სკანდალური ინტერვიუ ადამიანთან, რომელიც წლების განმავლობაში ბიძინა ივანიშვილთან მუშაობდა - გიორგი ბაჩიაშვილი, რომელიც "ქართული ოცნების" საპატიო თავმჯდომარეს კარგად იცნობს, ნოდარ მელაძისთვის მიცემულ ექსკლუზიურ ინტერვიუში დღემდე უთქმელ ამბებს პირველად ყვება. 

თანაინვესტირების ფონდის ხელმძღვანელი ბიძინა ივანიშვილს "თაღლითს" უწოდებს, მის ქველმოქმედებას კი "შირმას". 

გიორგი ბაჩიაშვილი საუბრობს მივანიშვილის დამოკიდებულებაზე ეკლესიასა და რელიგიასთან. 

მთავრობა მარიონეტული ინსტრუმენტია ივანიშვილის ხელში - ამბობს ბაჩიაშვილი "ტვ პირველისთვის" მიცემულ ექსკლუზიურ ინტერვიუში.

გიორგი ბაჩიაშვილი ივანიშვილზე, „კრედიტ სუისის“ დავაზე და „გლობალურ ომის პარტიაზე“ -  tvpirveli.ge ნოდარ მელაძის ექსკლუზიურ ინტერვიუს სრულად გთავაზობთ: 

 ბიძინა ივანიშვილის კრიპტოვალუტის მითვისების საქმე და ივანიშვილის შეცვლილი ჩვენება: 

გიორგი ბაჩიაშვილი: მე მაქვს ნამდვილად ბევრი ინფორმაცია, რომელიც ქართველმა ხალხმა აუცილებლად უნდა იცოდეს, სანამ გააკეთებს ქვეყნისათვის ასეთ კრიტიკულ არჩევანს. რაც შეეხება ჩემს საქმეს, ეს საქმე დღეს არ არის მნიშვნელოვანი.

ივანიშვილმა მოახერხა და ისეთი საოცრება, ზღაპარი შეთხზა, რომ თავისივე პროკურატურა შოკშია. არ იციან, ამ საქმისგან რა უნდა გამოძერწონ. ადამიანმა რა დამაბრალა, რომ მე ჩემი კომპანიით ავიღე "ქართუ ბანკში" სესხი. ჩემივე პირადი თანამონაწილეობა მქონდა ამ სესხში 30$. ეს სესხი დავფარე წელიწადში და რამდენიმე თვეში. ასევე ბანკის დირექტორმა გარკვეული თანხა მოითხოვა ზემოდან დამატებითი რისკის ასანაზღაურებლად, ეს თანხაც გადახდილი იყო დაახლოებით წელიწადში და რამდენიმე თვეში. ამის შემდეგ, 6-7 წლის მანძილზე საერთოდ ხსენებაც არ ყოფილა არაფრის და ახლა ივანიშვილი ამბობს, რომ ეს სესხი კი არ ყოფილა, რომ ეს იყო თავიდან ბოლომდე მისი ბიზნესი და რომ მე ამ საქმის შესრულებაში არც გასამრჯელო უნდა ამეღო, არც ანაზღაურება და არც არანაირი წილი არ მეკუთვნოდა.

იმის შემდეგ, რაც მე წარვადგინე მტკიცებულებები პროკურატურაში. (მატერიალური მტკიცებულებები, ანუ, უტყუარი მტკიცებულებები ამ საქმეში არის, მხოლოდ და მხოლოდ, ჩემს სასარგებლოდ, მათ შორის, ჩანაწერი). ამის შემდეგ, ოთხი თაბახი ზღაპრების შემდეგ, მას მოუწია 8 თაბახი დაეწერა ზემოდან, რომ თურმე ჩვენ თავიდან სხვა მოლაპარაკება გვქონია და მერე ერთ დღეში ივანიშვილმა შეცვალა და ეს ბიზნესი უცბად მისი გახდა.

• ახალი ჩვენება მისცა ივანიშვილმა, მეორე ჩვენება, მას შემდეგ, რაც გაიგო, რომ პროკურატურაში ჩანაწერი მივიტანე. ამ ჩვენებაში თავდაყირად აყენებს თავის პირად ჩვენებას და ამბობს, რომ როგორც გიორგი ამბობს, რომ თავიდან ყველაფერი ასე იყო მართლაო, დამავიწყდა თავიდან ამ ყველაფრის თქმა, მოყოლაო, თავიდან მნიშვნელოვანი არც იყოო, მაგრამ ბოლო მომენტში გადავწყვიტე, რომ შემეცვალა, სულ თავდაყირა დავაყენე ყველაფერი და ჩემი გახდა ის პროექტი, რომლითაც ბაჩიაშვილი იყო მოსულიო. 

ნოდარ მელაძე: რატომ გაგიბრაზდათ ივანიშვილი?

გიორგი ბაჩიაშვილი: ივანიშვილისთვის კარგი თანამშრომელი და კარგი გუნდის წევრი ნიშნავს კარგ მარიონეტს. ის ამ მარიონეტებს ცვლის, რასაც უნდა უკეთებს, მაგრამ როგორც კი, ამ მარიონეტს რაღაც საკუთარი აზრი უჩნდება, ან ბრმად არ მიყვება ივანიშვილის ლოზუნგებს და აზროვნებას, ის ხდება ან ცუდი ადამიანი, ან ქვეყნის მტერი, ან მოღალატე, ან აგენტი და ა.შ.. 

ჩემ შემთხვევაშიც ზუსტად ეს იყო - მან უბრალოდ დაინახა, რომ მე არ ვიყავი მისი არც მარიონეტი და არც მისი საკუთრება. 2019 წელს რომ წავედი, დავიწყე პირადი საინვესტიციო საქმიანობა. რადგან მე ამ კაცთან მომავალს ვერ ვხედავდი და ვერც დავინახავდი.  (სხვათა შორის, 17 წლიდან გარკვეულ ბიზნესს ყოველთვის ვეწეოდი. ეს იქნებოდა საინვესტიციო, თუ ნებისმიერი სხვა სახის).

ბარგი ჩავალაგე და წავედი, მთლად ასე არ იყო. მე იმ დროისთვის ხელმძღვანელობდი ივანიშვილისთვის თავის ცხოვრებაში ყველაზე მნიშვნელოვან ფინანსური პრობლემის გადაწყვეტას. მე ვიყავი ის ადამიანი, ვინც აღმოაჩინა საერთოდ Credit Suisse-სში თანხის გაფლანგვა, ყოველ შემთხვევაში ივანიშვილის მხარეს, Credit Suisse-სში არ ვიცი, როდის აღმოაჩინეს. მე ვიყავი ის ადამიანი, რომელმაც შეკრიბა საერთაშორისო იურისტების არმია და მე ვხელმძღვანელობდი არმიას. მე მქონდა ყველა დეტალი ამ საქმის გარშემო და მე ვიყავი მთავარი მოწმე ორივე სასამართლოზე. შესაბამისად, შეიძლება ითქვას, რომ იმ დროისთვის მე ვხელმძღვანელობდი ივანიშვილის ცხოვრებაში ყველაზე მნიშვნელოვან ფინანსურ საქმეს. მე ეს არ მივატოვე, მე მას პირობა მივეცი, რომ ეს ჩემი პროფესიული მოვალეობა იყო, ეს ივანიშვილის სიყვარულით არ გამიკეთებია. ეს იყო ჩემი დაწყებული საქმე და მე საქმე ბოლომდე ისე მივუყვანე, რომ ყველა სასამართლოში ყველა პუნქტი, რომელზეც ჰქონდა ნაჩივლები, აბსოლუტურად ყველა პუნქტი დააკმაყოფილა სასამართლომ - ბერმუდას და სინგაპურის სასამართლომაც. შესაბამისად, მე ჩემი პროფესიული და მორალური ვალდებულებაც ყველანაირი ძალიან კაცურად და ბოლომდე შევასრულე. მე არცერთი საქმე არ მივუტოვე, ფონდშიც ძალიან ძლიერი და პროფესიონალური გუნდი დავუტოვე, რომლითაც მე ვამაყობ სათითაოდ თითო ადამიანით, რომელიც თანაინვესტირების ფონდში მუშაობს. Credit Suisse-სის საქმე ბოლომდე მივიყვანე ისე, რომ მსოფლიოში უდიდეს ფინანსურ ინსტიტუტს 10-0 მოვუგე. 

