ოკუპირებული აფხაზეთის დე ფაქტო ვიცე-პრემიერი სერგეი პუსტოვალოვი თანამდებობიდან გადააყენეს. პუსტოვალოვის გადაყენების შესახებ განკარგულებას დე ფაქტო პრეზიდენტმა ასლან ბჟანიამ პირველ სექტემბერს მოაწერა ხელი. პუსტოვალოვი 2020 წლიდან მუშაობდა დე ფაქტო ვიცე-პრემიერად.

მანამდე ოკუპირებული აფხაზეთის დე ფაქტო ლიდერის პრესსამსახურმა დაადასტურა ინფორმაცია ე.წ. პრეზიდენტის ადმინისტრაციის უფროსის ჯანსუღ ნანბას თანამდებობიდან გათავისუფლების შესახებ. განკარგულების თანახმად, გადაწყვეტილება მიღებულია ნანბას სხვა თანამდებობაზე გადასვლასთან დაკავშირებით. 

4 სექტემბერს, აფხაზური ტელეგრამ-არხებით გავრცელდა ცნობები, რომ თანამდებობიდან გადადგა დე ფაქტო რესპუბლიკის საგარეო საქმეთა მინისტრი ინალ არძინბა. როგორც „ინტერფაქსი“ წერს არძინბას გადადგომა დაუდასტურა წყარომ, თუმცა, ე.წ. პრეზიდენტ ბჟანიას არძინბას განცხადება, ჯერჯერობით, არ დაუკმაყოფილებია.