ქედს ვიხრი 9 აპრილს დაღუპულთა ნათელი ხსოვნის წინაშე - პრემიერი

09.04.21 10:59
ქედს ვიხრი 9 აპრილს დაღუპულთა ნათელი ხსოვნის წინაშე - პრემიერი

საქართველოს პრემიერ-მინისტრი, ირაკლი ღარიბაშვილი, 9 აპრილის ტრაგედიიდან 32-ე წლისთავს ეხმიანება. 

მისი თქმით, 9 აპრილი მუდამ სამშობლოსათვის თავგანწირვის და ამავე დროს, თავისუფლებისა და ერთიანობის სიმბოლოდ დარჩება.

დღეს ჩვენი ისტორიის უმნიშვნელოვანესი თარიღია. 1989 წლის 9 აპრილს ქართველმა ხალხმა ხმამაღლა განაცხადა ურყევი გადაწყვეტილება დამოუკიდებლობის აღდგენის შესახებ. ხალხის ნებისადმი უხეში დაპირისპირება - საბჭოთა ჯარის მიერ მშვიდობიანი მანიფესტაციის დარბევა იქცა გარდამტეხ მომენტად, რომელმაც განსაზღვრა დამოუკიდებლობის იდეის გამარჯვება და არა მხოლოდ საქართველოში, არამედ საბჭოთა კავშირის სხვა რესპუბლიკებშიც.
9 აპრილი მუდამ სამშობლოსათვის თავგანწირვის და ამავე დროს, თავისუფლებისა და ერთიანობის სიმბოლოდ დარჩება. ამიტომაც, დღეს გმირულად დაცემულთა სახელებს ტკივილით და ამავდროულად, სიამაყით ვიხსენებთ.
მთელ ჩვენს საზოგადოებასთან ერთად ქედს ვიხრი მათი ნათელი ხსოვნის წინაშე, ვინც საკუთარი თავდადებით სამშობლოს თავისუფლებისკენ გაკვალა გზა" - წერს პრემიერ-მინისტრი.