სააკაშვილი არის კრიმინალი, უმძიმესი ქცევების მქონე, უპასუხისმგებლო ადამიანი - ამის შესახებ კულტურის მინისტრმა ,,საზოგადოებრივი მაუწყებლის" ეთერში განაცხადა.

თეა წულუკიანმა უდანაშაულობის პრეზუმცია დაარღვია, როცა მესამე პრეზიდენტი კრიმინალად მოიხსენია და ქართულ ციხეში დიდი ხნით ჩასმით დაემუქრა.

მინდა, მადლობა გადავუხადო სამედიცინო პერსონალს, რომელიც ყველაფრის მიუხედავად, ზრუნავს მიხეილ სააკაშვილის, ამ კრიმინალის, ჯანმრთელობაზე.

ეს არის ძალიან დიდი შრომა, როცა ასეთი უმძიმესი ქცევების მქონე, უპასუხისმგებლო ადამიანთან გაქვს საქმე, ამიტომაც ამ ადამიანებს ეკუთვნით ძალიან დიდი მადლობა.

....  აი, ახლა თუ მიხეილ სააკაშვილი მისმენს, ვეტყვი, რომ ვერაფერსაც დაგვაკლებ. შენ ხარ კრიმინალი, ზიხარ იქ, სადაც უნდა იჯდე და კეთილი ინებე, მოიხადე ის სასჯელი, რომელიც მოგისაჯა საქართველოს დამოუკიდებელმა, მიუკერძოებელმა და რეფორმირებულმა სასამართლომ. ეს არის ჩვენი კანონის, პატივისცემა და აღსრულება. - თქვა წულუკიანმა.

კულტურის მინისტრი სააკაშვილის სიის საკითხსაც შეეხო და განაცხადა, რომ ,,ოცნებას" ეს საკითხი არ აღელვებს.

ეს სია შეუძლიათ შეადგინონ, წაიკითხონ და შეინახონ - ამბობს წულუკიანი.

რაც შეეხება სიას, ჩვენ მაშინ არ შევუშინებივართ ე.წ. სიას, როცა გვეუბნებოდნენ – დაგიჭერთ, დაგაპატიმრებთ, ამოგალპობთ ციხეში, ხელი არ აუკანკალდებოდა არავის, როცა ამას გვეუბნებოდნენ, ქართველ ხალხს „ნაციონალური მოძრაობის“ წევრები და მათი კრიმინალი ბელადი, რომელიც ახლა სრულიად დამსახურებულად ბრძანდება ორპალატიან საკანში და პრეტენზიები აქვს.

მაშინ არ შევუშინებივართ, რადგან ვიცოდით, რომ ვიბრძოდით სიმართლისთვის. ახლა ეს სიები შეუძლიათ, შეადგინონ, მერე კარგად წაიკითხონ და შეინახონ თავიანთ რომელიმე უჯრაში. ჩვენ მიჩვეული ვართ უკვე ამ სიების შედგენას, რომ ოცნება აქვთ და ნატრულობენ, რომ დაბრუნდებიან ხელისუფლებაში, დაიჭერენ ყველა მინისტრს, ექთნებს, ექიმებს, ამოგვალპობენ ყველას ერთად ციხეში.

დამღლელია უკვე ამდენი ვითომ მუქარის მოსმენა, რომ ჩვენ დავბრუნდებით და ყველას ამოგალპობთ ციხეში  – განაცხადა წულუკიანმა.