ნოდარ მელაძე: როგორ ფიქრობთ, რატომ გადაგეკიდათ ბიძინა ივანიშვილი? 

გიორგი ბაჩიაშვილი: მე უბრალოდ ივანიშვილის გარემოცვაში ვიყავი ძალიან ცუდი მაგალითი ადამიანის, რომელსაც აქვს თავისი აზრი. მე ვიყავი ერთადერთი ივანიშვილის გარემოცვაში, სხვა არავინ არ ყოფილა, ვინც უკრაინის ომის დაწყებისას აქტიურად, თავის სოციალურ მედიაში, დავიწყე აქტიურად რუსეთის აგრესიის დაგმობა და უკრაინის მხარდაჭერა. ესეც ვერ აიტანა ივანიშვილმა. ვერ აიტანა ის, რომ როდესაც მან საქართველოს გარე პოლიტიკური კურსის მოსატრიალებლად დაიწყო დასავლეთისგან მონსტრის შექმნა, გარე ძალებზე და გლობალურ ომის პარტიაზე და მსგავს სისულელეებზე მაქვს საუბარი. ამას თხზავდა ზუსტად მაშინ, როდესაც იწყებოდა რუსეთ-უკრაინის საბრძოლო მოქმედებები.

მე ამაში არ ავყევი, არც დავეთანხმე. არ დავეთანხმე იმ სიგიჟეში, თითქოს, რაღაც გარე ძალები იყო ჩარეული მისი და Credit Suisse-ის საქმეში. თუკი რაიმე ძალები იყო ჩარეული, ყველა ძალა იყო ივანიშვილის სასარგებლოდ, რადგან ყველა სასამართლო მოგებულიყო. არ დაგავიწყდეთ, Credit Suisse-ი არის მსოფლიოში ერთ-ერთი ყველაზე დიდი საფინანსო ინსტიტუტი, იურისტების არმიაც ჰყავთ და მაგან ყველაზე კარგად იციან, როგორ უნდა გაწელონ საქმეები. ამას შვრებოდნენ, ბევრმა მოსამართლემ გააკრიტიკა ამისათვის Credit Suisse-ი, მაგრამ იმის თქმა, რომ ვინმე ამაში ჩარეული იყო, არის უბრალოდ სიგიჟე. 

ნოდარ მელაძე: საერთოდ რაიმე კავშირი გარე პირებს შეიძლება ჰქონოდა თუ არა ივანიშვილის იმ ფინანსურ პრობლემებთან, რომელიც შეექმნა Credit Suisse-ისთან?

გიორგი ბაჩიაშვილი: "ნესკადრონმა" ივანიშვილის ანგარიშების დასუფთავება და ასე ვთქვათ, კრიმინალური საქმიანობის ჩადენა დაიწყო 2006-2007 წლებში. ანუ, პრაქტიკაში გამორიცხულია, რომ მაშინ ივანიშვილს ჰყოლოდა ვინმე გლობალური ომის პარტიისნაირი მტერი, რომელიც ასე გაუსწორდებოდა ივანიშვილს. კიდევ ერთ რამეს ვიტყვი, სულ რომ მართლა არსებობდეს გლობალური ომის პარტია, როგორ შეიძლება ივანიშვილი იყოს ერთადერთი ადამიანი მსოფლიოში, ვისთვისაც ახალი დოქტრინა ჩამოაყალიბეს, თუ როგორ უნდა წაართვან კაცს თავის ფული. ამას ამბობს ზუსტად ისევე, როგორც მდინარაძე ამოდის და ამბობს, ამხელა ვეებერთელა ბანკი გააკოტრეს ივანიშვილის გულისთვისო.

თავადვე თუ სჯერა, რასაც ამბობს. რამხელა სისულელეა. მას სჭირდება ეს ნარატივი, რომ დასავლეთისგან დახატოს მონსტრი, რომ ვითომდა ზეწოლა არის ივანიშვილზე და ეს ვაჟკაცი ადამიანი, უმკლავდება ამხელა გლობალური ომის პარტიას. თუ ასეთი ვაჟკაცები არიან, მაგრები არიან და მთელ მსოფლიოს წინ უდგებიან, ვაჟკაცობა ეყოთ და ერთი კაცი დაასახელონ ვინც არის "გლობალურ ომის" პარტიაში და ვის გადააყოლა ქვეყნის საგარეო კურსი. გამარჯობას რომ აღარ ეუბნება მთავრობას არცერთი თავმოყვარე ქვეყნის პრემიერი და მეთაური.

ნოდარ მელაძე: ეს ყველაფერი ბიძინა ივანიშვილის ფულს გადაყვა? 

გიორგი ბაჩიაშვილი: თავადვე ამბობს, რომ მე ეს კომპლექსი მაქვსო, რომ როდესაც ჩემი ინტერესი შეიძლება იყოს და ქვეყნისთვის ვერცერთ გადაწყვეტილებას ვერ მივიღებო. ეს კომპლექსი კი არ არის, ადამიანი 40 წელი და 50 წელი არის ბიზნესში. ამას ჰქვია ინტერესთა კონფლიქტი. როდესაც მსგავსი ინტერესთა კონფლიქტი გაქვს, არ უნდა მართავდე ქვეყანას. მსგავსი კომპლექსები თუ გაქვს, არ უნდა მართავდე ქვეყანას და უნდა მიხედო იმ ფულს, თუ ფული არის წინ და თუ თქვენი პირადი ინტერესი არის ქვეყანაზე წინ.  არ გვინდა ჩვენ კომპლექსიანი ლიდერი. ეს უნდა გაიაზროს ქართველმა ამომრჩეველმა. ყოველთვის უნდა ფიქრობდე, გინდა თუ არა ისეთი ლიდერი, რომელსაც ისეთი კომპლექსები აქვს, რომ ნებისმიერ დროს კომპლექსის გამო გაწიროს ქვეყნის საგარეო ინტერესი.

ნოდარ მელაძე: დღეს ამას ხედავთ, რომ ივანიშვილი საქართველოთი ვაჭრობს?

გიორგი ბაჩიაშვილი: დღეს ეს არის ჩვენი რეალობა! ივანიშვილი მთელი ცხოვრება ვაჭრობს. დღეს ივანიშვილის ამოცანაა, რომ რადაც არ უნდა დაუჯდეს, მან შეინარჩუნოს ის გავლენა და ის კონტროლი საქართველოზე, რომელიც მას გააჩნია - ეს არის მისთვის ყველაზე მნიშვნელოვანი.

ნოდარ ნელაძე: პირდაპირ მიპასუხეთ: დღეს ბიძინა ივანიშვილი თავისი პირადი ინტერესების გამო, ვაჭრობს თუ არა დასავლეთთან საქართველოს ბედით?

გიორგი ბაჩიაშვილ: ის, რა თქმა უნდა, დასავლეთთან ვაჭრობს ჩვენი ქვეყნის მომავლით. ვაჭრობს თავისი ფულის დაბრუნებისთვისაც და, რა თქმა უნდა, ქართველი ხალხი, ამ შემთხვევაში, მას ნამდვილად არ ადარდებს. ივანიშვილს არც ერთხელ არ დაუყენებია ქვეყნის ინტერესი თავის პირად ინტერესზე წინ. ის პოლიტიკაშიც თავისი პირადი პრობლემის მოსაგვარებლად მოვიდა. ის როგორც ამბობს, მას იმდროინდელი ხელისუფლება უკვე ემტერებოდა და არ ენდობოდა, რადგან მას უკვე ჰქონდა შეწყვეტილი ხელისუფლების დაფინანსება. ამას პირდაპირ ამბობს. ივანიშვილი ხალხის სიყვარულით არ მოსულა პოლიტიკაში - ეს არის დიდი ტყუილი. 

