EU-ს გაფართოება არა ვადების, არამედ ნების, ასევე EU-ს და პარტნიორი ქვეყნების მხრიდან დაპირების შესრულების საკითხია - ვარჰეი
"ევროკავშირის გაფართოება არა ვადების, არამედ ნების, ასევე EU-ს და პარტნიორი ქვეყნების მხრიდან დაპირების შესრულების საკითხია," - ეს განცხადება ევროკავშირის სამეზობლო და გაფართოების საკითხებში ევროკომისარმა ოლივერ ვარჰეიმ გააკეთა.
ოლივერ ვარჰეი შარლ მიშელის განცხადებას გამოეხმაურა, რომელმაც ევროკავშირის გაფართოების შესაძლო თარიღად 2030 წელი დაასახელა.
თუკი ეს არის საბჭოს გზავნილი, რომ საბჭოს სურს, გადადგას საბოლოოდ დიდი ნაბიჯი, რათა მოხდეს გაფართოება, ეს მისასალმებელი ამბავია. რა თქმა უნდა, ევროკომისია ყოველთვის მზადაა, წარადგინოს ინიციატივა, რომელიც ჩვენ იქამდე მიგვიყვანს. არ ვფიქრობ, რომ ეს არის ვადების საკითხი, ვფიქრობ, ეს უფრო ნებისა და რა თქმა უნდა, დაპირების შესრულების საკითხია – ევროკავშირის მხრიდან, ასევე დასავლეთ ბალკანეთში ჩვენი პარტნიორი ქვეყნების ან სხვა სამი კანდიდატი ქვეყნის მხრიდან.
ევროკომისია მზად არის, წარადგინოს ინიციატივა ამ მიზნის მისაღწევად და ამას თქვენ უკვე ოქტომბერში ნახავთ, როდესაც ჩვენ გვსურს, წარვადგინოთ არსებითი წინადადებები, მათ შორის ზრდის გეგმა, რომელიც პრეზიდენტმა უკვე განმარტა ბრატისლავაში, რომ ჩვენ დავაჩქარებთ არა მხოლოდ ინსტიტუციურ, არამედ რეალურ ინტეგგრაციასაც. ევროკავშირში ხალხისა და ეკონომიკების რეალურ ინტეგრაციას“, – განაცხადა ოლივერ ვარჰეიმ.
