთელ იმ შლეიფს, რომელიც თითქოს სახელმწიფოს ემსახურებოდა, სინამდვილეში, კონკრეტული ერთი კლანის ინტერესებს ემსახურებოდნენ, როგორც გელაძე ემსახურებოდა მდინარაძის კლანის ინტერესებს, - ამბობს თაზო დათუნაშვილი. 

კლანურ დაპირისპირებასა და საკადრო წმენდაზე საუბრობს ენმ-ს ერთ-ერთი ლიდერი, ირაკლი ფავლენიშვილიც. მისი თქმით, ხელისუფლებიდან ეტაპობრივად ჩამოაშორეს კონკრეტულ პოლიტიკურ ჯგუფთან დაკავშირებული პირები, რაც, მისი შეფასებით, შიდა დაპირისპირების შედეგია.

ეს ფილმი უკვე ძალიან ბევრჯერ გვაქვს ნანახი, როგორ ხდება ხოლმე კლანურ ბრძოლაში წაგების შემდგომ კონკრეტული ჯგუფის განეიტრალება მთლიანად, როგორ ქმნიან ხოლმე მათთვის გარკვეულ თანამდებობებს ან გადაჰყავთ ხოლმე თითქოს სხვა თანამდებობაზე, აქვეითებენ და შემდგომ როგორ აშორებენ ხელისუფლებას და "ოცნებას".  ამიტომაც გასაგები იყო თავიდანვე ეს. ამ დროსაც იტყუებოდნენ, ამბობდნენ, თითქოსდა არანაირ კლანურ ბრძოლაშ წაგებასთან არ გვქონდა საქმე და საკადრო წმენდასთან, თუმცა ახლა გამოჩნდა, რომ ამ დაჯგუფების ყველა წევრი არის ჩამოშორებული პოლიტიკას და საბოლოო ჯამში, ეს კლანური ბრძოლა მთლიანად შეიწირავს ივანიშვილის მთლიან პარტიულ ორგანიზმს, - ამბობს ფავლენიშვილი. 

"თავისუფლების მოედნის" წევრი კახა ჩიქოვანი კი ყურადღებას სახელმწიფო უსაფრთხოების პრობლემებზე ამახვილებს. მისი შეფასებით, შსს და სუსი პოლიტიკური გავლენების ინსტრუმენტებად არის ქცეული, რაც ქვეყნის უსაფრთხოებასა და სახელმწიფო ინსტიტუტებს აზიანებს. 

თუ რატომ გაუშვეს გეკა გელაძე პენსიაში, ესეც არ არის ალბათ ჩვენთვის დიდი გამოცანა. რა თქმა უნდა, იმის გამო, რომ მას ბოლომდე არ ენდობოდნენ. ადამიანი იყო შს მინისტრი, სუსის უფროსი სულ რამდენიმე თვის განმავლობაში და შესაბამისად, მდინარაძის კადრს იქ არავინ გააჩერებდა.  თუ რა გამოწვევების წინაშე დგას დღეს სახელმწიფო, აი, ამ გარემოში, რომ სუსს, შსს-ს არანაირი ყურადღება არ ექცევა იმ მხრივ, რომ ის განვიტარდეს, გაძლიერდეს, ისინი გადაქცეულები არიან დღეს დღეს "ქართული ოცნების" პოლიტიკურ სტრუქტურებად და შესაბამისად, ეს ზიანს აყენებს საქართველოს სახელმწიფოებრიობას და მის ძლიერებას და უსაფრთხოებას, - ამბობს კახა ჩიქოვანი. 

• „პირველების“ ცნობით, გელა გელაძე შს მინისტრის მოადგილის პოსტის დატოვების შემდეგ, ნავთობისა და გაზის კორპორაციის სამეთვალყურეო საბჭოს წევრად ინიშნება.

• „შაბათის ეთერის“ ინფორმაციით, შს მინისტრის მოადგილედ დანიშვნის შემდეგ გელაძემ შვებულება აიღო, სამსახურში აღარ დაბრუნებულა და ბოლო რამდენიმე კვირაა პირადი დაცვის გარეშე გადაადგილდება.

•  მანამდე ის სახელმწიფო უსაფრთხოების სამსახურის (სუს) უფროსის თანამდებობას იკავებდა (2026 წლის 28 აპრილიდან 14 სექტემბრამდე), უფრო ადრე კი — შს მინისტრი იყო (2025 წლის 28 მაისიდან 2026 წლის 28 აპრილამდე).