პოლიტიკური ჯგუფის „ევროოპტიმისტების" ხელმძღვანელი რომან გოცირიძე სოციალურ ქსელში The Killers-ის სოლისტის მიერ სცენაზე რუსი დრამერის აყვანას  და ამის გამო გამოწვეულ პროტესტს ეხმაურება.

მისი თქმით, გაჩნდა ბოლშევიკური მოწოდებები, რომ ხელისუფლების დაფინანსებულ კონცერტებზე არ უნდა წავიდეს ჭეშმარიტად ოპოზიციურად განწყობილი მოქალაქე.

მისივე თქმით, კონცერტები ხალხის ფულით არის დაფინანსებული და „სისულელეა ვინმესადმი საყვედური, რატომ დადის კონცერტებზე“.

გოცირიძე წერს, რომ ამ ლოგიკით, მაშინ ხელისუფლების დაფინანსებული პენსიაც არ უნდა აიღოს ოპოზიციონერმა და მეტროშიც ორჯერ მეტი უნდა გადაიხადოს, რადგან ხელისუფლების მიერაა სუბსიდირებული.

„ხელისუფლების დაფინანსებულ კონცერტებზე არ უნდა წავიდეს ჭეშმარიტად ოპოზიციურად განწყობილი მოქალაქეო, ახალი ბოლშევიკური მოწოდებები გაჩნდა. ყალბი მორალიზმია ეს. ეს კონცერტები ხალხის (ბიუჯეტის) ფულითაა დაფინანსებული (რაც ცუდია) და ზედ ჩვენი ყოფიდან გამომდინარე, საკმაოდ დიდ ფულსაც ამატებენ ადამიანები. ეს არაა პარტიული ღონისძიება, ესწრება თუ არა მას რომელიმე პარტიული საძულველი პირი. ხელისუფლების დაფინანსებული პენსიაც არ უნდა აიღოს ოპოზიციონერმა და მეტროშიც ორჯერ მეტი უნდა გადაიხადოს, რადგან ხელისუფლების მიერაა სუბსიდირებული? მაშინ არც სუბსიდირებული ღვინო უნდა დალიოს და არც თეატრებში იაროს. სისულელეა ვინმესადმი საყვედური, რატომ დადის კონცერტებზე. ამ ხელისუფლების მომხრე მწერლების წიგნებიც არ წავიკითხოთ, მაგალითად, ჭაბუა ამირეჯიბის? არც ლაშა ტალახაძის გამარჯვება გაგვიხარდეს? ძალიან ბოლშევიკური მიდგომაა,“ - წერს რომან გოცირიძე.