პარლამენტის თავმჯდომარემ, შალვა პაპუაშვილმა ხელი მოაწერა კანონპროექტს ფარულ მოსმენა-მიყურადებასთან დაკავშირებით, რომელსაც პრეზიდენტმა ვეტო დაადო. 

პარლამენტის თავმჯდომარემ თქვა, რომ არც პრეზიდენტის ვეტოში და არც ვენეციის კომისიის დასკვნაში საუბარი არ არის სამართლებრივ პრობლემებზე.

"როგორც იცით, პრეზიდენტმა ამ კანონთან დაკავშირებით, მიმდინარე წლის 23 ივნისს გამოიყენა ვეტო, რომელსაც მან პოლიტიკური ვეტო უწოდა, რითაც ხაზი გაუსვა, რომ მას არ ჰქონდა ამ კანონის მიმართ სამართლებრივი შენიშვნები, თუმცა, მისი მიღება პოლიტიკურად მიზანშეუწონლად მიაჩნდა, ვინაიდან ზოგიერთი ჯგუფის მხრიდან ესმოდა კრიტიკა ამ კანონის განხილვის პროცესის ტემპის და დაინტერესებული მხარეთა ჩართულობის შესახებ.

ამის შემდეგ პრეზიდენტმა მიმართა ვენეციის კომისიას, რათა მას მიეწოდებინა საკუთარი მოსაზრებები ამ კანონთან დაკავშირებით. 26 აგვისტოს ვენეციის კომისიამ გამოაქვეყნა მისი მოსაზრებები ამ კანონთან დაკავშირებით. ისევე, როგორც პრეზიდენტის ვეტოში, ვენეციის კომისიამაც ვერ დაადგინა წინააღმდეგობა ადამიანის უფლებებთან დაკავშირებულ რომელიმე ევროპულ თუ საერთაშორისო სტანდარტთან. ამასთან, ვენეციის კომისიამაც, საქართველოში ცალკეულ აქტორებთან მის გასაუბრებაზე დაყრდნობით, გაიმეორა მოსაზრება კანონის მიღების ტემპთან და დაინტერესებულ მხარეთა ჩართულობასთან დაკავშირებით. ეს არის ის აღქმა, რის ჩამოყალიბების მცდელობაც, სამწუხაროდ, ამ კანონის მიმართ იყო", - თქვა პაპუაშვილმა. 

პარლამენტის თავმჯდომარის თქმით, კანონპროექტი დადგენილი წესით, არადაჩქარებული სახით განიხილეს და პროცესში ჩართვის შესაძლებლობა ჰქონდათ "რელევანტურ სახელმწიფო უწყებებს, ყველა დაინტერესებულ არასამთავრობო ორგანიზაციას და ყველა დაინტერესებულ საერთაშორისო აქტორს".