პრორუსული არასამთავრობო ორგანიზაციების ინიციატივით, საქართველოში "რუსოფობიის მონიტორინგის საბჭო" შეიქმნა.

ამის შესახებ "სპუტნიკის" ვებგვერდზეა აღნიშნული.

ორგანიზატორების ცნობით, ახალი საზოგადოებრივი ინიციატივის მთავარი მიზანია "საჯარო სივრცეში დისკრიმინაციის, სიძულვილის ენისა და ანტირუსული რიტორიკის შემთხვევების გამოვლენა და ანალიზი".

მათივე თქმით, საბჭო შეაგროვებს ინფორმაციას ფაქტებზე, რომლებიც მათი შეფასებით რუსოფობიის გამოვლენად მიიჩნევა: "რუსეთის შესახებ ყალბი ინფორმაციის გავრცელებიდან და ისტორიული მოვლენების დამახინჯებიდან დაწყებული, ენობრივი ან ეთნიკური კუთვნილების საფუძველზე დისკრიმინაციით დამთავრებული".

"ორგანიზატორების თქმით, საბჭო შეაგროვებს ინფორმაციას ფაქტებზე, რომლებიც რუსოფობიის გამოვლენად მიიჩნევა: რუსეთის შესახებ ყალბი ინფორმაციის გავრცელებიდან და ისტორიული მოვლენების დამახინჯებიდან დაწყებული, ენობრივი ან ეთნიკური კუთვნილების საფუძველზე დისკრიმინაციით დამთავრებული. მონიტორინგი შეეხება მხოლოდ ფიზიკური და იურიდიული პირების საჯარო განცხადებებს, პუბლიკაციებსა და ქმედებებს.

საბჭოს ფარგლებში ასევე შეიქმნება იურიდიული ჯგუფი, რომელიც გამოვლენილ შემთხვევებს სამართლებრივ შეფასებას მისცემს და, საჭიროების შემთხვევაში, შესაბამისი სააპელაციო საჩივრების მომზადებას უზრუნველყოფს. მონიტორინგის შედეგების გამოქვეყნება სამ თვეში ერთხელ იგეგმება.

ინიციატივის ავტორები აღნიშნავენ, რომ ისინი განსაკუთრებულ ყურადღებას მიაქცევენ 2022 წლის თებერვლის შემდეგ გაკეთებულ მოვლენებსა და განცხადებებს. ისინი მიიჩნევენ, რომ ბოლო წლებში საქართველოში ანტირუსული განცხადებებისა და ქმედებების რაოდენობა მნიშვნელოვნად გაიზარდა.

ორგანიზატორებმა ქვეყნის ხელისუფლებას მოუწოდეს, ხელი შეუწყონ ქსენოფობიისა და დისკრიმინაციის ყველა ფორმის წინააღმდეგ ბრძოლას და ხაზგასმით აღნიშნეს, რომ ეროვნული და ენობრივი მრავალფეროვნების პატივისცემის შენარჩუნება სოციალური სტაბილურობის მნიშვნელოვან პირობად რჩება.", - ნათქვამია გავრცელებულ ინფორმაციაში. 

სპუტნიკი საბჭოს სხდომის ამსახველ ვიდეოსაც აქვეყნებს.