მოკლული ნიკო კვარაცხელიას დედა, იზა ომაძე პროკურორის, გია შაიშმელაშვილის საქმიდან ჩამოშორებას და საქმის შეკვეთილ მკვლელობა გადაკვალიფიცირებას ითხოვს.

როგორც 22 წლის ახალგაზრდის მშობელი სოციალურ ქსელში წერს, საქმეში უამრავი მტკიცებულება იყო, რომ მისი შვილის მკვლელობა იყო შეკვეთილი, პროკურორმა კი "ეს საქმე ჩაფარხა" - "ეჭვი მაქვს, რომ მან და მისმა პატრონებმა ძალიან დიდი ფული აიღეს".

მოკლულის დედას მიმართავს გენერალურ პორკურორს, გამოიძიონ ვინ დაუკვეთა მისი შვილსი მკვლელობა - "წინააღმდეგ შემთხვევაში, პირდაპირ თქვენ და თქვენი ხელისუფლება გამოდიხართ დამკვეთი"

"ბატონო პროკურორო, ეს ჩემი შვილია, ჩემი ნიკო, რომელიც ოთხი წლის წინ, ქალაქის შუაგულში, დაქირავებულმა მკვლელებმა, უსულო ახალგაზრდებმა დაგვიხვრიტეს. საქმის პროკურორი გია შაიშმელაშვილია, ყოველგვარი ვადა ამოიწურა, მოთმინების ფიალაც გადაივსო. მინდა, მოგმართოთ თხოვნით, რომ პროკურორი შაიშმელაშვილი საქმიდან ჩამოაშოროთ და ამ საქმეს სწორი კვალიფიკაცია მისცეთ, რადგან ამ ბატონმა პროკურორმა, ნიკო კვარაცხელიას საქმე ფაქტობრივად ჩაფარცხა, რის და რა ფასად, ალბათ, ამას თქვენ უკეთ გაიგებთ ვიდრე - მე. საქმეში იყო თითქმის, ყველა მტკიცებულება, კონკრეტული სახელები, სამუშაო ტელეფონები, უამრავი მტკიცებულება, რომ ეს იყო შეკვეთილი მკვლელობა, მაგრამ მან ეს საქმე დაშალა, კვალიფიკაცია შეუცვალა და ისე შემოდო თაროზე…ეჭვი მაქვს, რომ მან და მისმა პატრონებმა ძალიან დიდი ფული აიღეს, სხვანაირად ადამიანი ასეთ ბოროტებაზე არ წავიდოდა, ვხედავ, როგორ უბნელებს თვალს და გონებას დიდი ფული მაღალჩინოსნებს! ჰკითხეთ, ვისი მითითებებით მოქმედებდა შაიშმელაშვილი! მე შემიძლია გითხრათ, რომ აუცილებლად დადგება ის დღე, როცა ნიკოს მკვლელობის დამკვეთებს თავად მიუჯდება ბატონი შაიშმელაშვილი გვერდით და არა მარტო შაიშმელაშვილი! ისე არ გამწირავს უფალი, ამ დღეს რომ არ მომასწროს…

ვიმეორებ და ათასჯერ გავიმეორებ, ნიკო კვარაცხელია არ მოუკლავს თავის თაობას, ნიკო კვარაცხელიას მკვლელობა იყო შეკვეთილი, თუ ვის მიერ, ეს თქვენ უნდა დაადგინოთ, წინააღმდეგ შემთხვევაში, პირდაპირ თქვენ და თქვენი ხელისუფლება გამოდიხართ დამკვეთი. მე მინდა პირადად თქვენ დაინტერესდეთ ამ საქმით. თქვენი წინამორბედებივით ნუ დაიდებთ და ნუ დაუტოვებთ შვილებს ცოდვას! ბატონ ღარიბაშვილს მივმართე, ბატონ გომელაურს მივმართე, ბატონ შოთაძეს მივმართე, რეაგირება ნული, მხოლოდ ის აინტერესებდათ, რა სახის პროტესტის მობილიზება შემეძლო!ჩამოაშორეთ ნიკო კვარაცხელიას საქმეს პროკურორი შაიშმელაშვილი და გადააკვალიფიცირეთ საქმე, როგორც შეკვეთილი მკვლელობა! მთელმა საქართველომ იცის, რომ ეს იყო შეკვეთილი მკვლელობა! არ დავნებდებით, არ გახდება ეს საქმე ხანდაზმული, ყოველი დღე 15 სექტემბერია ჩვენთვის!ნიკო, შვილო, ჯერაც წამზომია ჩართული შენს საათზე, სულდატოვებულ შენს სხეულს რომ მოპარეს ნამუს გარეცხილებმა, დედი!!!! მთელი გულით ვითხოვდი, თან უნდა გავატანო იმ ქვეყნად-მეთქი და მიმტკიცებდნენ, არ ჰკეთებიაო! მერე ძალიან გამწარებული რომ მნახეს, ღამის 12 საათზე მოაწერინეს საქმის გამომძიებელს და სისხლიანი დამიბრუნეს, იქნებ ადგილზე გული გამხეთქოდა დედი! ასეთი ბოროტება სუფევს შვილო, მას შემდეგ, რაც შენ დაგვტოვე, მაგრამ ბოროტება ვერ გაიმარჯვებს დედი, ვერა!!! ველი ღიაობას თქვენგან ბატონო პროკურორო! გთხოვთ, ნუ გამომიყვანთ დედის ამპლუიდან!",- წერს იზა ომაძე.

22 წლის ნიკო კვარაცხელია თბილისში, 2021 წლის 15 სექტემბერს ჩაცხრილეს. მიყენებული ჭრილობების შედეგად ის 16 სექტემბერს კლინიკაში გარდაიცვალა. 

კვარაცხელიას მკვლელობის საქმეზე მსჯავრდებულები არიან აკო ჭელიძე და გიორგი კავილაძე. ჭელიძეს 17 წლით თავისუფლების აღკვეთა, კავილაძეს კი 16 წლით თავისუფლების აღკვეთა აქვს მისჯილი.

რაც შეეხება იმას, იყო თუ არა კვარაცხელიას მკვლელობა შეკვეთილი, ან იკვეთებოდა თუ არა დაკავებულებთან აღნიშნულ საკითხზე ვინმეს მხრიდან კომუნიკაცია, პროკურორი თავის დროზე აცხადებდა, რომ გამოძიება ცალკე წარმოებად მიმდინარეობდა და ყველა ვერსიაზე მუშაობდა.