ქართველი ხალხის წინააღმდეგ ძალის გამოყენებას მკაცრად ვგმობთ, მოვუწოდებთ საქართველოს ხელისუფლებას დაუყოვნებლივ შეწყვიტოს ეს ძალადობრივი ქმედებები, - ამის შესახებ ესტონეთის, ლატვიის, ლიეტუვისა და პოლონეთის პრეზიდენტების ერთობლივ განცხადებაშია ნათქვამი.

პრეზიდენტები წერენ, რომ იმედგაცრუებულები არიან ევროკავშირში გაწევრიანების შეჩერებაზე მმართველი გუნდის გადაწყვეტილებით.

მათივე თქმით, ახლად არჩეული პარლამენტის ლეგიტიმურობაზე ეჭვები არსებობს, რის გამოც პრეზიდენტები არჩევნებზე დარღვევების ცნობების დამოუკიდებელი საერთაშორისო გამოძიების ჩატარებისკენ მოუწოდებენ. 

ვინაიდან საქართველოს ევროკავშირში ინტეგრაცია კონსტიტუციური ვალდებულებაა, ჩვენ, ბალტიისპირეთის ქვეყნებისა და პოლონეთის პრეზიდენტები, საქართველოს მმართველი „ქართული ოცნების“ ხელმძღვანელობის მიერ მიღებული გადაწყვეტილების შესახებ, ევროკავშირში გაწევრიანების მოლაპარაკებები 2028 წლამდე შეაჩეროს, ღრმა იმედგაცრუებას გამოვთქვამთ. ეს გადაწყვეტილება ქართველი ხალხის მისწრაფებების სერიოზულ ხელის შემშლელ ფაქტორს წარმოადგენს. 2024 წლის 26 ოქტომბერს საქართველოში ჩატარებული საპარლამენტო არჩევნები მნიშვნელოვანი დავით გამოირჩა, რაც ახლად არჩეული პარლამენტის ლეგიტიმურობას კითხვის ნიშნის ქვეშ აყენებს. ვითვალისწინებთ ევროპარლამენტის მოწოდებას საქართველოში საპარლამენტო არჩევნების ხელახლა ჩატარების შესახებ და დარღვევების, მათ შორის ამომრჩეველთა დაშინებისა და ზეწოლის ცნობების საერთაშორისო გამოძიების მოწოდებით გამოვდივართ, ცნობების, რამაც საარჩევნო პროცესისა და მისი შედეგების მიმართ საზოგადოების ნდობა შეარყია.

უმკაცრესად ვგმობთ ქართველი ხალხის წინააღმდეგ ძალის გამოყენებას და ასევე თავიანთი იმ პიროვნებების პირობით დაკავებას, რომლებიც თავიანთ უფლებებს იყენებდნენ. საქართველოს ხელისუფლებას მოვუწოდებთ, რომ დაუყოვნებლივ შეწყვიტოს ეს ძალადობრივი ქმედებები და , საქართველოს საერთაშორისო ვალდებულებების შესაბამისად დაიცვას შეკრების და გამოხატვის ფუნდამენტური თავისუფლებები. ძალადობის ყველა ქმედება უნდა დაუყოვნებლივ იქნეს გამოძიებული და პასუხისმგებელმა პირებმა პასუხი უნდა აგონ,- აღნიშნულია მათ მიერ გავრცელებულ განცხადებაში.

საქართველოს საკითხი პრეზიდენტებმა 6 დეკემბერს ლიტვაში შეხვედრისას განიხილეს.