„კონსტრუქციული“ პოლიტიკოსების მიერ დოკუმენტზე ხელის მოწერა ხელისუფლებასთან შეთანხმებით მოხდა და ის „ნაციონალური მოძრაობის“ დისკრედიტაციას ემსახურებოდა, - ამის შესახებ სოციალურ ქსელში თაკო ჩარკვიანი წერს. „კანონი და სამართალის“ ლიდერი ფაქტს ამომრჩევლისთვის ზურგის შექცევად აფასებს და აღნიშნავს, რომ საპარლამენტო ბოიკოტის იდეა ამით მნიშვნელოვნად დაზარალდა.  

დიახ, კვლავ ვადასტურებ, რომ რიგი პოლიტიკოსების მიერ ცნობილ შეთანხმების დოკუმენტზე ხელმოწერა არის საკუთარი ამომრჩევლისთვის ზურგის შექცევა , რამაც დიდი და მნიშვნელოვანი ზიანი მიაყენა საპარლამენტო ბოიკოტის იდეას. ( რეალურ ფაქტებზე დაყრდნობით) დარწმუნებული ვარ, აღნიშნულ დოკუმენტზე ხელმოწერა ამ ჩვენი " კოსტრუქციული" პოლიტიკოსების მიერ განხორციელდა ხელისუფლებასთან შეთანხმებით ერთადერთი მიზნით, რომ მომხდარიყო ყველაზე მძლავრი ოპოზიციური გაერთიანების- " ნაციონალური მოძრაობის" დისკრედიტაცია- მარგინალიზაცია. გამომდინარე აქედან, კვლავ ვადასტურებ, რომ აბსოლუტურად დროული და პოლიტიკურად ადეკვატური გახლდათ მიხეილ სააკაშვილის მხრიდან საპასუხო, მყისიერი რეაგირება, გამჭრიახი და დროული სვლა- მოწოდება საკუთარი პარტიის მისამართით, რა თქმა უნდა მის მიერვე განცხადებაში მოყვანილი პირობების გათვალისწინების შემთხვევაში.
ზოგადად ეს არასახარბიელო ვითარება , დაბეჯითებით ვაცხადებ , გამოწვეულ იქნა ოპოზიციის უპრინციპო ნაწილის, რბილად რომ ვთქვათ, კონფორმისტული მოქმედებებით .....ჩემი პოზიცია აღნიშნულ საკითხთან დაკავშირებით უცვლელია!, -წერს ჩარკვიანი საკუთარ Facebook გვერდზე.