სასახლის ღობეზე დაკავებული კიდევ 4 დაკავებულის,  ია დარახველიძის, ავთანდილ სურმანიძის, რამაზ მამულაძისა და ხვიჩა გოგოხიას პროცესზე შესვენებაა გამოცხადებული - საქმეს მოსამართლე მზია გარშაულიშვილი იხილავს. 

შესვენებამდე სხდომაზე სიტყვით ისარგებლა ავთანდილ სურმანიძემ, თქვა, რომ ბოლო სამი წელია რუსეთის წინააღმდეგ უკრაინის ომში იბრძვის და ახლაც უკრაინაში წასვლას აპირებდა. რაც შეეხება 4 ოქტომბრის აქციას, ბრალდებულმა თქვა, რომ იმყოფებოდა, თუმცა არანაირ ძალადობაში მონაწილეობა არ მიუღია. 

„არავის მოწოდებას არ მივყოლივარ, ჩემ გვერდით მყოფ ადამიანებს არ ვიცნობ. უკრაინაში ვაპირებდი წასვლას, 3 წელზე მეტია, მე აქ არ ვარ და ვიბრძვი ჩვენი საერთო მომავლისთვის. პირველ აგვისტოს საქართველოში ვიყავი, მაგრამ აქციაზე არ ვყოფილვარ მანამდე, შევუერთდი 4-ში, რადგან იყო მშვიდობიანი აქცია. ვიყავი გზად, ვაპირებდი ლაგოდეხში წასვლას და უკრაინაში წასასვლელად რაღაცების ყიდვას. არაფრის მეშინია, ყველაზე მეტად იმაზე ვნერვიულობ, რომ ასობით კილომეტრი უნდა იარონ ჩემს სანახავად ოჯახის წევრებმა“, - თქვა სასამართლოში ავთანდილ სურმანიძემ.

პროკურატურა ია დარახველიძეს და ავთანდილ სურმანძეს ჯგუფურ ძალადობაში მონაწილეობას ედავება. დანარჩენებს, ამასთან ერთად, სტრატეგიული ობიექტის ხელში ჩაგდების მცდელობასაც.

პროკურორი ქეთევან სონიძე ყველასთვის პატიმრობის შეფარდებას ითხოვს.