ბოდარ მელაძე: ბიძინა ივანიშვილი ამბობს, რომ პოლიტიკაში "სუფთა ხელებით" მოვიდა, ამბობს, რომ მოვიდა, როგორც დიდი ქველმოქმედი, რომელმაც დიდი კაპიტალი დააგროვა. ვიდრე ის, 2012 წელს, პოლიტიკაში შემოვიდოდა, მთელი საზოგადოება მას დიდ ქველმოქმედად იცნობდა, თქვენ მაშინ მასთან იდექით, ეს ასე არ ყოფილა?

გიორგი ბაჩიაშვილი: ხშირად ახსენებს ხოლმე ივანიშვილი თავის ხელწერას, რომ "მე სუფთა ხელებით მოვედი და ა.შ... ივანიშვილმა რუსეთში შექმნა ბანკი „რასისკი კრედიტ“-ი; ამავდროულად ის ყოველთვის ამისამართებს ხალხს თავის "ვედომოსტის" სტატიაზე ანუ, თავისივე ინტერვიუზე აკეთებს რეფერენსს, რომ ხალხს აჩვენოს, თითქოს "როგორი სუფთა ხელებით მოვედიო".

რეალურად, მან რა გააკეთა? - ბანკ “რასისიკი კრედიტიდან“ აიღო დეპოზიტარების ფული, რუსი პენსიონერების და ხალხის თანხა. ამ თანხით შეიძინა დიდძალი აქტივები, რომლებმაც სწორედ ის გახადა მილიარდერი. შემდეგ ამ ხალხს 1998 წელს უთხრა, რომ ბოდიში, მე ამ ფულს ვერ გიბრუნებთ, დაგიბრუნებთ 20 წელიწადში გაუფასურებულ რუბლებსო. ამავდროულად კი, ეს მთელი აქტივები თავისთვის დაიტოვა.

ნებისმიერ ნორმალურ სახელმწიფოში ეს არის პირდაპირ კრიმინალი დღესაც და მაშინაც. შესაბამისად, ნურავის ნუ ატყუებს თავის სუფთად ნაშოვნ ფულზე.

ნოდარ მელაძე: თქვენ ამბობთ, რომ ბიძინა ივანიშვილის მთელი კაპიტალი რუსი პენსიონერებისთვის ნაძარცვი ფულით არის მოგროვებული?

გიორგი ბაჩიაშვილი: ასე გამოდის! ის ამბობს, რომ მე ერთადერთი ბანკი ვიყავი, რომელმაც ეს ფული დავარესტრუქტურიზე, მაგრამ მაინც დავუბრუნე პენსიონერებსო. ის ასე რომ აქ მოქცეულიყო, მას ციხეში გაუშვებდნენ, რადგან მას ეს ფული თავისთვის ჰქონდა დახარჯული, თავისი კომპანიების შესაძენად.

ნოდარ მელაძე: ანუ, ეს იყო თაღლითობა?

გიორგი ბაჩიაშვილი: "ჩვეულებრივი თაღლითობაა; ყოველთვის ამბობენ ხოლმე, რომ ნუ მეტყვი, როგორ იშოვე შენი პირველი მილიონიო. ეს სწორედ ის პირველი მილიონია, რომლის თქმაც ივანიშვილს ასე ძალიან არ უნდა და რასაც ასე საგულდაგულოდ, ამდენი ხანი მალავდა. ეს უნდა იცოდეს ქართულმა საზოგადოებამ მხოლოდ იმიტომ, რომ როდესაც ამბობს, მე სუფთა ხელებით მოვედი და მე ქველმოქმედი ვარ და კარგი ბიზნესმენიო, ხალხმა ხომ უნდა იცოდეს სიმართლე, თუ ვის აძლევს ხმას.

ნოდარ მელაძე: ის დღემდე პოზიციონირებს, რომ რომ მას საქართველოში ფული არ უკეთებია. ყველა პროექტი, რომელსაც აკეთებს საქართველოში, ამას აკეთებს ქვეყნისთვის და ეხმარება ბევრ ადამიანს. რეალურად, რა დგას ამ ყველაფრის უკან?

გიორგი ბაჩიაშვილი: ქველმოქმედობა და შენაწირი ნებისმიერი არის უანგარო, თუმცა როგორც კი ქველმოქმედება ან შენაწირი ხდება ანგარებით, ან საპასუხოდ როდესაც რაიმეს ელი, ეს აღარ არის ქველმოქმედება, ეს არის ვაჭრობა, ყიდვა, მოსყიდვა, მაგრამ ეს არ არის ქველმოქმედება.

ცოტა გამეცინა, როდესაც სულიერებაზე და რწმენაზე დაიწყო საუბარი თავის ინტერვიუში, რადგან ივანიშვილი, სულიერება და რწმენა სხვადასხვა რამ არის. ივანიშვილი საჯაროდ ამბობს, რომ მორწმუნეა, თორემ პირად საუბრებში რელიგიაზე ლაპარაკი მისთვის ყოველთვის ღიმილის მომგვრელია.

ნოდარ მელაძე: რატომ ეს არის საინტერესო - მთელი "ქართული ოცნების" საარჩევნო კამპანია აწყობილია იმაზე, როგორ უნდა გამყარდეს საქართველოში მართლმადიდებლური ეკლესია, როგორ უნდა მიეცეს მას კიდევ უფრო მეტი ბერკეტი. ამაზე ლაპარაკობს ბატონი ბიძინა და თქვენი ნათქვამი მართლაც გამაოგნებელია ჩემთვის.

გიორგი ბაჩიაშვილი: ივანიშვილმა იმდენი მოინდომა, რომ თავისივე სურვილით თავად ქართულმა მართლმადიდებლურმა ეკლესიამ უარით გაისტუმრა.

მოდი დავუბრუნდეთ ისევ ქველმოქმედებას. რომ გავიხსენოთ ძველი აღქმის მეოთხე თავი თუნდაც, კაენის და აბელის ისტორია, ღმერთმა კაენის შენაწირი არ მიიღო, რადგან ეს ანგარებით იყო გაკეთებული. ზუსტად იგივე ივანიშვილის მიერ გაკეთებული ქველმოქმედება, როდესაც ის ელოდება, რომ ამის გამო ის უნდა აირჩიონ, ან ამის გამო ქართველ ხალხს უნდა უყვარდეს. ეს არის ჩვეულებრივი მოსყიდვა. ამას ქველმოქმედების და შენაწირის სუნიც კი არ უდის. 

 

წელს შემოღებული ოფშორების კანონი შემოიტანა რუსული კანონის გარშემო აურზაურის დროს – გააძვრინა, „под шумок“ (ხმაურისას). რეალურად რისთვის? 2022 წელს, როგორც თავადვე თქვა, ნახატების კოლექციას არ ატანდნენ. გამოატანეს.

შემოიტანა საქართველოში დაახლოებით 1 მილიარდი დოლარის ღირებულების კოლექცია. არ უნდოდა დღგ-ს, ქონების და მოგების გადასახადების გადახდა. ამ კანონით კი აქტივები გათავისუფლდება მოგების გადასახადისგან.

ანუ, მომავალში რომ გაყიდის მოგებით, გადასახადი არ ექნება. შესაბამისად, 5-10 წელიწადში რომ გაყიდოს ეს კოლექცია 2 მილიარდ დოლარად, [მოგების გადასახადის] ის 200 მილიონი დოლარი, რომელიც უნდა გადაიხადოს ბიუჯეტში, მან უბრალოდ ამოიღო ქართველი ხალხის ჯიბიდან. ასევე, განბაჟების და დღგ-ს საფასური, ერთ მილიარდზე უწევს დაახლოებით 180 მილიონი დოლარი – ამოიღო ქართველი ხალხის ჯიბიდან. ქონების გადასახადი, 1% – წელიწადში 10 მლნ დოლარი, პირდაპირ ამოიღო ქართველი ხალხის ჯიბიდან. ანუ, ერთ ოპერაციაში დაახლოებით 400 მილიონი დოლარი მოჰპარა სახელმწიფოს.

