მაკრონი: ვესაუბრე კოლეგებს EU-დან, გვინდა ხანგრძლივი მშვიდობა უკრაინაში, ევროპაში
უკრაინის გვერდით ვდგავართ და პასუხისმგებლობას ავიღებთ ევროპაში მშვიდობისა და უსაფრთხოების უზრუნველსაყოფად - ამ შინაარსის განცხადებას ავრცელებს საფრანგეთის პრეზიდენტი, ემანუელ მაკრონი ევროპელ და კანადელ ლიდერებთან გამართული შეხვედრის შემდეგ.
მისი თქმით, საუბრის მონაწილეები იზიარებენ მიზანს, რომელიც მდგომარეობს იმაში, რომ დასრულდეს აგრესიული ომი, რომელსაც რუსეთი უკრაინის წინააღმდეგ უკვე თითქმის 3 წელია აწარმოებს.
"მე ახლა მქონდა მორიგი ხანგრძლივი საუბარი რამდენიმე კოლეგასთან ევროკავშირიდან, ასევე კანადიდან, ისლანდიიდან და ნორვეგიიდან. საფრანგეთისა და მისი პარტნიორების პოზიცია მკაფიო და ერთიანია. ჩვენ გვინდა ხანგრძლივი და მყარი მშვიდობა უკრაინაში. ჩვენ ვდგავართ უკრაინის გვერდით და ვიკისრებთ სრულ პასუხისმგებლობას მშვიდობისა და უსაფრთხოების უზრუნველყოფაზე ევროპაში. ეს საფრანგეთის ფუნდამენტური ინტერესია, მე გახლავართ ამის გარანტი", - დაწერა მან X-ზე.
მაკრონი თვლის, რომ მშვიდობის მისაღწევად ძალისხმევა გაგრძელდება შემდეგი პრინციპებით:
- უკრაინა ყოველთვის უნდა იყოს ჩართული, მის უფლებებს კი პატივი უნდა სცენ
- მშვიდობა უნდა იყოს ხანგრძლივი და თან უნდა ახლდეს სანდო და დამსახურებული ნდობის გარანტიები
- მხედველობაში უნდა იქნას მიღებული ევროპული უსაფრთხოების საკითხები
"დარწმუნებულნი ვართ, რომ საჭიროა გავზარდოთ თავდაცვისა და უსაფრთხოებაზე დანახარჯები და გავაძლიეროთ ევროპისა და თითოეული ჩვენი ქვეყნის შესაძლებლობები. გადაწყვეტილებები მიიღება უახლოეს დღეებში და კვირებში", - დასძინა ემანუელ მაკრონმა.
