დიუშენის კუნთოვანი დისტროფიის მქონე ბავშვების მხარდასაჭერად დაწყებული მასშტაბური საქველმოქმედო კამპანიის ფონზე, სამთავრობო მედიისა და ივანიშვილის გუნდთან დაკავშირებული ექსპერტების განცხადებებს მწვავე კრიტიკა მოჰყვა. საუბარია განცხადებებზე, სადაც ითქვა, რომ დიუშენის სინდრომის მქონე ბავშვებისთვის საჭირო მომსახურებებს სახელმწიფო უკვე სრულად აფინანსებს და დამატებითი თანხების შეგროვება საჭირო არ არის.

მას შემდეგ, რაც ცნობილი გახდა, რომ ილიას უნივერსიტეტის სტუდენტებმა ბავშვების დასახმარებლად მილიონნახევარზე მეტი ლარი შეაგროვეს, სამთავრობო მედიებმა ერთმანეთის მიყოლებით გაავრცელეს "ოცნების" გუნდთან დაახლოებული ექსპერტების კომენტარები. მათ შორის იყვნენ ნინო ფოჩხუა, შაკო კუჭაშვილი და გია აბაშიძე, რომლებიც ამტკიცებდნენ, რომ ბავშვებისთვის საჭირო სერვისებს ჯანდაცვის სამინისტრო უკვე აფინანსებს.

კრიტიკის განსაკუთრებული ტალღა მოჰყვა ნიკოლოზ მეტრეველის განცხადებასაც, რომელმაც დიუშენის მქონე ბავშვებისთვის აუცილებელ სამედიცინო ინვენტარს „აქსესუარები“ უწოდა. ბავშვების მშობლები ამბობენ, რომ სწორედ ეს მოწყობილობები და ინვენტარი უნარჩუნებს ბევრ პაციენტს სიცოცხლეს.

21 წლის დიმა ვარდუაშვილის დედა, ნატო მოხევიშვილი, აცხადებს, რომ შვილის გადასარჩენად ოჯახმა პრაქტიკულად ყველაფერი გაყიდა, თუმცა საჭირო თანხების მოძიება დღემდე ვერ შეძლეს. მისი თქმით, ოჯახს სოციალურად დაუცველის სტატუსიც კი მოუხსნეს, მიუხედავად მძიმე სოციალური და ჯანმრთელობის მდგომარეობისა.

ვრცლად ნახეთ ხატია სამხარაძის რეპორტაჟში.