ამავდროულად ყიდულობს ივანზე ზოსიმეს ხელნაწერს, რომ რამენაირად ზემოქმედება გააკეთოს მორწმუნე ხალხის არჩევანზე, რომ ასე ვთქვათ, ისინი კარგად განაწყოს მის მიმართ. ამას აპიარებს და მეორე ჯიბით მილიარდ ლარს პარავს თავის ქვეყანას. ასეთი ქველმოქმედია ივანიშვილი. 

ნოდარ მელაძე: თქვენ მას ახლოდან იცნობთ, ეს მისი ხელწერაა?  ანუ, ამ ყველა ნაბიჯზე ფიქრობს და ზუსტად იცის, როგორ და რანაირად უნდა იმოქმედოს საზოგადოებაზე?

გიორგი ბაჩიაშვილი: ერთადერთი მთავარი კანონი, მთავარი წესი, რაც შეიძლება გამოიყენო იმისთვის, რომ გაიგო, ივანიშვილს რა უნდა და რას აპირებს, არის ის, რომ უსმინო რასაც ამბობს და დაუშვა. პირველი დაშვება უნდა გააკეთო, რომ ეს არის ტყუილი, რადგან ივანიშვილი სიმართლეს არასდროს არ ამბობს. ის იწყებს ტყუილით და იმ ტყუილის უკან რა იმალება, მერე შეიძლება უკვე დაინახო, თუ ამ პირველ დაშვებას გააკეთებ.

ყველა მისი დიდი მოქმედება, რაც გაუკეთებია, ამ ტყუილით არის შეფარული. რა თქმა უნდა, მას თავის თავზე ლეგენდა აქვს აგებული ყველაზე დიდი ქველმოქმედის. რეალურად ხალხმა უნდა იცოდეს, რომ ეს არის, მხოლოდ და მხოლოდ, შირმა და არანაირი ქველმოქმედი ამ კაცის უკან არ დგას. ეს არის ადამიანი, რომელიც დღეს არის შეშლილი თავისი ძალაუფლებით. რაც უფრო დრო გადის, მით უფრო ძალიან ძლიერად ეჭიდება ამ თავის ხელისუფლებას. 

ამ ქვეყანაში ივანიშვილი თვითონ არის გლობალური ომის პარტია. სასამართლო, პროკურატურა, ყველაფერი მის ხელშია და პიარკამპანია კიდევ უზარმაზარი. ვინც მას არ ემორჩილება და ვისაც განსხვავებული აზრი აქვს, კი ვხედავთ ზოგს ჩარეცხილს ეძახის, ზოგს ჩახდილს, მოღალატეს, ამერიკის აგენტს, უსამშობლოს და ა.შ..

ნოდარ მელაძე: ამ ყველაფრის სჯერა თუ იგონებს?

გიორგო ბაჩიაშვილი: სამწუხარო ის არის, რომ ამ აბსურდს როცა იმეორებენ ხშირად, მერე იჯერებენ ხოლმე. ასეთი შესკდომა რაღაც გამოგონილ ძალაზე, ეს მხოლოდ ივანიშვილმა მოიგონა. 2012-ში და შემდეგაც, ჩვენ შემდგარი დასავლური ღირებულებების, დემოკრატიის ქვეყნად ვიყავით ცნობილი. ამ კაცმა თავისი კომპლექსებით გახადა უბრალოდ სასაცილო. იქამდე მიიყვანა, რომ არცერთი თავმოყვარე დასავლური ქვეყნის მეთაური უბრალოდ გამარჯობასაც აღარ ეუბნება.

ნოდარ მელაძე: რას ეტყვის დღეს გიორგი ბაჩიაშვილი საქართველოს მოქალაქეებს - ადამიანი, რომელმაც ძალიან კარგად იცის, ვინ არის ბიძინა ივანიშვილი, რომელსაც ყველაზე მეტად ენდობოდა ივანიშვილი, რატომ უნდა მისცენ, ან არ უნდა მისცენ ხმა ბიძინა ივანიშვილს? 

გიორგი ბაჩიაშვილი ამ არჩევნებზე ის არ არის მნიშვნელოვანი და არჩევანი იმაზე არ დგას, ვინ იქნება პრემიერ-მინისტრი და ვინ შს მინისტრი. ეს არის პირველი არჩევნები ბოლო 30 წლის მანძილზე, როდესაც სასწორზე დგას ჩვენი ქვეყნის მომავალი, ჩვენი ქვეყნის გარე პოლიტიკური კურსი, რომელიც 30 წლის მანძილზე და ათასწლეულების მანძილზე იყო უცვლელი და ბევრ რამეში საქართველო იყო ევროპული ფასეულობების აკვანიც დემოკრატიის კუთხით, ქალის და კაცის თანასწორობის კუთხით და ბევრი ისეთი რამით, რაც ევროპაში გასული საუკუნის 60-იან წლებში შემოვიდა. 

ეს დგას დღეს სასწორზე. შესაბამისად, ყველა იმ ადამიანმა, ვისაც უნდა, რომ თავის შვილი გაიზარდოს დემოკრატიულ ქვეყანაში და მას არ იჭერდნენ, არ დევნიდნენ ქუჩაში და სუს-ის მანქანები არ დაყვებოდნენ Facebook-ის პოსტების გამო, მან უნდა მისცეს ხმა ევროპას და მისი პოლიტიკური გემოვნების საკითხია უკვე, რომელ ოპოზიციურ პარტიას მისცემს ხმას. მთავარია, რომ ამ ქვეყანაში მოხდეს ცვლილება და ეს ცვლილება უნდა იყოს დემოკრატიული. ეს მხოლოდ ჩვენმა მოსახლეობამ უნდა გადაწყვიტოს. 

ნოდარ მელაძე: რატომ არის საშიში ბიძინა ივანიშვილის ხელისუფლებაში დარჩენა? 

გიორგი ბაჩიაშვილი: მერწმუნეთ, ამ წლების განმავლობაში მართლა ძალიან ბევრი ინფორმაცია მაქვს და ბევრი რამ შემიძლია გამოვიტანო სააშკარაოზე, მაგრამ უნდა მორჩეს ამ ფარული დოკუმენტებით ხელისუფლებების ცვლილება ჩვენს ქვეყანაში. ივანიშვილმა იშიშვლა თავი. არ არის საჭირო დღეს, რომ ვინმემ ამოიღოს დოკუმენტი, რომ აი თურმე პროკურორს, მოსამართლეს როგორ ესაუბრებოდა. ეს ისედაც გასაგებია, რომ ერთადერთი კაცის ხელშია მთელი ქვეყანა.

ის, რასაც პირდება ქართველ ხალხს, ეს არის რეპრესიები. ანუ, ოპოზიციურ პარტიებს და ამომრჩევლებს პირდება გასამართლებას და მერე ისეთი ოპოზიციის შექმნას, რომელიც მისთვის მისაღები იქნება. ანუ ჟირინოვსკის და ზუბანოვის ოპოზიცია მახსენდება - ეს იყო მისაღები ოპოზიცია რუსეთისთვის. ასეთივე მისაღები ოპოზიცია უნდა ივანიშვილს. 

პუტინის მმართველობის მოდელს აშენებს 12 წელია. აბა ევროპულ მოდელს ხომ არ აშენებს?! ის საუბრობდა ბევრს ევროპაზე და დასავლურ ღირებულებებზე, მაგრამ თუ დააკვირდები ქცევას, 12 წელი წმენდდა მთელ ხელისუფლებას და თავის პარტიას ნებისმიერი პროდასავლური ადამიანისგან. დამისახელეთ დღეს ერთი მართლაც პროდასავლური პიროვნება მის გარემოცვაში. შესაბამისად, ის მეთოდურად 12 წელი ამას აკეთებდა. იმას აკეთებდა, რომ არცერთი თავმოყვარე დასავლური ორგანიზაცია და კომპანია აღარ შემოდის ინვესტორად საქართველოში. 

