ვინც გაშმაგებით გვლანძღავნდა, იმ ხალხს, რა თქმა უნდა, პარლამენტის დარბაზში აუცილებლად ჩავხედავ თვალებში, მათ პასუხებს ყველა მოისმენთ! - ამის შესახებ პარტია ,,მოქალაქეების" ლიდერმა, ალეკო ელისაშვილმა,  განაცხადა. ელისაშვილი პარლამენტში შესვლის შესახებ ოპოზიციის გადაწყვეტილებაზე სოციალურ ქსელში კომენტარს აკეთებს.

ოპოზიციიდან ახლა თითქმის ყველა ამბობს, რომ მზადაა, შემოვიდეს პარლამენტში. ჩვენ რომ ვთქვით და შევედით, ლამის ჯვარს გვაცვეს. მაგრამ ჩვენ ჩვენი გადაწყვეტილება მივიღეთ და არ დავლოდებივართ სხვებს. იმიტომ, რომ ეს ქვეყანა გვიყვარს, იმიტომ, რომ ხალხის პრობლემების მოსაგვარებლად ვართ პოლიტიკაში და დავიწყეთ კიდეც უამრავ პრობლემაზე ლაპარაკიც და მათ მოგვარებაზე ზრუნვაც. იმიტომ, რომ უკვე ყავლგასული ბოიკოტით არ გვიწვალებია საქართველო და ამიტომ ტყუილუბრალოდ  გვლანძღეს ამ თვეების მანძილზე. ჰოდა, ვინც გაშმაგებით გვლანძღავნდა იმ ხალხს, რა თქმა უნდა, პარლამენტის დარბაზში აუცილებლად ჩავხედავ თვალებში! მათ პასუხებს ყველა მოისმენთ - წერს ალეკო ელისაშვილი.

დღეს პარლამენტში კიდევ ერთი ოპოზიციური პარტია ,,გირჩი" შევიდა. ოპოზიციის ნაწილი ამ ეტაპზე პარლამენტში შესვლაზე უარს აცხადებს, ნაწილი კონსულტაციების რეჟიმშია.