4 ოქტომბრის საქმე - მოსამართლე ლელა მარიდაშვილმა ოთხივე დაკავებული პატიმრობაში გაუშვა. 

4 ოქტომბერს განვითარებული მოვლენების საქმის ფარგლებში 6 ოქტომბერს დაკავებული 13 პირიდან განსასჯელის სკამზე ამჯერად თორნიკე მჭედლიშვილი, აბო ნავერიანი, ევა შაშვიაშვილი და დავით სტურუა ისხდნენ.

მათ მიმართ პატიმრობის გამოყენებას ბრალდების მხარე ითხოვდა. 

ცნობისთვის, 4 ოქტომბრის მოვლენებთან დაკავშირებით მიმდინარე გამოძიების ფარგლებში სულ 23 ადამიანი დააკავეს. სამს კი ეძებენ.

4 ოქტომბერსვე დააკავეს აქციის საორგანიზაციო კომიტეტის ხუთი წევრი:

• პაატა ბურჭულაძე,
• მურთაზ ზოდელავა,
• პაატა მანჯგალაძე,
• ირაკლი ნადირაძე
• ლაშა ბერიძე.

6 ოქტომბერს ხელბორკილები აქციის 13 მონაწილეს დაადეს. გუშინ, 7 ოქტომბერს კი კიდევ 5 პირი იქნა დაკავებული. 

4 ოქტომბრის მოვლენებთან დაკავშირებით გამოძიება სისხლის სამართლის კოდექსის 317-ე, 222-ე, 225-ე და 187-ე მუხლებით მიმდინარეობს.