საუბრობდა იმაზე, თუ აი, წინა ხელისუფლების პირობებში იმპორტს ეჯდა რაღაც კომპანიები და ა.შ., ყველა ელექტროენერგიის კილოვატიდან გადახდილი ლარიდან ამდენი თეთრი მიდიოდა ვიღაცის ჯიბეში. გამოვიდეს და გამჭვირვალედ დაასახელოს, ამდენი იმპორტი ხორციელდება დენის და გაზის, ისევ ის კომპანიებია, პირდაპირ არც დენს და არც გაზს არ ყიდულობს. თქვას, შუამავალი კომპანიები რა კომპანიებია, სად მიდის ის ფული?! გაჭირვებული კაცი ფულს რომ იხდის, ღიად აჩვენოს საქართველოს მოსახლეობას, დენის იმპორტი რომ შემოდის, თანხები სად მიდის, ვისთან მიდის. 

ნოდარ მელაძე: თქვენ რა იცით, ვისთან მიდის წილი, ივანიშვილის გარემოცვაში ილექება ფული?

გიორგი ბაჩიაშვილი: ყოველ შემთხვევაში, ჩემს გარემოცვაში არ ილექება ეს და დანარჩენზე ახლა ამომრჩეველმა და ხალხმა თავად გააკეთოს დასკვნა. 

ნოდარ მელაძე:  მსხვილი ბიზნესს შევეხოთ, ვის რა ბიზნესი უნდა გაეკონტრილებინა ეს პირადად ივანიშვილის გადანაწილებულია? 

გიორგი ბაჩიაშვილი: თავისთავად. თავისთავად, დღეს ჩვენს ქვეყანაში პრემიერ-მინისტრი პრემიერი არ არის და მინისტრი მინისტრი არ არის. არც ინვესტიცია და არც პროექტი არ ხდება იმ არხების გავლით, როგორც უნდა ხდებოდეს ნებისმიერ დემოკრატიულ სახელმწიფოში. ანუ, პარალელური მთავრობა და პარალელური მმართველობა გვაქვს...

ამავდროულად, ისევ იმას ამბობს, რომ ის აშენებს ევროპულ სახელმწიფოს. დაარბია პირდაპირ ჩვენი საგარეო ურთიერთობები, მაგრამ ლოზუნგებში მაინც ის აქვს, რომ ღირსეულად მიდის ევროპაში, მაგრამ იმ ევროპაში გამარჯობას აღარავინ ეუბნება და რანაირად მიდის, გაგვაგებინოს, აგვიხსნას, თუ როგორ ხდება ასეთი სიარული. 

ნოდარ მელაძე: რა ინტერესი ჰქონდა ბიძინა ივანიშვილს, რომ დასავლეთთან ურთიერთობები ბოლომდე ჩაეკეტა? ეს იყო მისი დავალება, ასე ფიქრობს, რომ რუსეთთან ერთად ყოფნა კარგი არის, თუ რაიმე კიდევ სხვა ხდება?

გიორგი ბაჩიაშვილი: 2022 წელს მისთვის უკვე გახდა ცხადი, რომ მისი ავტოკრატიული ტიპის მმართველობა იყო შეუთავსებელი ევროკავშირთან. ივანიშვილი იმ გავლენებით, როგორი გავლენაც ჰქონდა და როგორ მჭიდრო მარწუხებშიც ჰყავდა მთელი ქვეყანა მოქცეული, შეუთავსებელი იყო და ვერ შევიდოდა ევროკავშირში. შესაბამისად, მან გადაწყვიტა, დასავლეთის და ევროკავშირის დემონიზება. ამისათვის, თავისი Credit Suisse-ის ქეისიც მოიხმარა, თითქოს, ვიღაც რაღაცით აშანტაჟებდა, მერე დაიწყო ზაზა შათირიშვილის მეშვეობით წერილების გამოქვეყნება და ნაშრომების გამოქვეყნება. მე ვიცი, როგორ იწერებოდა ეგ ნაშრომები - ივანიშვილი წერს მაგ ნაშრომებს. თავისი მონაწილეობით იწერება ეს ყველაფერი. აბა, ზაზა შათირიშვილი რომელი საგარეო-საბანკო ექსპერტია ივანიშვილის Credit Suisse-ის ბანკზე რომ დაიწყო წერა. ან მე რომ გამომიცხო იმხელა წერილი, რომ თურმე, ამერიკის აგენტი ყოფილა, მოსყიდული და რაღაც. 

ნოდარ მელაძე: ამ ყველაფერს თავად ბიძინა ივანიშვილი იგონებს, წერს და შემდეგ სხვების სახელით ავრცელებს, რომ საზოგადოებრივი აზრი მოამწიფოს?

გიორგი ბაჩიაშვილი: რა თქმა უნდა! ეს არის მისი ხელწერა. ზუსტად. მას უბრალოდ სჭირდებოდა კარგი მიზეზი, რომ მოეტრიალებინა საგარეო ურთიერთობები და ეს კარგი მიზეზი იყო სწორედ Credit Suisse-ის საქმე, სადაც არანაირი გავლენა არანაირ დასავლურ ძალას არ ჰქონია. თუკი რაიმე გავლენა ვინმეს ჰქონდა, ეს იყო, მხოლოდ და მხოლოდ, ივანიშვილის სასარგებლოდ. მან ყველა ეს სასამართლო პროცესი მოიგო ყველანაირი დათქმის გარეშე. 

ნოდარ მელაძე: თქვენ მიგყავდათ სასამართლო პროცესები, რომლებიც მიდიოდა Credit Suisse-ის წინააღმდეგ. თქვენთან საუბრის დროს როდისმე ბიძინა ივანიშვილს ეჭვი გამოუთქვამს, რომ ეს ყველაფერი "გამიჩალიჩა" ვიღაცა სხვამ? 

გიორგი ბაჩიაშვილი: 2015-ში, როდესაც დაიწყო ეს ქეისი, რა თქმა უნდა, ყველა ვერსიას ვიხილავდით და მეც, ასე ვთქვათ, ვფიქრობდი, რა შეიძლებოდა ყოფილიყო იმის გარდა, რაც ზედაპირზე იყო. თუმცა იქ ცალსახა იყო, რომ მოპარვა და დანაშაულები დაწყებული იყო 2007-2008 წელს. გამორიცხულია. ეს უბრალოდ ბმა არის ამისი. 

2007 წელს წინსწრებით ვერავინ ვერ დაუწყებდა ივანიშვილს ძარცვას და მე როდესაც დამიწყო საუბარი 2022-ში, რომ მებრძვიან და "გამიჩალიჩეს", მე ამაში არ დავეთანხმე. 

ნოდარ მელაძე: მას უნდოდა, რომ ეს ყველაფერი საჯაროდ თქვენ გამოგეტანათ?

გიორგი ბაჩიაშვილი: იყო, რა თქმა უნდა, თუმცა ჩემი მკაცრი პოზიცია იყო, რომ მე ამ სპექტაკლში მონაწილეობას არ მივიღებდი, რადგან მე ასე არ მჯეროდა. 

ნოდარ მელაძე: ამის შემდეგ დაიწყო გამოძიება თქვენ წინააღმდეგ?

გიორგი ბაჩიაშვილი: გამოძიება დაიწყო იმის შემდეგ, როდესაც ბოლო, ყველაზე მნიშვნელოვანი პროცესი ბერმუდაში ივანიშვილის გამარჯვებით დასრულდა. მე უბრალოდ აღარ ვიყავი საჭირო მისთვის...

სანამ პროკურატურა დამიბარებდა დაკითხვაზე, დაახლოებით რამდენიმე დღით ადრე გვქონდა სატელეფონო საუბარი. ტელეფონზე ჩვენ კვირაში ორჯერ მაინც ვსაუბრობდით, რადგან აქტიურად მიდიოდა Credit Suisse-ის პროცესები. მან მე მადლობა გადამიხადა, რომ დიდი მადლობა, ბერმუდაში კარგად გავიმარჯვე, მადლობელი ვარ შენი, ხომ იცი შენ გარეშე ეს ამბავი არ გამოვიდოდაო.

