ირაკლი ღარიბაშვილი ამბობს, რომ საქართველო რეგიონში საავიაციო ჰაბი უნდა გახდეს. პრემიერის თქმით, მთავრობა ორ ვერსიაზე მსჯელობს:  ძველი აეროპორტის განახლება და ახალი აეროპორტის აშენება.

როგორც დღევანდელი მთავრობის სხდომიდან გაირკვა, მშენებლობის ადგილად ვაზიანის აეროდრომის ტერიტორია განიხილება.  

დღეს გვაქვს საშუალებაც, გამოცდილებაც, და რაც მთავარია, მიზანი, რომ გავხდეთ რეალურად რეგიონში საავიაციო ჰაბი. ჩვენ არაერთხელ გვითქვამს, რომ ქვეყანას აქვს ამის პოტენციალი. სწორედ ამ მიზნით ჩვენ დავიწყეთ მუშაობა, რამდენიმე თვეა აქტიურად მუშაობს ეკონომიკის სამინისტრო. მინდა, მოკლედ შევაფასო, დღეს არსებული აეროპორტი, ალბათ დამეთანხმებით, რომ არ არის დამაკმაყოფილებელი და ვერ უძლებს, ვერ პასუხობს იმ გამოწვევებს, ჩვენს ამბიციურ მიზნებს.

მივედით იმ დასკვნამდე, რომ აუცილებელია, თუ გვინდა 20, 30, 50 და თუნდაც 100-წლიანი პერსპექტივით ქვეყანაზე ვიზრუნოთ და ჩვენ მომავალ თაობებს დავუტოვოთ სათანადო ინფრასტრუქტურა და გამართული აეროპორტი, აუცილებელია ახალი ლოკაციის შერჩევა. ასეთი ადგილი, თბილისში, შეიძლება ითქვას იდეალური ამ მიზნით არის ვაზიანის ყოფილი აეროდრომი.

ამიტომ, ჩემი დავალებით, ბოლო რამდენიმე თვეა ეკონომიკის სამინისტრო აქტიურად მუშაობს ამ მიმართულებით, ჩვენი სურვილია  ამ პროექტის შესასწავლად ჩამოვიყვანოთ საუკეთესო მშენებლები, არქიტექტორები, ჯერ კარგად შევისწავლოთ ეს ადგილი და ამის შემდეგ მივიღოთ საბოლოო გადაწყვეტილება"- თქვა ღარიბაშვილმა.