"როგორ მოგმართოთ ბატონო შალვა, ბატონო სპიკერო, თუ ბატონო აგენტო? ყოფილი დამსახურებული აგენტი, მე ასე მოგმართავთ, რადგან თქვენც იმ წიაღიდან მოდიხართ, რომელსაც ახლა აგენტად გამოცხადებას უპირებთ" - ასე მიმართა  „ლელოს“ ერთ-ერთმა ლიდერმა ანა ნაცვლიშვილმა პარლამენტის თავმჯდომარეს შალვა პაპუაშვილს პლენარულ სხდომაზე.

ნაცვლიშვილის თქმით, კანონს ხელს საქართველოს პრეზიდენტი არ მოაწერს და პირადად შალვა ხაჭაპურიძეს მოუწევს "ხალხის ძალის" კანონზე ხელმოწერა.

ოპოზიციონერი დეპუტატის შეფასებით, პაპუაშვილი რუსული კანონის მიღებით, საკუთარ წარსულს გადახაზავს.

ნაცვლიშვილის შეფასებით, აღნიშნული კანონპროექტი საქართველოში სამოქალაქო საზოგადოებას აუქმებს.

ბატონო შალვა, ძალიან კარგად იცით, რომ თითოეული თეთრი, რომელსაც არასამთავრობო ორგანიზაციები, მედიები, აქტივისტთა ჯგუფები და მოქალაქეები იღებენ საქართველოს სტრატეგიული პარტნიორებისგან, რომლისგანაც თქვენ, ბიუჯეტში იღებთ მილიონობით თანხას და იგივე პარტნიორები აფინანსებენ ჩვენს თავდაცვას, ჯანდაცვას, განათლებას, გელათის რეაბილიტაციას და ა.შ. აი, ის თანხები იხარჯება გამჭვირვალედ და როგორც დონორები, ისევე სახელმწიფო სრულ ინფორმაციას ფლობს, ვისგან , მოდის ეს თანხები და შემირცხვენია იმ ქვეყნის უსაფრთხოება, რომელსაც ჰგონია, რომ მის ქვეყანაში რომელიმე ქვეყანა აგენტურულ ქსელს აბამს და იმას ელოდება, რომ აგენტი მივა და დაწერს აგენტი ვარო. ეს შეურაცხყოფაა საქართველოს უსაფრთხოების სამსახურებისთვის. თუ ასეთი რამე ხდება, თუ გავლენების ქსელია გაბმული და უსაფრთხოების სამსახური ელოდება, ვინ როდის გამოიცხადებს თავს აგენტად, სირცხვილია ეს.

თქვენ ძალიან კარგად იცით, რომ ეს გამჭვირვალობის კანონი არ არის, ეს არის კანონი, რომელიც აუქმებს სამოქალაქო საზოგადოებას ამ ქვეყანაში. ჩვენ არ გვჭირდება გამოცნობა და თეორიული ექსპერიმენტი. ჩვენ ვნახეთ რუსეთში ამ კანონის შედეგები. ბატონო შალვა, უკვე ხვდებით, რომ ამ კანონს ხელს არ მოაწერს საქართველოს პრეზიდენტი და პირადად თქვენი სახელის და გვარის დაფიქსირება მოგიწევთ ამ კანონის ქვეშ, რითაც გადახაზავთ საკუთარ წარსულს, იმ წარსულს, რომელიც გაცილებით უკეთ გამოიყურება, ვიდრე „ქართულ ოცნებაში“ გადმობარგების შემდეგ აკეთებთ. ამაზე იფიქრეთ“, - განაცხადა ანა ნაცვლიშვილმა.