,,მივესალმებით საქართველოს არჩევანს, რომ მისი მომავალი დაუკავშიროს ევროკავშირსა და ნატო-ს" – ამის შესახებ ამერიკელმა სენატორმა, ჯინ შაჰინმა, პრესკონფერენციაზე განაცხადა.

პრესკონფერენციაზე ჯინ შაჰინმა აღნიშნა, აშშ მიესალმება 19 აპრილის შეთანხმებას, რომელიც შედგა უმრავლესობასა და ოპოზიციურ პარტიებს შორის.

ეს არის პირველი ვიზიტი აშშ-სთვის პოსტკოვიდურ გარემოში და ეს ვიზიტი სწორედ საქართველოში განვახორციელეთ იმ დიდი მნიშვნელობის გამო, რომელსაც ვანიჭებთ საქართველოს და საქართველოსთან პარტნიორობას. დღეს გვქონდა შესაძლებლობა, შევხვედროდით პრემიერ-მინისტრს, პარლამენტის სპიკერს, პარლამენტის სხვა წევრებს. საღამოს გვექნება შეხვედრა ოპოზიციის წარმომადგენლებთან, ხოლო შუადღისას გვქონდა შეხვედრა „ქართული ოცნების“ ხელმძღვანელებთან.

ერთ-ერთი, რაც გვესმის ყველა შეხვედრის დროს, გახლავთ ის, რომ საქართველო საკუთარ მომავალს ხედავს დასავლეთში და დასავლეთთან ერთად ევროატლანტიკური ინტეგრაციის გზაზე ევროკავშირის წევრად.

მივესალმებით 19 აპრილის შეთანხმებას, რომელიც შედგა უმრავლესობასა და ოპოზიციურ პარტიებს შორის და რომლის ფარგლებშიც გადაწყდა, რომ მხარეები ერთობლივად იმუშავებენ საარჩევნო რეფორმაზე, სასამართლო გარემოს გაუმჯობესებასა და სხვა საკითხებზე, რომელიც მნიშვნელოვანია ქვეყნისთვის. ამასთან, მხარს ვუჭერთ რეფორმებს და მათ შემდგომ განხორციელებას, რომლებიც მნიშვნელოვანია საქართველოს მოქალაქეებისთვის და მათი საჭიროებებისთვის. მივესალმებით ასევე საქართველოს არჩევანს, რომ მისი მომავალი დაუკავშიროს ევროკავშირსა და ნატო-ს“, – განაცხადა ჯინ შაჰინმა.

ამერიკელი სენატორები საქართველოში გუშინ ჩამოვიდნენ. ჯინ შაჰინი და რობერტ პორტმანი დღის პირველ ნახევარში მესამე სექტორის წარმომადგენლებს შეხვდნენ, მოგვიანებით კი - საქართველოს პრემიერსა და პარლამენტის თავმჯდომარეს. საღამოს კი იგეგმება სენატორების შეხვედრა ოპოზიციასთან.