„ზუსტად ვიცი, რამდენიმე საგრძნობლად მნიშვნელოვანი გარიგება ამ ეტაპზე დაპაუზებულია“, - ამის შესახებ საქართველოში დიდი ბრიტანეთის ელჩმა, მარკ კლეიტონმა გადაცემა "ანალიტიკასთვის" მიცემულ ინტერვიუში განაცხადა.

ელჩის თქმით, ინვესტორ ებს აშინებთ ძალადობა და დაშინების ფაქტები და ამბობს, რომ ბრიტანელი ინვესტორები უყურებენ, რა ხდება ქვეყანაში - "შეიძლება თანხა საერთოდ გაიტანონ ამის შემდეგ". 

იცით პასუხი ამ კითხვაზე – დიახ, ეს აბსოლუტურად გადამწყვეტია. ეს საკითხი თქვენს მთავრობასთანაც დავსვი. გაერთიანებული სამეფო საქართველოში ერთ-ერთი უმსხვილესი ინვესტორია. ეს რიცხვები ცვალებადია, მაგრამ – ფაქტია, თქვენი უმსხვილესი ბანკები, კომპანიები ლონდონშია დალისტული, სხვა ბრიტანული ინვესტიციებიც არის ქვეყანაში – საინვესტიციო მხარეს საქართველოში მნიშვნელოვანი მოთამაშეები ვართ. ამ ბრიტანული კომპანიების ღირებულება ასეულ მილიონობით ფუნტით შემცირდა იმ მღელვარების და არასტაბილურობის ფონზე, რაც რუსულმა კანონმა მოუტანა საქართველოს. ყველაზე მეტად რაც აწუხებთ ინვესტორებს – ძალადობის და დაშინების ფაქტებია.

ჩვენ დავგმეთ ასეთი ქმედებები, მაგრამ ბრიტანელი ინვესტორები, ინსტიტუციური ინვესტორები უყურებენ, რა ხდება ქვეყანაში, ისინი საკუთარ გადაწყვეტილებებს იღებენ და შეიძლება თანხა საერთოდ გაიტანონ ამის შემდეგ. ყველა შთამბეჭდავი პერსპექტივის მიუხედავად, საქართველო ჯერ კიდევ მცირე ზომის ბაზარია. მსხვილ ინვესტორებს არ ჰყავთ იმ ტიპის ბაზრის სპეციალისტები, რომლებიც ძირეულად შეისწავლიან საქართველოს – როგორც თქვენ იცით, როგორც მე გავიგე ამ 4 წლის მანძილზე – როგორ აფასებენ ისინი ინვესტირების შესაძლებლობებს? უყურებენ პოტენციურად საინტერესო კომპანიების ფინანსურ ინფორმაციას და შემდეგ, უყურებენ საერთაშორისო პრესას, „გარდიანს“, „ეკონომისტს“, დღეს საქართველო კარგად არ გამოიყურება საერთაშორისო მედიაში. ისინი კითხულობენ არასტაბილურობის, ძალადობის, სამოქალაქო საზოგადოების წარმომადგენლების დაშინების შესახებ. შედეგად, ისინი უფრთხილდებიან თავიანთ ინვესტიციებს“, - განაცხადა ელჩმა.

ყველაზე მძიმე მთელ ამ ამბავში ის გარიგებებია, რომლებიც შეიძლება შემდგარიყო და არ შედგა - ამბობს ელჩი და აცხადებს, რომ საქართველოში არსებულ მდგომარეობას საერთაშორისო მედია პოზიტიურად არ აღწერს. 

მხოლოდ ამდენად გულუხვი შემიძლია ვიყო ამ შეფასებაში. ფეხბურთს მიღმა, საქართველოს გაშუქება საერთაშორისო მედიაში პოზიტიური არ არის. ამას აქვს გავლენა. და ეს მე მაწუხებს. მაწუხებს, როგორც საქართველოს მხარდამჭერს, როგორც გაერთიანებული სამეფოს ელჩს საქართველოში, მაწუხებს, როგორც გავლენა ბრიტანულ კომპანიებზე. ყველაზე მძიმე მთელ ამ ამბავში ის გარიგებებია, რომლებიც შეიძლება შემდგარიყო და არ შედგა", - თქვა მან.

მარკ კლეიტონი თავს იკავებს დააკონკრეტოს, თუ რომელი გარიგებები დაპაუზდა.

ზუსტად ვიცი, თუმცა დეტალებში ვერ შევალ, რამდენიმე საგრძნობლად მნიშვნელოვანი გარიგების შესახებ – ყველაზე რბილად რაც შეიძლება ამ ეტაპზე ითქვას ის არის, რომ ისინი დაპაუზებულია. არა მხოლოდ იმ რისკების გამო, რაც უკვე მოხდა, არამედ იმ რისკების გამოც, რაც შეიძლება ოქტომბრის არჩევნებს მოჰყვეს“, - თქვა ელჩმა.