ამ დროს, საჩივარი ორი თვის შეტანილი ჰქონდა. ამ დროს ჩამოვდივარ საქართველოში და მხვდება ის, რაც მხვდება. პირველი დაკითხვის შემდეგ, გაოგნებული ვიყავი, არნახულ სისულელეებს მეკითხებოდნენ. არ ვიცი, სერიოზულად როგორ ვისაუბრო მაგაზე.

მივწერე, რომ რაღაც კონსულტაცია მინდა გავიარო თქვენთან, რაღაც გაუგებრობა არისო. კონსულტაცია ადვოკატთან გაიარა, მე ვარ მომჩივანიო. ანუ, ადამიანი ამხელა ძალის, პოლიტიკური გამოცდილების მქონეა და ელემენტარულად ერთხელ არ დამიჯდა და იმის კაცობა არ ეყო, რომ პრეტენზია გამოეთქვა. მოიგონა ამხელა საქმე და ერთხელაც კი ვერ გაბედა, რომ ამ წლების მანძილზე, შემხვედროდა და თვალებში ეთქვა, თუ რაიმე სათქმელი ეთქვა. ეს არის მისი ხელწერა, მაგრამ ის არასდროს არავის არ ხვდება, არ ელაპარაკება, სადაც მას შეიძლება პასუხი მოსთხოვო. მაგიტომაც არ ხვდება პოლიტიკოსებს, მაგიტომაც არ წავიდა და არ მისცა თავის ჩვენება პირდაპირ სასამართლოებში - ბერმუდასა და სინგაპურში. დააწერინა ექიმს ცნობები, რომ ჩემთვის ფრენა არ შეიძლებაო.

ცნობა, რომ თითქოს, ფრენა არ შეიძლება მისი ჯანმრთელობის გამო. ბერმუდაში დისტანციური იყო, მაგრამ სინგაპურში იბარებდნენ და მისმა ექიმმა წარმოადგინა საბუთი, რომ მისთვის ფრენა არ შეიძლებოდა. თუმცა მე პირადად ივანიშვილთან ორჯერ ვარ ნაფრენი შვეიცარიაში და მშვენივრად გრძნობდა თავს. მე იქ ვერაფერი ვერ შევამჩნიე. ეს მაშინ, როდესაც პრემიერი იყო და შემდეგაც, 2015-ში, როდესაც პროკურატურაში ვიყავით შვეიცარიაში.

ნოდარ მელაძე: ანუ, ქვეყანა დატოვებული აქვს, რადგან არსებობდა მასზე მითი, რომ ის ქვეყნიდან გასვლას უკიდურესად ერიდება?

გიორგი ბაჩიაშვილი: ზოგადად ერიდება, არ დადის, მაგრამ გასული იყო. მაგრამ იმ პირობებშიც კი, იმ სასამართლოშიც კი, სადაც ივანიშვილი ნამდვილად მართალი იყო, ვერ გაბედა და ისტერიკული შიში ჰქონდა იმის, რომ შეიძლებოდა, მისთვის დაესვათ კითხვები და მის პასუხებზე პასუხის გება მოუწევდა...12 წელი ხომ ამას უყურებთ. ყოველ ორ წელიწადში ერთხელ ხან გამოვა პოლიტიკაში, ხან შევა უკან. ხან ისევ გამოჩნდება. რეალურად ხომ არაფერი არ იცვლებოდა. იქ ჩემ გარდა ბევრი ხალხი იყო, ხომ? რეალურად ეს იყო უბრალოდ მისი პასუხისმგებლობისგან გაქცევის ხრიკი.

ნოდარ მალაძე: ბიძინა ივანიშვილი პოლიტიკიდან რომ გადიოდა, რას გეუბნებოდათ, რა ხდებოდა რეალურად მაშინ? 

გიორგი ბაჩიაშვილი: არაფერი არ იცვლებოდა. ჩვეულებრივ ყველაფერი მიდიოდა როგორც დადიოდნენ პრემიერები, მინისტრები, პროკურორები მასთან. მე კვირაში ორჯერ-სამჯერ ზემოთ ვიყავი მის რეზიდენციაში. ზუსტად ისევე იყო პოლიტიკაში, თუ არ იყო, არაფერი არ იცვლებოდა.

ნოდარ მელაძე: პროკურორები, მინისტრები ჩვეულებრივ დადიოდნენ მასთან. ანუ, ის აგრძელებდა მთავრობაზე გავლენის მოხდენას? 

გიორგი ბაჩიაშვილი: რა თქმა უნდა. 

ნოდარ მელაძე: მნიშვნელოვანი ფრაზა ახსენეთ, რომ მე არ დავიწყებ იმის მოყოლას, პროკურორს ან მოსამართლეს რომ დაურეკავდა და რაღაც დავალებას მისცემდაო" ასეთი პრაქტიკა არსებობდა?

გიორგი ბაჩიაშვილი: ასეთი პრაქტიკა არსებობდა და ახლაც არსებობს, რომ ივანიშვილი მართავს პროკურატურასაც და მოსამართლეებსაც.

ნოდარ მელაძე: ანუ, ივანიშვილს უნდა, რომ საქართველოში პატარა პუტინი იყოს?

გიორგი ბაჩიაშვილი: ივანიშვილის უნდა, რომ საქართველო იყო მისი ეზო. როგორც უნდა, როცა უნდა გადაწყვიტოს და არავინ კითხვა არ დაუსვას არაფერზე და პასუხი არ აგოს არცერთ საქციელზე. მას ეგეთი მმართველობა უნდა - თავად იყოს ჩრდილში და მარიონეტებს შიგადაშიგ რომ აახლებდეს ხოლმე. ქართველი ხალხი უკვე მიხვდა და დაინახა, რომ როდესაც არ მოგწონს სპექტაკლი, იქ მარიონეტი არაფერ შუაში არ არის. მარიონეტის მატარებელია გამოსაცვლელი. 26 ოქტომბერს ზუსტად ამ მარიონეტების მატარებელი უნდა გამოცვალოს ქართველმა ხალხმა. 

ნოდარ მელაძე: ამ 12 წლის განმავლობაში ბიძინა ივანიშვილი გვეუბნებოდა, რომ რუსეთიდან წამოვიდა და იქ აღარანაირი ბიზნეს ინტერესი, პოლიტიკური ინტერესი არ გააჩნია, გვატყუებდა?

გიორგი ბაჩიაშვილი: ასე გამოდის!  მე გეტყვით ერთ რამეს: როდესაც ადამიანი გამოდის და ამბობს, რომ მე ისეთი ვაჟკაცი ვარ და გლობალურ ომის პარტიას თუ ვიღაცას ვეომები და ვამხელ ყველაფერში, მაშინ გამოვიდეს და ისიც თქვას, რომ ურეკავენ "ბორია, ბორინკაო", იქ რას ებრძვის, იქ რა მოთხოვნები არის, მარტო აქეთ მხარეს რომ ამბობს. გამოდის, რომ მხარე არჩეული აქვს ადამიანს. ეს ხომ ცალსახა არის. ის მხარე აქვს არჩეული, რომელიც არის მისი ბუნებრივი მოკავშირე, რადგან არცერთი დასავლური ძალა არ დაუშვებს იმ ტიპის მმართველობას, რა ტიპის მმართველობაც უნდა ივანიშვილს. ასეთ მმართველობას მიესალმა, მხოლოდ და მხოლოდ, რუსეთი. თუ შევხედავთ რუსეთის სატელიტებს, ზუსტად ასეთი მიმართულებიანი არის. ბელორუსია, ვენესუელა, ჩამონათვალი დიდი არ არის საბედნიეროდ, მაგრამ კარგი, თვალსაჩინო მაგალითებია, თუ რა უნდა ივანიშვილს. 

ნოდარ მელაძე: ივანიშვილს დღემდე ჰყავს ხალხი, ადამიანები, ქონება, რუსეთში სახლ-კარი, მიწის ნაკვეთები. არასდროს არ გიკითხავთ, რისთვის სჭირდებოდა ეს ყველაფერი?

გიორგი ბაჩიაშვილი: ეს ჩემი საქმე არ იყო. მე არც ვიყავი ჩართული არანაირად მის რუსულ ქონებაში და აქტივებში. 

