"ბოლო პერიოდში ზედმეტი დოზით შევედით ევროპაში, ამიტომ ტალახში გორაობის ინსტრუქცია მოუვიდათ ჩრდილოეთიდან", - ასე ეხმაურება ყოფილი სახალხო დამცველი, ნინო ლომჯარია "ოცნების" მიერ რუსული კანონის ხელახლა დაინიცირებას.

ყოფილი ომბუდსმენი სოციალურ ქსელში წერს, რომ ევროპიდან საქართველოში ფული გაუმჭვირვალედ არ შემოდის.

"რატომ დააბრუნეს “რუსული კანონი”? ქართულ ოცნებას” უნდა “უცხოური ძალის ინტერესების გამტარებელი ორგანიზაცია” დაარქვას ყველას, ვინც საქმის კეთებისთვის ფინანსურ მხარდაჭერას იღებს ევროპიდან. ასეთ კანონებს რა მოჰყვება, რუსეთის მაგალითზე შეგვიძლია ვნახოთ თვალნათლივ.

როგორც ჩანს, ბოლო პერიოდში ზედმეტი დოზით შევედით ევროპაში (სტატუსი მოგვანიჭეს, ევრო 2024-ზე გავედით) ტალახში გორაობის ინსტრუქცია მოუვიდათ ჩრდილოეთიდან.

არავითარი გაუმჭვირვალე და საფრთხის შემცველი ფული ევროპიდან საქართველოში არ მოდის, ყველაფერი ხდება საგადასახადო რეგისტრაციის, საბანკო გადარიცხვების, გადასახადების დეკლარირების და ა.შ. გზით." - წერს ლომჯარია.

შეგახსენებთ, რომ საპარლამენტო უმრავლესობა რუსულ კანონს პარლამენტში კვლავ დააინიცირებს.

ამის შესახებ საპარლამენტო უმრავლესობის ლიდერმა, მამუკა მდინარაძემ პარტიის ოფისში გამართულ ბრიფინგზე განაცხადა.