მოლდოვაში გაზის ფასი 7-ჯერ გაიზარდა იმიტომ, რომ ბრიუსელის მითითებებს მიჰყვებიან - პაპუაშვილი

18.11.26 12:41
მოლდოვაში გაზის ფასი 7-ჯერ გაიზარდა იმიტომ, რომ ბრიუსელის მითითებებს მიჰყვებიან - პაპუაშვილი

 შალვა პაპუაშვილის მტკიცებით, მოლდოვაში გაზის ფასი 7-ჯერ გაიზარდა იმიტომ, რომ ბრიუსელის მითითებებს მიჰყვებიან.

 "რაც უფრო გაქებს ბრიუსელი, ე.ი შენი ხალხისთვის რაღაცას არასწორად აკეთებ! რაც უფრო მეტად გაგვაკრიტიკებს ბრიუსელი და მისი ელჩი, ე.ი. სწორად ვიქცევით და ჩვენი ხალხი მოგებაში იქნება" - თქვა დღეს მან. 

პაპუაშვილის განცხადებით, ევროკომისიამ საქართველოს შემთხვევაში ეკონომიკური ზრდის პროგნოზი გაზარდა, მოლდოვისა და უკრაინის შემთხვევაში კი შეამცირა. 

“უკრაინის შემთხვევაში გასაგებია და ომი ბევრ რამეს ხსნის. ხან ევროკავშირის ელჩი, ხან ევროკომისიის წარმომადგენელი ნიშნის მოგებით გვეუბნებიან ხოლმე, რომ მოლდოვა მეტ სიკეთეს მიიღებს, ვიდრე საქართველო. რაში გამოიხატება ეს სიკეთე?! დაბალი პროგნოზი, რომელიც 2%-ის გარშემო ჰქონდათ, ისიც კი დაუწიეს იმიტომ, რომ არასწორ რჩევებსა და მითითებებს აძლევენ და რაც მთავარია საკუთარი რჩევებით აზიანებენ მოლდოვას.

2021 წელს, მანამ სანამ უკრაინაში ომი დაიწყებოდა, მოლდოვაში 1 კუბური გაზი მომხმარებლისთვის 65 თეთრი ღირდა, ხოლო საქართველოში - 56 თეთრი. დღეს მოლდოვაში მომხმარებლისთვის 1 კუბური მეტრი - 3 ლარი და 65 თეთრი ღირს, ხოლო საქართველოში ისევ 56 თეთრია.

მოლდოვაში გაზის ფასი 7-ჯერ გაიზარდა იმიტომ, რომ ბრიუსელის მითითებებს მიჰყვებიან. ზრუნავენ არა იმაზე, რომ რაც შეიძლება იაფი ენერგომატარებლები და აქედან გამომდინარე დაბალი ფასები ჰქონდეთ, არამედ ზრუნავენ იმაზე, რომ როგორმე დადებითი შეფასებები მიიღონ ბრიუსელიდან.

აქედან მარტივი დასკვნა: - რაც უფრო გაქებს ბრიუსელი, ე.ი შენი ხალხისთვის რაღაცას არასწორად აკეთებ. ჩვენთვის ეს არის სწორედაც ტესტი. რაც უფრო მეტად შეგაქებს ბრიუსელი, უნდა დავსვათ კითხვა, რომ ეტყობა რაღაცას არასწორად ვაკეთებთ ჩვენი ინტერესებიდან გამომდინარე. რაც უფრო მეტად გაგვაკრიტიკებს ბრიუსელი და მისი ელჩი, ე.ი. სწორად ვიქცევით და ჩვენი ხალხი მოგებაში იქნება“, - განაცხადა შალვა პაპუაშვილმა.

მსგავსი სიახლეები