ნოდარ მალაძე: თუმცა ჰქონდა და ეს იცოდით ეს ?

გიორგი ბაჩიაშვილი ეს საჯაროც არის რაღაც მიწის ნაკვეთი და სახლი. 

ნოდარ მელაძე: ადამიანებიც არსებობდნენ (რუსეთში), რომლებთანაც შეეძლო ყოველთვის დარეკვა?

გიორგი ბაჩიაშვილი: ალბათ, დღესაც არსებობენ. მე არაფერს არ გამოვრიცხავ. 

ნოდარ მელაძე: და ყოველთვის არსებობდნენ ალბათ ადამიანები, შუამავლები, რომლებიც მიეგზავნებოდნენ მას რაღაც გარკვეულ საკითხებზე რუსეთში?

გიორგი ბაჩიაშვილი: რა თქმა უნდა. როდესაც ამხელა ბიზნეს იმპერია გაქვს რუსეთში და როდესაც ამხელა თანხა იქიდან გამოგაქვს, გამორიცხულია, რომ იქ არ დაგრჩეს შენ რაიმე, ან კავშირები ან მცირე აქტივები და ხალხი, რომელიც გარკვეულ დავალებებს შეასრულებს. საჯარო წყაროებშიც ხშირად გამოუჟონია ინფორმაციას და მგონი, ახალს არაფერს არ ვიტყვი. 

ნოდარ მელაძე: როგორი მმართველია, მეთაურია ივანიშვილი - მოგვიყევით უფრო მეტი.

გიორგი ბაჩიაშვილი: ივანიშვილი არის ავტოკრატიული ლიდერი, რომელსაც არ უნდა პასუხისმგებლობის აღება თავის საქციელებზე. ივანიშვილი ბოლო ორი წლის მანძილზე რასაც აკეთებს მეთოდურად არის ის, რომ საზოგადოებას ხლეჩს. რაც შეიძლება მეტი ნახეთქი გააჩინოს ამ საზოგადოებაში, რომ უფრო იოლად დააპირისპიროს და თავისი თავი შერაცხოს როგორც ეკლესიის და ერის მშენებლად და დანარჩენი ყველა ერის და ეკლესიის მტრებად. ამას აკეთებს. რანაირი ლიდერია ეს. ივანიშვილის უყვარს მხოლოდ თავისი თავი. მერეა მისი ოჯახი, ქვეყანა, ხეებიც და დანარჩენი. ივანიშვილისთვის ყოველთვის მთავარია მისი პერსონა, მისი პერსონის განდიდება, მისი ხელწერა. ხშირად ამბობს ხოლმე, რომ მე კადრების სამჭედლო მქონდაო. მე პირდაპირ გეტყვით, ვინც კი ნორმალური და კარგი კადრი ჰყავდა ივანიშვილს, როდესაც მოასწრო გაასწრო იქაურობას. კადრების სამჭედლო კი არა, კადრების ჭაობი აქვს მაგას. რჩება მხოლოდ ის, ვისაც წასვლის შნო არ აქვს და მის გარეშე რამეს გააკეთებს.

ნოდარ მელაძე: თქვენც წამოხვედით, ბევრი ადამიანი წამოვიდა მისი გუნდიდან, რატომ შეიძლება, რომ გაურბოდეს მას?

იმიტომ, რომ ივანიშვილისთვის არ არსებობს თავისუფალი ადამიანი. მისთვის არსებობს მხოლოდ საგანი და მარიონეტი. შესაბამისად, მასთან მუშაობა არის შეუძლებელი, თუ შენ ოდნავი კრიტიკული აზროვნების და თავისუფლად რაიმეს გაკეთების უნარი და სურვილი გაქვს.

ნოდარ მელაძე: მთავრობაში მყოფ პირებს მარიონეტებივით უყურებს?

გიორგი ბაჩიაშვილი: რა თქმა უნდა. მარიონეტებით ცვლის ამ ხალხს. ერთი და იგივე ადამიანს ხან გაუშვებს, ხან მოაბრუნებს, ხან კორუფციაში ამხელს, ხან ისევ გვერდში დაიყენებს. მარიონეტობაა აბა რა არის ეს. 

ნოდარ მელაძე: რა დამოკიდებულება ჰქონდა მას ამ ადამიანების მიმართ, მთავრობის წევრების მიმართ? და ამ ხალხის დამოკიდებულების შესახებაც მოგვიყევით, როგორ უყურებდნენ ისინი ივანიშვილს?

გიორგი ბაჩიაშვილი: რეალურად, ივანიშვილი არავის ადამიანად არ თვლის. მითუმეტეს ვინც მის საკუთრებაშია. ეს არის ჩვეულებრივი რესურსი. ადამიანობა მანდ არაფერ შუაში არ არის. ძალიან ბევრს შიში ამოძრავებს, რადგან მათ იციან, რომ ნებისმიერი არასწორი ნაბიჯი და შეგესევა ივანიშვილის პროკურატურაც, სასამართლოც და პიარმანქანაც. მე ამიტომაც საკმაოდ ცუდი მაგალითი ვარ ივანიშვილისთვის, მისი გარემოცვისთვის. 

ნოდარ მელაძე: შიში ამოძრავებთ, რომ თუ წავლენ იქამდე, ვიდრე ივანიშვილი არ მიუთითებს, რომ მათი წასვლის დრო მოვიდა, შეიძლება ძალიან მძიმე დღეში აღმოჩნდნენ, გარკვეულ ტყვეობაში არიან ეს ადამიანები? 

გიორგი ბაჩიაშვილი: ზუსტად! გარკვეულ ტყვეობაში კი არადა, მონობაში არიან. სამწუხაროდ, მენტალურ და მორალურ მონობაში არის ძალიან ბევრი ადამიანი მასთან.

ნოდარ მელაძე: იმ კორუფციაზე, რაც დღეს საჯარო წყაროებით ვიცით და ვხედავთ, რაც არის მთავრობაში, ამაზე მწვანე აქვთ ანთებული ივანიშვილისგან?

გიორგი ბაჩიაშვილი: რაც არის ცალსახა, რომ ამ ქვეყანაში ჩვენ კორუფციაზე დაჭერილი ერთი კაცი არ მინახავს. ბევრი საუბრობს, ბევრი ებრძვის, მაგრამ რეალურად კორუფცია არის, კორუფციაზე არავის არ იჭერენ. მწვანე შუქი ვისგან ექნებათ ანთებული?! ჩემგან რომ არ აქვთ ანთებული მწვანე შუქი ხომ გასაგებია არა. 

ნოდარ მელაძე: ასეთი ხმაურიანი განცხადებების შემდეგ არ გეშინიათ, რომ თქვენი სასამართლო პროცესები ისეთი დაჩქარებული ტემპით შეიძლება წავიდეს, რომ ივანიშვილმა თავისი ჩაფიქრებული შურისძიება ძალიან მალე მიიყვანოს ფინალში?

გიორგი ბაჩიაშვილი: მე ივანიშვილის სასამართლოში და პროკურატურის არ მეშინია. რა თქმა უნდა, შეიძლება ხელი მოაწერინოს და შტამპი დაარტყმევინოს ნებისმიერ გადაწყვეტილებას, თუნდაც ციხეში გაშვებას, თუმცა არსებობს სტრასბურგის სასამართლო, მე უკვე ჩართული მყავს იურისტები და საქმეც არის მზად იქ შესატანად. ეს იქნება ივანიშვილისთვის სასიკვდილო განაჩენი, რადგან მე ნამდვილად დავადასტურებ დოკუმენტურადაც იმ ყველაფერს, თუ როგორ მართვას ივანიშვილი სასამართლოსაც, პროკურატურასაც და როგორ კერავს საქმეებს.

ნოდარ მელაძე: "დავადასტურებ დოკუმენტურადაც" ძალიან დამაინტრიგებელი ნათქვამია. ანუ, შესაძლოა, რომ საჯარო სივრცეში გამოჩნდეს ისეთი მტკიცებულებები, ფაქტები, რის შესახებაც დღემდე არ ვიცოდით?

