ანდრო ჭიჭინაძის დედა"ახალი თეატრის" ფასადიდან მისი შვილის ბანერის ჩამოხსნას სოციალურ ქსელში გერმანიიდან ეხმაურება. ლიკა გუნდაძე მადლობას უხდის ანდროს მეგობრებს, მსახიობებს, რომლებმაც  "რუსთავის 2"-ის წარმომადგენლების მიერ ჩამოხსნილი ბანერი ხელახლა გააკრეს და დარაჯობდნენ, რათა ის ფასადიდან ისევ არ ჩამოეხსნათ.  

ასეთი სოლიდარობა რომ გვაქვს, ამიტომაც ვერ წაგვაქცევენ ვერც მე და ვერც ანდროს! - წერს ანდროს დედა. 

არ ვარ თბილისში . ისევ ანდროს მეგობრებმა წამიყვანეს გერმანიაში ,ეხლა გავიგე ბანერის ამბავი😊 მინდა ვუთხრა ანდროს მეგობრებს მადლობა ! მე ის მაწუხებს ბავშვები რომ შეწუხდნენ და დააგლიჯეს ამ ადამიანებს ნერვები! წაიღონ და დაანებონ ამ ღირსეულ ადამიანებს თავი! ასეთი სოლიდარობა რომ გვაქვს ამიტომაც ვერ წაგვაქცევენ ვერც მე და ვერც ანდროს!"- წერს ანდრო ჭიჭინაძის დედა. 

სინდისის პატიმრის გამოსახულებიან ბანერთან ერთად, ახალი თეატრის ფასადზე ახლა "რუსთავი 2"- სა და კულტურის სამინისტროს ერთობლივი მუსიკალური პროექტის ბანერია გაკრული.

ხმაური ადგილზე მას შემდეგ დაიწყო, რაც იქ რუსთავი 2-ის ახალი გადაცემის პრომოს გადაღებისთვის ის ბანერი ჩამოხსნეს, რომელიც ერთ წელზე მეტია თეატრის ფასადზეა გაკრული.  მსახიობები  უარს ამბობენ მათი პატიმარი კოლეგის მხარდამჭერი ბანერის მოხსნაზე და აცხადებენ, რომ ეს მათი ღირსების საკითხია.