მილანში, პოლიციამ 324 კილოგრამი ვერცხლი და 61 000 ევროზე მეტი ნაღდი ფული ამოიღო. დაკავებულია ორი კაცი - 36 წლის ქართველი და 46 წლის რუმინელი. ინფორმაციას ადგილობრივი მედია ავრცელებს. 

გამოცემის ცნობით, ჩხრეკა მილანში, ხულიო ჩეზარე პროკაჩინის ქუჩაზე, ხუთშაბათს, დაახლოებით საღამოს 17:00 საათზე დაიწყო. პოლიციის ოფიცრებმა ორი კაცი საეჭვოდ მიიჩნიეს, რომლებიც ნაქირავები მანქანით გადაადგილდებოდნენ. ისინი შენობის წინ გაჩერდნენ და მალევე, შენობიდან მესამე პირი გამოვიდა და შენობაში დაბრუნებამდე სწრაფად გადასცა კონვერტი.

დაკავებულ ქართველს სამი გრამი მარიხუანა აღმოაჩნდა, მანქანიდან კი 12 სამკაული და 15 ხელნაკეთი ვერცხლის ზოდი ამოიღეს, რომელთა წონა შვიდ კილოგრამზე მეტი იყო, ასევე საკრედიტო ბარათები, მობილური ტელეფონები, გასაღებების ნაკრები და თითქმის 53 000 ევრო ნაღდი ფული.

გამოძიების შედეგად, პოლიციის თანამშრომლები ქალაქის გარეუბანში, ვიმოდრონეში, ვია ფერნანდო ე მადალენა დე პადოვაზე მდებარე ავტოფარეხამდე მივიდნენ, სადაც მათ 200 კილოგრამზე მეტი ვერცხლის სამკაული და დიდი ზომის სასწორი აღმოაჩინეს. ავტოსადგომზე, 46 წლის მამაკაცთან დაკავშირებულ მანქანაში, კიდევ 113 კილოგრამი სამკაული, მეორე, უფრო პატარა სასწორი და 8 700 ევრო ნაღდი ფული იპოვეს.