გიორგი ბაჩიაშვილი: სასამართლოში ყველა პროცედურის დაცვით გამოჩნდება ყველანაირი ფაქტი, რომელიც დაამტკიცებს გიორგი ბაჩიაშვილის უდანაშაულობას. ეს იქნება ივანიშვილისთვის და მისი მარიონეტი მოსამართლეებისთვის სასიკვდილო განაჩენი. ეს ძალიან კარგად იცის თავად ივანიშვილმაც. ამიტომაც არის, რომ ვერც წინ  მიდიან და ვერც უკან, რადგან საქმე არ არსებობს. არცერთი დამადასტურებელი საბუთი, არცერთი ნივთმტკიცება, გარდა ივანიშვილის ზეპირი ჩვენებისა, არ არსებობს, რომელიც საერთოდ რაიმე დანაშაულზე მიუთითებს. ანუ, საერთოდ გამოგონილი თემაა, გამოგონილი დანაშაულია. არ არსებობს თემა, რომელზეც ივანიშვილი მე მედავებოდეს. ეს არის უბრალოდ სასაცილო. 

გისმენთ და მრჩება განცდა, რომ შესაძლოა, თქვენი შემდეგი სვლები იყოს პოლიტიკური ნაბიჯები. ფიქრობთ, რომ შესაძლოა, თქვენ გააკეთოთ პოლიტიკური განაცხადი?

გიორგი ბაჩიაშვილი: დღეს მეც და ნებისმიერი ქართველი, ვისაც გული შეგვტკივა ამ ქვეყანაზე, უნდა იყოს პოლიტიკაში. პოლიტიკაში ვარ, აბა სად ვარ. ვაკეთებ განცხადებებს და ვაკეთებ ყველაფერს და გავაკეთებ ყველაფერს იმისთვის, რომ ხალხმა კარგად იცოდეს, რას ირჩევს და ვის უჭერს მხარს. ვინ არის ივანიშვილი და რა ტყუილებს ლაპარაკობს იმისთვის, რომ რამენაირად შეინარჩუნოს და ჩაებღაუჭოს ამ ხელისუფლებას.

ნოდარ მელაძე: პოლიტიკაში მოსვლაში ვგულისხმობ პოლიტიკურ პარტიას, პოლიტიკურ განაცხადს. შეიძლება, ხვალ გიორგი ბაჩიაშვილი ჩვენ რომელიმე პოლიტიკურ პარტიაში, ან პოლიტიკური პარტიის მიერ რომელიმე თანამდებობაზე წარდგენილი ვნახოთ?

გიორგი ბაჩიაშვიული: ამჟამად მსგავსი კონსულტაციები ნამდვილად არ მიმდინარეობს, თუმცა არაფერს არ გამოვრიცხავ. სადაც მე ჩავთვლი, რომ ჩემი როლი იქნება მაქსიმალურად კარგი და მნიშვნელოვანი ქვეყნისთვის, იმ როლში მიხილავთ. ამის პირობას ვდებ.

ნოდარ მელაძე: ანუ, ეს არის თქვენი ერთგვარი პოლიტიკური განაცხადი, რომ ოქტომბრის არჩევნების შემდეგ, ჩვენ შესაძლოა ვნახოთ გიორგი ბაჩიაშვილის თანამშრომლობა კოალიციურ მთავრობასთან, კოალიციურ პოლიტიკურ პარტიებთან. ამას ამბობთ?

გიორგი ბაჩიაშვილი: რა თქმა უნდა, არაფერს არ გამოვრიცხავ.

ნოდარ მელაძე: ივანიშვილიც გიპირებდათ პრემიერობას?

გიორგი ბაჩიაშვილი ივანიშვილისგან მქონდა რამდენიმე მოთხოვნა, შეიძლება ითქვას, რომ მე პოლიტიკურ საქმიანობაში ჩავრთულიყავი, მთავრობაში ჩავრთულიყავი უფრო, თუმცა ეს 2016-ში იყო, 2017 წელს იყო. მე, რა თქმა უნდა, მტკიცე უარი ვთქვი, რადგან იმ დროსვე ჩემთვის გასაგები იყო, რომ ამ მოდელში ჩემი თანამშრომლობა ივანიშვილთან კრახით იყო განწირული.

რატომ?

იმიტომ, რომ მე ვერ გავხდებოდი მისი მარიონეტი. ივანიშვილს არ სჭირდება თანამებრძოლი, ივანიშვილს სჭირდება მარიონეტი. ივანიშვილს სჭირდება ადამიანი, მხოლოდ ის, ვინც გაახმოვანებს ივანიშვილის აზრებს და გააკეთებს მხოლოდ იმას, რასაც ივანიშვილი მას უბრძანებს.

ნოდარ მელაძე: ალბათ, ახლა მაყურებელი ზის, გისმენთ, აანალიზებს, რამდენიმე საათში ის უკვე საარჩევნო უბანზე უნდა მივიდეს და დასვამს კითხვას, რატომ ლაპარაკობთ დღეს?

გიორგი ბაჩიაშვილი: ალბათ, მქონდა ილუზია, რომ ივანიშვილს ჰქონდა გარკვეული კეთილი და კარგი განზრახვები. მე ვერ წარმოვიდგენდი იმას, რაც ვიხილეთ ბოლო 2 წლის განმავლობაში. თუმცა 2017, 2018, 2019 წლიდან ჩემთვის გასაგები იყო, რომ ივანიშვილის გზები და ჩემი გზები უნდა გაყოფილიყო. დღეს ქართველმა ხალხმა უნდა იცოდეს, რას ირჩევს და ვის არჩევს ხმას. მე დღეს თუ არ ამოვიღებდი ხმას, მე ამას მთელი ცხოვრება ვერ ვაპატიებდი ჩემ თავს.

ასევე პირველად ახლა ვამბობ საჯაროდ, რომ 2012 წელს, როდესაც მე ივანიშვილს პირადად არც კი ვიცნობდი, მე მას აღმოვუჩინე ძალიან მნიშვნელოვანი დახმარება კრიტიკულ მომენტში. როდესაც "ქართუ ბანკში" იყო შესული დროებითი მმართველი და მას დაყადაღებული ჰქონდა ყველაფერი. საერთოდ ფინანსებზე წვდომა არ ჰქონდა, რომ მას განეხორციელებინა თავისი საარჩევნო კამპანია. მე მაშინ მას ძალიან მნიშვნელოვანი და კრიტიკული დახმარება აღმოვუჩინე ჩემი პირადი რისკის ფასად, რამაც შესაძლებელი გახადა, რომ მას სრულად დაეფინანსებინა ის არჩევნები. 

მე მაშინ მქონდა ჩემი მტკიცე სამოქალაქო პოზიცია და ვთვლიდი, რომ საქართველოში მომხდარიყო ხელისუფლების ცვლილება. მე ამის გამო გავაკეთე ეს.

ნოდარ მელაძე: რა გააკეთეთ? ფინანსურ დახმარებაზე ლაპარაკობთ?

ფინანსების უზრუნველყოფის დახმარებაზე მაქვს საუბარი. მეტ დეტალებში არ შევალ ახლა, თუმცა მისთვის ძალიან კრიტიკულ მომენტში ვითამაშე ძალიან მნიშვნელოვანი როლი. მე ამაში არაფერი არ მომითხოვია, არც გასამრჯელო, არც არაფერი. მე ეს გავაკეთე იმიტომ, რომ ჩემი სამოქალაქო პოზიცია იყო, რომ იმ დროს საქართველოს სჭირდებოდა ცვლილებები. დღესაც ჩემი სამოქალაქო პოზიცია არის, რომ საქართველოში აუცილებელია ხელისუფლების დემოკრატიული გზით ცვლილება. ამიტომაც სწორედ ასეთ მნიშვნელოვან მომენტში გადავწყვიტე ისევ ჩემი პირადი რისკის ფასად. თქვენ იცით, ამ ყველაფერს რა მოყვება, თუმცა მე ვთვლი, რომ ასეთ დროს გაჩუმება არის ჩემი თავის და შენი ქვეყნის ღალატი. მე ამას ჩემ თავს ნამდვილად არ ვაპატიებდი.